ខេត្តកំពង់ឆ្នាំង៖ គោយន្តកន្ត្រៃមួយគ្រឿងដែលដឹកមនុស្សប្រមាណជា២០នាក់ បានរេចង្កូតធ្លាក់ស្រែបណ្តាលអោយមនុស្សចំនួន១១នាក់រងរបួសធ្ងន់ និងស្រាល ។
ហេតុការណ៍គោយន្តកន្ត្រៃក្រឡាប់នេះបានកើតឡើងកាលពីវេលាម៉ោង៤និង៤០នាទីល្ងាច ថ្ងៃទី៤ ខែតុលា ឆ្នាំ២០១៥ នៅក្នុងភូមិព្រៃសំរោង ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង។
នគរបាលចរាចរណ៏ ស្រុករលាប្អៀរបានអោយដឹងថា អ្នកបើកបរគោយន្តកន្ត្រៃនេះមានឈ្មោះអាន សុភា អាយុ២១ឆ្នាំរស់នៅក្នុងភូមិព្រៃសំរោង ឃុំជ្រៃបាក់ កន្លែងកើតហេតុខាងលើ។ នៅថ្ងៃកើតហេតុនេះ ម្ចាស់គោយន្តឈ្មោះម៉ុក ម៉ាស់ បានអោយគោយន្តដឹកចាស់ៗទាំងស្រីទាំងប្រុស ចំនួន២០នាក់ ដឹកយកទៅវត្តដាក់បិណ្ឌ ខ្លុងពពក នៅស្រុកទឹកផុស ។
សមត្ថកិច្ចបានអោយដឹងទៀតថា នៅពេលត្រឡប់មកវិញ ឈ្មោះអាន សុភា មានសភាពស្រវឹង ហើយបានបើកគោយន្តកន្ត្រៃដឹកមនុស្សត្រឡប់មកផ្ទះវិញ នៅពេលដែលកំពុងបើកបរ ត្រឡប់មកវិញ បានផឹកនៅគោយន្តបណ្តើរ ស្រាប់តែមកដល់ជិតផ្ទះ ក៍រេចង្កូតធ្លាក់ស្រែក្រឡាប់គោយន្តជាច្រើនត្រឡប់ បណ្តាលអោយអ្នកជិះនៅលើគោយន្តកន្ត្រៃនេះរងរបួសចំនួន១១នាក់ របួសធ្ងន់ចំនួន៦នាក់ និងស្រាលចំនួន៥នាក់ ក្រោយពេលកើតហេតុ ជនរងគ្រោះត្រូវបានដឹកមកសង្គ្រោះនៅមន្ទីរពេទ្យបង្អែកខេត្តកំពង់ឆ្នាំង ។
ចំណែកឯកអ្នករងរបួសធ្ងន់មួយចំនួនត្រូវដឹកបន្តយកទៅសង្គ្រោះនៅរាជធានីភ្នំពេញ ។ ដោយឡែកគោយន្តកន្ត្រៃនេះ ត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលស្រុករលាប្អៀរ ដើម្បីរង់ចាំធ្វើការដោះស្រាយតាមនីតិវិធី ៕
ដោយ៖ ចន្ថា
