ខេត្ដសៀមរាប៖ អាជ្ញាធរជាតិអប្សរា បានបង្ហាញរបាយការណ៍ថា ចំណូលថវិកាពីការលក់សំបុត្រចូលទស្សនាប្រសាទអង្គរវត្ដ រយៈពេល៩ខែឆ្នាំ២០១៥នេះ កើនឡើងចំនួន០,២៤% បើធៀបរយៈពេលដូចគ្នា នៅឆ្នាំ២០១៤កន្លងមក ប៉ុន្ដែចំនួនអ្នកមកទស្សនាក៍មានការកើនឡើងជិត១,៨៥។
យោងតាមរបាយការណ៍របស់អាជ្ញាធរជាតិអប្សរា ចេញផ្សាយនៅថ្ងៃទី០២ ខែតុលានេះ បង្ហាញថា ភ្ញៀវទេសចរបរទេសទិញប័ណ្ណមកទស្សនាប្រាសាទអង្គរវត្តប្រចាំខែកញ្ញា មានចំនួន១១៩,៩៣៧នាក់កើនឡើង១.០១ ភាគរយ បើធៀបនឹងខែកញ្ញា ឆ្នាំ២០១៤។ រីឯចំណូលដុលនៅក្នុងខែកញ្ញាបានចំនួន ៣,៥៧៦,១២០ ដុល្លារ បើប្រៀបធៀបនឹងខែកញ្ញាឆ្នាំ២០១៤ កើនឡើង២.៧៧ភាគរយ ។
របាយការណ៍ដដែលឲ្យដឹងទៀតថា ចំណូលថវិកាបានពីការលក់សំបុត្រចូលទស្សនារមណីយដ្ឋានអង្គរសម្រាប់៩ ខែដើមឆ្នាំ២០១៥នេះ មានចំនួនសរុប ៤៣,៣០០,០៤០ដុល្លារ បើប្រៀបធៀបនឹងរយៈពេលដូចគ្នាក្នុងឆ្នាំ២០១៤ កើនឡើង០.២៤ភាគរយ ។ ចំណែកចំនួនភ្ញៀវទិញប័ណ្ណចូលទស្សនាមានចំនួន ១,៥២៤,០៤៤នាក់ កើនឡើង ១.៨៥ភាគរយ ។
លោក ឡុង កុសល ប្រធាននាយកដ្ឋានផ្សព្វផ្សាយ នៃអាជ្ញាធរជាតិអប្សរា មានប្រសាសន៍បន្ថែមថា មូលហេតុដែលភ្ញៀវទេសចរកើនឡើងជាងប្រាក់ចំណូលនេះ ដោយសារ ភ្ញៀវទេសចរទិញប័ណ្ណចូលទស្សនាតម្លៃ២០ដុល្លាច្រើនជាងរយៈពេលវែង ដែលមាន៤០ដុល្លារ និង៦០ដុល្លា។
សូមបញ្ជាក់ថា តម្លៃសំបុត្រចូលទស្សនាប្រាសាទអង្គរសម្រាប់ជនបរទេសចែកចេញជា៣ ប្រភេទគឺ តម្លៃ២០ដុល្លារសម្រាប់រយៈពេល១ថ្ងៃ ៤០ដុល្លារសម្រាប់រយៈពេល៣ថ្ងៃ (មានសុពលភាព១សប្ដាហ៍) និង៦០ដុល្លារ សម្រាប់រយៈពេល៧ថ្ងៃ (មានសុពលភាព១ខែ) ៕
ដោយ៖ ជានិរន្ដរ៍
