ភ្នំពេញ៖ មានការភ្ញាក់ផ្អើលមួយបានកើតមានឡើងនៅក្នុងវត្តនន្ទមុនីក្នុងភូមិដំណាក់ធំ១ សង្កាត់ស្ទឹងមានជ័យ ខណ្ឌមានជ័យ នៅវេលាម៉ោង ៨និង២០នាទីព្រឹកថ្ងៃទី២ ខែតុលា ឆ្នាំ២០១៥បន្ទាប់ពីមានបុរសវ័យចំណាស់ អាយុជាង៥០ឆ្នាំម្នាក់ បានប្រើកាំបិតបុ័ងតោអារកប៉ងសម្លាប់ខ្លួនឯងតែមិនបានសម្រេច ។
តាមលោកយាយជី សំ គឹមលី អាយុ៧៥ឆ្នាំ ជាដូនជីនៅក្នុងវត្ដ បានប្រាប់ថា មុនពេលកើតហេតុ លោកយាយបានឃើញបុរសខាងលើមិនដឹងមកពីណាទេរត់ចូលមកក្នុងវត្ដ ហើយក្រាបសំពះលោកគ្រូចៅអធិការវត្ដសុំខមាលទោសទាំងទឹកមុខក្រៀមក្រំ រួចឡើងទៅលើព្រះវិហារបាត់ទៅ ។ លុះ មួយសន្ទុះក្រោយ មកស្រាប់តែបុរសនេះបានរត់ចុះមកពីព្រះវិហារមកខ្ចីកាំបិតអ្នកលក់ដូរនៅក្បែរនោះ តែគេមិនឲ្យ។ បន្ទាប់មកក៏មកខ្ចីកាំបិតពីលោកយាយថាយកទៅទៅចិតផ្លែឈើបន្ដិច ប៉ុន្តែមិនដឹងរឿងអីស្រាប់តែយកអារកខ្លួនឯងហូរឈាមប្រឡាក់អាវ ធ្វើឲ្យលោកយាយភ័យ ក៏ស្រែកឆោឡោឡើងហើយក៏ ត្រូវប្រជាពលរដ្ឋដែលទៅកាន់បិណ្ឌនៅវត្តនេះនាំគ្នាជួយចាប់ និងឃាត់ ហើយរាយការណ៍ជូនសមត្ថកិច្ចឲ្យមកនាំយកទៅសាកសួរ បន្ទាប់ពីមានស្នាមរបួសមុតកតែបន្តិច។
សមត្ថកិច្ចមូលដ្ឋានបានឲ្យដឹងថានៅពេល សួរនាំ បុរសរូបនេះមិនព្រមឆ្លើយតបឬប្រាប់ឈ្មោះ និងអាសយដ្ឋានឲ្យដឹងនោះទេ ដែលករណីនេះសមត្ថកិច្ចសង័្សយថាគាត់កើតរោគចិត្តរួចក៏បាននាំទៅរកក្រុមគ្រួសារឲ្យមកទទួលត្រឡប់ទៅផ្ទះវិញទាំងឈាមប្រឡាក់អាវយឺតស្រម៉ក៕
ដោយ៖ ប្រាថ្នា
