ភ្នំពេញ ៖ រថយន្តកូរ៉េចំណុះ៥តោនផ្ទុកទៅដោយឈើអារ បានបើកជ្រុលចង្កូតឡើងខឿនផ្លូវ បន្តបុកបង្កាន់ដៃស្ពានក្រឡាប់សង្កត់មនុស្សស្លាប់ម្នាក់នៅនឹងកន្លែង និង៤នាក់ទៀត រងរបួស មធ្យមនិងស្រាល ។
ហេតុការណ៍នេះកើតនៅវេលាម៉ោង៨និង៣០នាទី យប់ថ្ងៃទី១១ ខែកក្កដា ឆ្នាំ២០១៧ នៅលើ ផ្លូវជាតិលេខ៥ ស្ថិតក្នុងភូមិក្រួស សង្កាត់សំរោង ខណ្ឌព្រែកព្នៅ រាជធានីភ្នំពេញ ។
រថយន្តបង្កហេតុដោយខ្លួនឯងខាងលើនេះម៉ាកហ៊ីយ៉ាន់ដាយ ពណ៌ខៀវលាយស ពាក់លេខ ភ្នំពេញ3A-6961 បើកបរដោយឈ្មោះ រ៉ាន់ វ៉ាញ់ អាយុ២៣ឆ្នាំ មានស្រុកកំណើតភូមិបារាជ ឃុំព្រៃឃ្នេស ស្រុកមេសាង ខេត្តព្រៃវែង និងមានអ្នករួមដំណើរ៤នាក់ ទី១-ឈ្មោះសុន ធាន ភេទប្រុស អាយុ៣៦ឆ្នាំ មានទីលំនៅភូមិអូអូន ឃុំតាងួន ស្រុកស្ទឹងត្រង់ ខេត្តកំពង់ចាម, ទី២-ឈ្មោះ ឆែម លុច ភេទប្រុស អាយុ២៣ឆ្នាំ មានទីលំនៅ ភូមិចំបក់ ឃុំស្រយូវ ស្រុកស្ទឹងសែន ខេត្តកំពង់ធំ ,ទី៣-ឈ្មោះ អាន ដឿយ ភេទប្រុស អាយុ៤០ឆ្នាំ មានទីលំនៅ ឃុំជ្រៃ ស្រុកមោងឫស្សី ខេត្តបាត់ដំបង ។
សាក្សីបានឲ្យដឹងថា រថយន្តរថយន្តនេះបើកតាមបណ្តោយផ្លូវជាតិលេខ៥ ក្នុងទិសដៅពីជើងទៅត្បូង ។ លុះធ្វើដំណើរមកដល់កន្លែងកើតហេតុ ស្រាប់តែបើកឡើងខឿន បន្តទៅបុកបង្កាន់ស្ពានក្រឡាប់សង្កត់ឲ្យមនុស្ស២នាក់ បណ្តាលឲ្យស្លាប់ម្នាក់ និង៤នាក់ទៀតរងរបួសមធ្យមនិងស្រាល ហើយត្រូវបានដឹកទៅសង្គ្រោះនៅឯមន្ទីរពេទ្យ ។
បច្ចុប្បន្នជំនាញចរាចរណ៍ក្រុងបានស្ទួចយករថយន្តទៅរក្សាទុកនៅការិយាល័យចរាចរណ៍ជើងគោកនៃស្នងការនគរបាលរាជធានីភ្នំពេញ ៕ ជាយក្រុង
