ភ្នំពេញ៖ នៅថ្ងៃទី ២៦ ខែ កញ្ញា ឆ្នាំ ២០១៥ ណាហ្គាវើលបេះដូងសប្បុរស បានរៀបចំការប្រកួតបាល់ទាត់មិត្តភាពសម្រាប់កុមារនៅអង្គការមិត្តសំឡាញ់ និងអង្គការផ្កាយសមុទ្រ ដែលស្ថិតក្នុងខណ្ឌស្ទឹងមានជ័យ រាជធានីភ្នំពេញ។ គោលបំណងចម្បងនៃកិច្ចខិតខំប្រឹងប្រែងនេះ គឺដើម្បីចូលរួមចំណែកក្នុងការអភិវឌ្ឍន៍វិស័យកីឡាក្នុងប្រទេសកម្ពុជា។
លោក James Ma នាយកផ្នែកទំនាក់ទំនងបុគ្គលិក និងការងារសង្គមណាហ្គាវើល បានមានប្រសាសន៍ថា “ណាហ្គាវើលបេះដូងសប្បុរសមិនត្រឹមតែបានរៀបចំការប្រកួតបាល់ទាត់មិត្តភាពសម្រាប់កុមារកម្ពុជាប៉ុណ្ណោះនោះទេ ប៉ុន្តែថែមទាំងបានផ្តួចផ្តើមបង្កើតកម្មវិធីបណ្តុះបណ្តាលបាល់ទាត់ដើម្បីជួយអភិវឌ្ឍវិស័យកីឡាក្នុងប្រទេសកម្ពុជាតាមរយៈការផ្តល់កម្មវិធីបណ្តុះបណ្តាលជំនាញមូលដ្ឋានបាល់ទាត់ទៅដល់កីឡាករបាល់ទាត់វ័យក្មេងកម្ពុជាថែមទៀតផង។ លើសពីនេះទៅទៀត ណាហ្គាវើលបេះដូងសប្បុរសបានឧបត្ថម្ភបាល់ទាត់ និងបាល់ទះជាង ៦០០បាល់ ទៅដល់សាលារៀន និងមជ្ឈមណ្ឌលកុមារកំព្រាមួយចំនួននៅតាមបណ្តាខេត្ត និងរាជធានីភ្នំពេញផងដែរ។ រហូតមកដល់បច្ចុប្បន្ននេះ មានកីឡាករបាល់ទាត់វ័យក្មេងកម្ពុជានៅតាមបណ្តាខេត្ត និងរាជធានីភ្នំពេញជាង ៣០០ នាក់ បានទទួលផលប្រយោជន៍ពីកម្មវិធីបណ្តុះបណ្តាលបាល់ទាត់នេះ ។ កម្មវិធីបណ្តុះបណ្តាលបាល់ទាត់នេះ ត្រូវបានបណ្តុះបណ្តាលដោយកីឡាករអាជីពមកពីក្លឹបបាល់ទាត់ណាហ្គាវើលដែលជាក្លឹបបាល់ទាត់ដ៏ល្បីឈ្មោះមួយ”។
លោកបានបន្ថែមទៀតថា “យើងរំពឹងថា តាមរយៈកម្មវិធីបណ្តុះបណ្តាលបាល់ទាត់នេះ វិស័យកីឡាក្នុងប្រទេសកម្ពុជានឹងឈានឡើងមួយកម្រិតទៀត ហើយកីឡាករបាល់ទាត់វ័យក្មេងមួយចំនួន នឹងអាចក្លាយជាកីឡាករបាល់ទាត់អាជីពនាពេលអនាគត ហើយពួកគេអាចផ្ទេរជំនាញរបស់ពួកគេទៅឲ្យក្មេងជំនាន់ក្រោយទៀតផង”។
កុមារម្នាក់ ដែលបានចូលរួមក្នុងការប្រកួតបាល់ទាត់មិត្តភាពមកពីអង្គការមិត្តសំឡាញ់ បាននិយាយថា “ខ្ញុំសប្បាយរីករាយណាស់ដែលបានចូលរួមការប្រកួតបាល់ទាត់មិត្តភាពដែលបានរៀបចំដោយណាហ្គាវើលបេះដូងសប្បុរស។ អត្ថប្រយោជន៍នៃកម្មវិធីប្រកួតបាល់ទាត់មិត្តភាពនេះ ធ្វើឲ្យខ្ញុំទទួលបានជំនាញបច្ចេកទេសក្នុងការលេងបាល់ទាត់។ យើងក៏បានស្គាល់មិត្តភ័ក្តិថ្មីៗជាច្រើននាក់មកពីមជ្ឈមណ្ឌលកុមារកំព្រាផ្សេងៗទៀតផងដែរ។ យើងសូមអរគុណដល់ណាហ្គាវើលបេះដូងសប្បុរស ដែលបានរៀបចំកម្មវិធីប្រកួតបាល់ទាត់មិត្តភាពសម្រាប់យើង”។
លោក សាមឌី បុគ្គលិករបស់អង្គការផ្កាយសមុទ្រ បានមានប្រសាសន៍ថា “សូមថ្លែងអំណរគុណដល់ណាហ្គាវើលបេះដូងសប្បុរសដែលបានរៀបចំកម្មវិធីប្រកួតបាល់ទាត់មិត្តភាពសម្រាប់កុមាររបស់យើង។ ជាច្រើនលើកមកហើយដែលណាហ្គាវើលបេះដូងសប្បុរសបានផ្តល់កម្មវិធីបណ្តុះបណ្តាលបាល់ទាត់សម្រាប់កុមារកម្ពុជា។ វាដល់ពេលដែលកុមារទាំងនេះត្រូវអនុវត្តជំនាញរបស់ពួកគេដែលបានរៀនពីក្លឹបបាល់ទាត់ណាហ្គាវើលហើយ។ ខ្ញុំគិតថា កម្មវិធីនេះមានអត្ថប្រយោជន៍ណាស់សម្រាប់កុមារដើម្បីអភិវឌ្ឍជំនាញបាល់ទាត់របស់ពួកគេ”។ គាត់បានបន្ថែមទៀតថា “តាំងនាមឲ្យកុមារទាំងនេះ ខ្ញុំសូមថ្លែងអំណរគុណដល់ណាហ្គាវើលបេះដូងសប្បុរសដែលបានផ្តល់ទាំងសម្ភារៈកីឡា និងកម្មវិធីបណ្តុះបណ្តាលដល់កុមារ”៕
ដោយ៖ ស ដារ៉ា