ភ្នំពេញ៖ ខ្សែភាពយន្តខ្នាតធំទី២របស់ផលិតកម្ម“ភីសុគន្ធី”រឿង “ល្មមៗបានហើយ!” នឹងមានវត្តមានតារាកំប្លែងតារាសម្តែងប្រុសស្រីល្បីឈ្មោះ សម្តែងរួមគ្នា។ការបង្ហាញមុខតារាសម្តែង តារាកំប្លែង នេះត្រូវបានធ្វើឡើងកាលពីព្រឹកថ្ងៃទី៣០ខែកញ្ញា នេះនៅក្នុងពិធីក្រុងពាលីនៅទីស្នាក់ការផលិតកម្មនាបុរីប៉េងហួត បឹងស្នោខណ្ឌច្បារអំពៅ។
តារាសម្តែងនិងតារាកំប្លែងដែលនឹងមានវត្តមានសម្តែងរួមគ្នាក្នុងខ្សែភាពយន្តខាងលើមានដូចជានាយគ្រឿនកញ្ញា ម៉ាក សែនសូនីតា នាយខ្ជិប នាយតាក់ស៊ី នាយចឺម នាងអ៊ីត នាងភីម កញ្ញា នីឡា នាយតេឡេ នាងនួន នាយស្មាញ អ្នកស្រីសួង សុគន្ធា កុមារ៉ាឃ្លៀច កុមារីធារ៉ា និងតារាប្រុសស្រីជាច្រើនរូបទៀត។
អ្នកស្រីប៉ុលពិសីអ្នកនិពន្ធនិងដឹកនាំរឿងជើងចាស់ បានបញ្ជាក់ថាខ្សែភាពយន្ត”ល្មៗបានហើយ!” គឺជាខ្សែភាពយន្តបែបកំប្លែងប៉ុន្តែមានដោយទស្សនៈអប់រំច្រើនពិសេសគឺការផឹកស្រាលេងល្បែងស៊ីសងជាដើម។ផលិតករដែលធ្លាប់ប្រឡូកក្នុងការផលិតខ្សែភាពយន្តចាប់តាំងពីឆ្នាំ១៩៩១រូបនេះបន្តថាការវិវត្តស្នាដៃឲ្យត្រូវទៅតាមចិត្តអ្នកទស្សនានិងសម័យកាលនីមួយរួមទាំងការអប់រំស៊ីជម្រៅនេះអាចនឹងធ្វើឲ្យខ្សែភាពយន្តនេះទទួលបានការចាប់អារម្មណ៍ច្រើន។អ្វីដែលអ្នកស្រីកាន់តែមានកម្លាំងចិត្តក្នុងការផលិតខណៈដែលក្រសួងព័ត៌មានប្រកាសឲ្យស្ថានីយទូរទស្សន៍ក្នុងស្រុកផ្អាកការចាក់បញ្ចាំងខ្សែភាពយន្តនិងកម្មវិធីបរទេសនៅម៉ោងពិសេស។
អ្នកស្រី សួង ធីចាងហ្វាងផលិតកម្មភីសុគន្ធីបានបញ្ជាក់ថា រឿង”ល្មមៗបានហើយ!”នេះគឺជាខ្សែភាពយន្តទី២ដែលផលិតកម្មរបស់អ្នកស្រីគ្រោងចេញថតនៅថ្ងៃទី១៤តុលានេះបន្ទាប់ពីបញ្ចប់ការផលិតខ្សែភាពយន្តទី១រឿង “បេះដូងកូពី”កាលពីថ្មីៗនេះ។ អ្នកស្រីបន្តថា ដោយសារតែវាគឺជាខ្សែភាពយន្តបែបកំប្លែងនិងបង្កប់ដោយអត្ថន័យអប់រំទើបអ្នកស្រីអញ្ជើញសិល្បករភាគច្រើនជាតារាកំប្លែង។ អ្នកស្រីនៅមិនទាន់អាចកំណត់បានអំពីពេលវេលានិងថវិកានៃការផលិតខ្សែភាពយន្តនេះអនៅឡើយព្រោះទាំងពេលវេលា និងការចំណាយអាចប្រែប្រួលខ្លះទៅតាមពេលវេលាជាក់ស្តែង។ អ្នកស្រីនៅតែដាក់ក្តីរំពឹងច្រើនជាមួយនឹងស្នាដៃនៃការផលិតដំបូងរបស់ផលិតកម្មអ្នកស្រីព្រោះតែរឿងទាំងនេះដឹកនាំសម្តែង ចូលរួមសម្តែង និងផលិតដោយសិល្បករ អ្នកនិពន្ធនិងដឹកនាំរឿងដែលមានបទពិសោធន៍។ ថោកែល្ខោនបាកសាក់ល្បីឈ្មោះប្រចាំស្រុកបាទីខេត្តតាកែវរូបនេះលើកឡើងដែរថា ការអប់រំអពីទិដ្ឋភាពសង្គមនឹងនៅតែជាប្រធានបទសំខាន់ដែលអ្នកស្រីនឹងលើកយកមកបង្ហាញដល់អ្នកទស្សនាបើទោះបីជារឿងនេះជារឿងកំប្លែងក្តីហើយអ្នកស្រីនៅតែមានបំណងផលិតខ្សែភាពយន្តដែលបង្កប់ដោយតម្លៃនៃការតស៊ូ និងបង្ហាញពីអ្វីដែលជាភាពល្អរបស់ប្រពៃណីវប្បធម៌ខ្មែរ។
តារាកំប្លែងស្រី នាងអ៊ីត បញ្ជាក់ថា នេះគឺជាខ្សែភាពយន្តទីពីរដែលនាងសម្តែងសម្រាប់ផលិតកម្ម នេះ ។ នាងថាក្នុងខ្សែភាពយន្តនេះនាងសម្តែងជាតួមីង យិនហើយរឿងនេះមានឈុតឆាកជាច្រើនដែលនាងចាប់អារម្មណ៍ហើយវាគជារឿងដែលមិនត្រឹមតែជាការកំប្លែង សម្រាប់អ្នកទស្សនាសើចសប្បាយទេប៉ុន្តែវាបង្កប់ដោយគំនិតអប់រំច្រើន។ តារាកំប្លែងស្រីដែលមានឈ្មោះដើមថាសេន ចិន្តារូបនេះរំពឹងថាខ្សែភាពយន្តនេះអាចនឹងទទួលបានជោគជ័យនៅពេលដែលរឿងនេះត្រូវបានដាក់បញ្ចាំងនៅក្នុងរោងភាពយន្តហើយនាងស្នើឲ្យទស្សនិកជនបន្តគាំទ្រខ្សែភាពយន្តខ្មែរផងដែរ៕
ដោយ៖ វឌ្ឍនា