ខេត្ដសៀមរាប៖ កម្លាំងនគរបាល ប្រឆាំងបទល្មើសសេដ្ឋកិច្ចខេត្ដសហការជាមួយមន្ទីរសុខាភិបាលបានចុះពិនិត្យ ទីតាំងលក់ឱសថបុរាណចិនមួយកន្លែង ដែលគ្មានច្បាប់អនុញ្ញាត បន្ទាប់ពីទទួល ដំណឹងថាពលរដ្ឋម្នាក់បានស្លាប់នៅស្រុកជីក្រែងបន្ទាប់ពីបានប្រើប្រាស់ឱសថទិញពីទីតាំងលក់ឱសថចិននេះ ។
ការចុះប្រតិបត្ដិការណេះបានធ្វើឡើងកាលពីព្រឹកថ្ងៃទី៣០ ខែកញ្ញា ឆ្នាំ២០១៥ ស្ថិតក្នុងភូមិត្រញំងសេះ សង្កាត់គោក ចក ក្រុងសៀមរាប ។
លោកវរសេនីយ៍ឯក សឿន សេន នាយការិយាល័យនគរបាលប្រឆាំងបទ ល្មើសសេដ្ឋកិច្ចនៃស្នងការដ្ឋានខេត្ដសៀម រាបបានឱ្យដឹងថា ប្រតិបត្ដិការត្រួត ពិនិត្យទីតាំងខាងលើនេះ បន្ទាប់ពីទទួល បានបទបញ្ជាពីតំណាងអយ្យការអម សាលាដំបូងខេត្ដនិងមានការសហការ រវាងសមត្ថកិច្ចនគរបាលសេដ្ឋកិច្ចខេត្ដ និងមន្ទីរសុខាភិបាលខេត្ដព្រមទាំងអាជ្ញាធរមូលដ្ឋាន ។
លោកសឿន សេន បានឱ្យដឹងទៀតថា ក្រោយពីចុះពិនិត្យទីតាំងឱសថបុរាណ ចិនយីហោយ៉ុងហឹងក្រុមប្រតិបត្ដិការ បានឈានទៅដល់ការនាំខ្លួនបុគ្គលិក ម្នាក់ឈ្មោះ វ៉ែន ចន្ដ្រា ភេទស្រី អាយុ ២៤ឆ្នាំ យកទៅសួនាំនៅស្នងការខេត្ដ ព្រោះម្ចាស់ទីតាំងនៅក្រៅប្រទេស ។ ក្រៅពីនេះក្រុមប្រតិបត្ដិការក៏បានរក ឃើញថានៅក្នុងចំណោមឱសថជាច្រើនប្រភេទដែលដាក់លក់ក្នុងទីតាំងខាងលើ នេះមានឱសថមួយចំនួនពុំមានអាជ្ញា បណ្ណត្រឹមត្រូវ ។ លើសពីនេះទៀត ទីតាំងលក់ឱសថបុរាណចិនយីហោយ៉ុង ហឹងនេះថែមទាំងបានផ្សព្វផ្សាយបំភ្លើសការពិតទៀតថា ឱសថដែលមានលក់ ក្នុងហាងរបស់ខ្លួនអាចព្យាបាលជំងឺបាន១០០មុខទៀងផង ។ កត្ដានេះមន្ដ្រីជំនាញ បានបដិសេធថា មិនអាចទៅរួចនោះ ឡើយដោយបញ្ជាក់ថា ថ្នាំមួយមុខគឺ អាចព្យាបាលជម្ងឺបានតែមួយមុខនោះទេ ហើយបើទីតាំងខាងលើធ្វើបែបនេះ នោះគឺបំពានច្បាប់ទាំងស្រុង គឺបើក លក់ខុសច្បាប់ហើយផ្សព្វផ្សាយបំភ្លៃ បោកប្រាស់ប្រជាពលរដ្ឋថែមទៀត ។
ក្រោយពីរកឃើញបញ្ហាទាំងនេះហើយ ក្រុមសមត្ថកិច្ចចម្រុះបានសម្រេចបិទ ទីតាំងលក់ឱសថបុរាណចិននេះបណ្ដោះអាសន្នសិន ដោយរង់ចាំម្ចាស់ទីតាំង ចូលបំភ្លឺ និងសុំអាជ្ញាបណ្ណត្រឹមត្រូវទើប អនុញ្ញាតឱ្យបើកវិញ ។
ទាក់ទិនបញ្ហានេះពលរដ្ឋនៅក្នុងខេត្ដ សៀមរាបបានសាទរទៅនឹងចំណាត់ការ របស់សមត្ថកិច្ចជំនាញ ព្រោះថាបច្ចុប្បន្ន នេះមានជនឆ្លៀតឱកាសមួយចំនួនធំ បានដើរផ្សព្វផ្សាយឱ្យពលរដ្ឋទិញថ្នាំរបស់ពួកគេដោយអួតអាងថាជាសះជម្ងឺ១០០មុខដែលទង្វើទាំងនេះអាចធ្វើឱ្យប៉ះពាល់សុខភាពពលរដ្ឋដែលមិនសូវយល់ដឹងពីបញ្ហានេះ ។ ពួកគាត់បានស្នើឱ្យសមត្ថ កិច្ចមានវិធានការក្ដៅបន្ដទៀតនិងចាត់ការជនដែលប្រព្រឹត្ដខុសច្បាប់ឱ្យបានធ្ងន់ធ្ងរតាមច្បាប់ជាធរមាន ៕
ដោយ៖ វិបុល