ខេត្តកំពង់ស្ពឺ ៖ តាមប្រភពព័ត៌មានឲ្យដឹងថា អ្នកទោស ៥នាក់បានហែកគុករត់ចេញពីពន្ធធនាគារខេត្តកំពង់ស្ពឺកាលពីយប់ឈានចូលថ្ងៃទី២០ ខែមិថុនា ឆ្នាំ២០១៧ សង្ស័យថា ការយាមកាមរបស់មន្រ្តីពន្ធធនាគារធ្វេសប្រហេសនឹងដាច់វេណយាម ។
ប្រភពបានបន្តថា អ្នកទោសដែលរត់ចេញពីពន្ធធនាគារខេត្តកំពង់ស្ពឺនេះសុទ្ធសឹងជាអ្នកទោសជាប់ពីបទឧក្រិដ្ឋដែលត្រូវបានសមត្ថកិច្ចចាប់ខ្លួននាពេលកន្លងទៅបញ្ជូនទៅតុលាការហើយត្រូវបានតុលាការ សម្រេចផ្ដន្ទាទោសរួចរាល់ហើយនោះ។
ជុំវិញអ្នកទោសរត់ចេញពីពន្ធធនាគារនេះប្រធានពន្ធនាគារ ខេត្តកំពង់ស្ពឺ លោក កាក់ សវ៉ុន នៅព្រឹកថ្ងៃទី២០ ខែមិថុនា ឆ្នាំ២០១៧ បានប្រាប់ថា ពិតជាមានអ្នកទោសហែកគុករត់រួច៥នាក់មែនកាលពីយប់
ចន្លោះម៉ោង២-៣ រំលងអធ្រាត្រឈានចូលថ្ងៃទី២០ ខែមិថុនា ដែលអ្នកទោសទាំង៥នាក់ បាន ធ្វើសកម្មភាពគាស់ពិដានដំបូល បន្ទាប់មកក៏លូនរត់ចេញ ។
ប្រធានពន្ធនាគារបន្តថា អ្នកទោសដែលរត់នេះ ទី១-ឈ្មោះ កែវ ឯម ភេទប្រុស អាយុ៤៧ឆ្នាំ ឃុំខ្លួនពីបទប្លន់ ទី២-ឈ្មោះ ឃុន សុខភឿន ភេទប្រុស អាយុ៣១ឆ្នាំ ឃុំខ្លួនពីបទជួញដូរគ្រឿងញៀន ទី៣-ឈ្មោះ ស៊ុម ម៉ូច ភេទប្រុស អាយុ៣២ឆ្នាំ ឃុំខ្លួនពីបទមនុស្សឃាត ទី៤-ឈ្មោះ រុន រ៉ានី ភេទប្រុស អាយុ២២ឆ្នាំ ឃុំខ្លួនពីបទជួញដូរគ្រឿងញៀន និងទី៥-ឈ្មោះ ឡុង ប៊ុនណាត ភេទប្រុស អាយុ៣០ឆ្នាំ ឃុំខ្លួនពីបទជួញដូរគ្រឿងញៀន។
លោកបានបន្តថា ករណីអ្នកទោសរត់ចេញពីពន្ធធនាគារនេះលោកបានរាយការណ៍រួចហើយ ទៅថ្នាក់លើហើយនៅព្រឹកថ្ងៃដដែលលោកអូ៊ផាត ព្រះរាជ្ញារងអមសាលាដំបូងខេត្តកំពង់ស្ពឺបានចុះមកពិនិត្យចំណុចកើតហេតុ តែយ៉ាងណាសមត្ថកិច្ចបាននឹងកំពុងតាមចាប់ខ្លួនទណ្ឌិតទាំងនេះហើយដែរ។
គួររំលឹកថា ថ្មីៗកន្លងទៅនេះអ្នកទោសនៅពន្ធធនាគារភ្នំស្វាយ នៃខេត្តរតនគិរីបានហែកគុករត់ចេញជាបន្តបន្ទាប់ដោយគេសង្ស័យថា មានអ្នកហុចសោឲ្យអ្នកទោសទាំងនោះទើបអ្នកទោសទាំងនោះអាចរត់រួចដោយងាយស្រួលនឹងជាបន្តបន្ទាប់ដូច្នេះ ។ ករណីនេះគេបានបង្ហើបថា ថ្នាក់លើកំពុងសើុបសង្កេតផងដែរ ហើយប្រធានពន្ធធនាគារក៏អាចនឹង ប្រឈមការដកដំណែងនោះដែរប្រសិនបើរកឃើញថា មានកំហុសនាំឲ្យអ្នកទោសរត់ចេញពីពន្ធធនាគារដដែលៗនេះ៕ សេនា ស័ក្តិ
