ភ្នំពេញ៖ មានករណីគ្រោះថ្នាក់ចរាចរណ៍មួយបានកើតមានឡើងរវាងម៉ូតូបុកម៉ូតូបណ្តាលឲ្យខូចខាតតិចតួច និងធ្វើឲ្យមនុស្សម្នាក់រងរបួសស្រាល តែម្ចាស់និងម្ចាស់ជាអ្នកបើកបរមានការជជែកគ្នាយ៉ាងតឹងសរសៃកដើម្បីរកត្រូវរៀងៗខ្លួន ។
ឧប្បត្តិហេតុនេះកើតឡើងកាលពីវេលាម៉ោង៨ និង៥០នាទីយប់ ថ្ងៃទី៥ តុលាឆ្នាំ២០១៥ នៅចំណុចគល់ស្ពានអាកាស៧មករា នៅតាមបណ្តោយផ្លូវកម្ពុជាក្រោម ក្នុងសង្កាត់ទឹកល្អក់១ ខណ្ឌទួលគោក ។
ប្រភពពីសាក្សីដែលឃើញឧប្បត្តហេតុនេះ បាននិយាយថា មុនពេលកើតហេតុគេឃើញបុរសមិនស្គាល់ឈ្មោះម្នាក់ជិះម៉ូតូ១គ្រឿងម៉ាកហុងដា សេ១២៥ ពណ៌ខ្មៅ ពាក់ស្លាកលេខ ភ្នំពេញ1CR-4472 តាមបណ្តោយផ្លូវកម្ពុជាក្រោមក្នុងទិសដៅពីកើតទៅលិច។ លុះ មកដល់ចំណុចកើតហេតុបុរសរូបនេះបានជិះបត់ឆ្វេងត្រឡប់ទៅក្រោយ ហើយក៏អែបទៅកណ្តាលថ្នល់ តែភ្លាមនោះស្រាប់តែមានម៉ូតូ១គ្រឿងទៀតម៉ាកស៊ុយហ្សុយគីនិក ពណ៌ស ពាក់ស្លាកលេខ ភ្នំពេញ1CN-5293 បើកបរដោយបុរសមិនស្គាល់ឈ្មោះម្នាក់ ធ្វើដំណើរស្របទិសគ្នាបានបុកពីក្រោយពេញទំហឹង បណ្តាលឲ្យម្ចាស់ម៉ូតូហុងដា រងរបួសស្រាល ត្រូវដឹកយកទៅព្យាបាលនៅពេទ្យអង្គរធំនៅក្បែរនោះ ហើយភាគីទាំងពីរបានជជែកគ្នាយកត្រូវរៀងៗខ្លួន។
ប៉ុន្តែក្រោយមកទើបភាគីទាំងសង្ខាង ធ្វើការសម្របសម្រួលគ្នានៅក្នុងមន្ទីរពេទ្យអង្គរធំ ដើម្បីបញ្ចប់រឿងដោយមិនរំខានដល់សមត្ថកិច្ចឡើយ ៕
ដោយ៖ ប្រាថ្នា
