ភ្នំពេញ៖ លោក យ៉ា និមល អគ្គ លេខាធិការសហព័ន្ធកីឡាគុនដាវបាន ប្រាប់អ្នកសារព័ត៌មានថាយ៉ាងហោច ណាស់រយៈពេល២ទៅ៣ឆ្នាំខាងមុខនេះ កីឡាគុនដាវកម្ពុជាអាចដណ្ដើមបាន ចំណាត់ថ្នាក់លេខរៀងល្អនៅលើឆាកអន្ដរ ជាតិ ដោយកំណត់ថាត្រូវតែដណ្ដើម ចំណាត់ថ្នាក់លេខ៥ក្នុងចំណោម១១ ប្រទេសដែលជាសមាជិកប្រទេសប្រជាជាតិអាស៊ីអាគ្នេយ៍មុនប្រទេសកម្ពុជាធ្វើម្ចាស់ផ្ទះរៀបចំការប្រកួតកីឡាស៊ីហ្គេមលើកទី៣២ឆ្នាំ២០២៣ ។
លោកអគ្គលេខាធិការមានប្រសាសន៍ បែបនេះនៅក្នុងពិធីបិទការប្រកួតកីឡាគុនដាវជ្រើសរើសជើងឯកប្រចាំឆ្នាំ ២០១៥ក្នុងសាលដំបូលទូកនៃសាកល វិទ្យាល័យភូមិន្ទភ្នំពេញកាលពីរសៀល ថ្ងៃទី៣០ ខែកញ្ញា ឆ្នាំ២០១៥ កន្លងទៅ ដោយលោកបានបញ្ជាក់ថា សហព័ន្ធ មានគោលបំណងធំៗ២ គឺទី១-ខិតខំ ស្វែងរកទីលានសម្រាប់កីឡាករកីឡា ការិនីហ្វឹកហាត់ឱ្យបានសមរម្យតាម ស្ដង់ដារអន្ដរជាតិ ។ ទី២-ជំរុញការ បណ្ដុះបណ្ដាលគ្រូបង្វឹកអាជ្ញាកណ្ដាលចៅ ក្រមជាជនជាតិខ្មែរឱ្យបានច្រើនដើម្បី ឆ្លើយតបជាមួយតម្រូវការចាំបាច់របស់សហព័ន្ធនិងក្រសួងអប់រំយុវជន និង កីឡា ។
លោកបានបន្ដទៀតថា បើទោះបី ការប្រកួតជ្រើសរើសជើងឯកថ្នាក់ជាតិឆ្នាំនេះមានការថយចុះបន្ដិចមែន ដោយ សារតែរដូវនេះកីឡាករកីឡាការិនីមួយចំនួនជាប់រវល់សិក្សា ។ តួលេខពិត ប្រាកដសម្រាប់ការប្រកួតនេះមានអ្នកចូលរួម៣៧នាក់ក្នុងចំណោមក្លិបចំនួន៥ គឺក្លិបទី១នៅខេត្ដបាត់ដំបង, ទី២នៅ ខេត្ដសៀមរាប និង៣ក្លិបទៀតនៅរាជ ធានីភ្នំពេញ ។
ដោយឡែកលោកព្រំ ប៊ុនយី* អគ្គ នាយករងនៃអគ្គនាយកដ្ឋានកីឡាបាន ជំរុញឱ្យសហព័ន្ធកីឡាគុនដាវខិតខំបណ្ដុះបណ្ដាលកីឡាករកីឡាការិនីបន្ថែមទៀត ដើម្បីចូលរួមប្រកួតប្រជែង National Games នាឆ្នាំ២០១៦ដែលប្រទេស កម្ពុជាសាកល្បងរៀបចំជាលើកដំបូង មានកីឡាប្រមាណ១៩ប្រភេទចូលរួម ក្នុងន័យពង្រឹងសមត្ថភាពកីឡាករកីឡា ការិនីនិងមន្ដ្រីបច្ចេកទេសត្រៀមស៊ីហ្គេម ឆ្នាំ២០២៣ ។
ចំពោះលទ្ធផលក្នុងការប្រកួតជើង ឯកថ្នាក់ជាតិឆ្នាំ២០១៥នេះវិញ្ញាសានារីឯកត្ដជនដាវធំមេដាយមាសបានទៅលើកីឡាការិនីឆាយ លីលី, មេដាយប្រាក់ កីឡាការិនី មួង ម៉ានុត និងមេដាយ សំរឹទ្ធិកីឡាការិនី សួង ពិសី មកពីក្លិប ហូសាណាដូចគ្នា ។
វិញ្ញាសាដាវតូចបុរសឯកត្ដជន មេដាយមាសកីឡាករជីម ធារ៉ា មកពី ក្លិបហូសាណា, មេដាយប្រាក់កីឡាករ ឆាយ សុខលាភ មកពីក្លិបអ៊ីសា និង មេដាយសំរឹទ្ធិ បានទៅកីឡាករ សាន់ សុខសីហា មកពីក្លិបអ៊ីសាដែរ ។
វិញ្ញាសាបុរសដាវធំមេដាយមាស កីឡាករឃឹម សាមាន មកពីក្លិបសន្ធរ ម៉ុក, មេដាយប្រាក់កីឡាករ មាលាបូរិន មកពីក្លិបនរា និង មេដាយសំរឹទ្ធិបានទៅ កីឡាករ ជុំ សម្បត្ដិ មកពីក្លិបអ៊ីសា ។ វិញ្ញាសាដាវធំបុរសជាក្រុមមេដាយ មាសបានទៅក្លិបអ៊ីសា ។ មេដាយប្រាក់ បានទៅក្លិបសន្ធរម៉ុកនិងមេដាយសំរឹទ្ធិ បានទៅលើក្លិបនរា ៕
ដោយ៖ សារីម
