ខេត្តបាត់ដំបង៖ បុរសជាជនបង្កម្នាក់ដែលជាឪពុកក្មេក និងស្ត្រី២នាក់ជាជនរងគ្រោះ ក្នុងនោះមានម្នាក់ជាកូនប្រសាត្រូវបានគ្រូពេទ្យជួយសង្គ្រោះជីវិតគេចផុតពីការស្លាប់ ក្រោយពីបុរសជាជនបង្កដែលជាឪពុកក្មេកបានប្រើអំពើហិង្សាយកចបជីកវាយទៅលើកូនប្រសាស្រី និងប្អូនស្រីកូន ប្រសា ម្នាក់ទៀតបណ្តាលឱ្យរងបួសធ្ងន់ បន្ទាប់មកជនបង្កភ័យខ្លាចសមត្ថកិច្ចចាប់ខ្លួន បានយកកាំបិតចិតបន្លែមកអាកសម្លាប់ខ្លួនឯង បណ្តាលឱ្យរងបួសធ្ងន់ដូចគ្នា។ ក៏ប៉ុន្តែនៅពេលនោះត្រូវបានសមត្ថកិច្ចទៅអន្តរគមន៍ទាន់ ក៏ចាប់ឃាត់ ហើយដឹកបញ្ជូនអ្នកទាំង៣នាក់នោះមកកាន់មន្ទីរពេទ្យដើម្បីសង្គ្រោះជីវិត។
អំពើហិង្សានេះ ត្រូវសមត្ថកិច្ចប្រាប់ឱ្យដឹងថា បង្កឡើងដោយឪពុកក្មេកស្រវឹងស្រារករឿងកូនប្រសា ស្រីមានការឈ្លោះប្រកែកគ្នា ។ ហេតុការណ៍កើតឡើងកាលពីវេលាម៉ោង៤និង១០នាទីល្ងាច ថ្ងៃទី៥ ខែតុលា ឆ្នាំ២០១៥ នៅចំណុចភូមិវត្តរំដួល សង្កាត់ចំការសំរោង ក្រុងបាត់ដំបង ខេត្តបាត់ដំបង។
បុរសជាឪពុកក្មេកជនបង្កមានឈ្មោះ ព្រាប ម៉ាក អាយុ៥០ឆ្នាំ ចំណែកស្ត្រីរងគ្រោះ ទាំង២នាក់មានឈ្មោះ ១,ឡាក់ ស្រីនិច អាយុ២២ឆ្នាំ ជាកូនប្រសា ជនបង្ក ២,ឡាក់ ស្រីពៅ អាយុ១៩ឆ្នាំ ត្រូវជាប្អូនស្រី កូនប្រសា ជនបង្ក គ្រួសារនេះរស់នៅភូមិសង្កាត់ខាងលើ ។
លោកឧត្តមសេនីយ៍ត្រី ជេត វណ្ណី ស្នងការរង និងជាប្រធានការិយាល័យកណ្តាលព្រហ្មទណ្ឌប្រាប់ឱ្យដឹងថា មុនពេលកើតហេតុ គឺប្អូនស្រីកូនប្រសាស្រី ឈ្មោះ ឡាក់ ស្រី ពៅ បានមកពីក្រុងប៉ោយប៉ែត ដើម្បីមកស្នាក់នៅបណ្តោះអាសន្នរកការងារធ្វើ នៅខេត្តបាត់ដំបង ។ លុះបន្ទាប់មក ស្រាប់តែគេឃើញបុរសជាឪពុកក្មេកបានមកដល់ផ្ទះមានអាការៈស្រវឹងជោកជាំ ហើយនិយាយជេរប្រមាថមើលងាយកូនប្រសារ ។ ទន្ទឹមនោះ ដោយប្អូនស្រី ឈ្មោះ ឡាក់ស្រីពៅ ទ្រាំពុំបាននូវការជេរប្រមាថទៅលើបងស្រីរបស់ខ្លួន ក៏បាននិយាយតប ជាមួយជនបង្ក ធ្វើឱ្យជនបង្កខឹងខ្លាំង បានទៅទាញយកចបជីកវាយទៅលើឈ្មោះ ឡាក់ ស្រី ពៅ បណ្តាលឱ្យរងបួសធ្ងន់ ដេកសន្លប់ក្នុងថ្លុកឈាម នៅពេលនោះបងស្រីចូលមកឃាត់ ក៏ត្រូវបានជនបង្កជាឪពុកក្មេកវាយទៀតបណ្តាលឱ្យទទួលរងបួសធ្ងន់នោះផងដែរ ។
ក្រោយពីកើតហេតុភ្លាមជនបង្ក នឹកស្មានថា ស្ត្រីរងគ្រោះស្លាប់ហើយភ័យខ្លាច ក៏ទៅទាញកូនកាំបិត ដើម្បីអារ.កសម្លាប់ខ្លួន ក៏ប៉ុន្តែត្រូវបានសមត្ថកិច្ចទៅទាន់ ហើយចាប់ឃាត់ មិនឱ្យធ្វើអត្តឃាតនោះទេ ។ បន្ទាប់មក ទាំងជនបង្ក និងជនរងគ្រោះទាំង៣នាក់ ត្រូវបានសមត្ថកិច្ចដឹកបញ្ជូនយកទៅសង្គ្រោះជីវិត នៅមន្ទីរពេទ្យទាំងអស់គ្នា។
លោកស្នងការរងប្រាប់ឱ្យដឹងទៀតថា ជនរងគ្រោះ និងជនបង្កទាំង៣នាក់ត្រូវបានគ្រូពេទ្យ ជួយសង្គ្រោះជីវិតរួចហើយ ។ ជនបង្កក្រោយពីធូស្បើយមុខរបួស សមត្ថកិច្ចនឹងនាំខ្លួន យកមកចាត់ការតាមផ្លូវច្បាប់ជាប់ចោទពីបទប្រើអំពើហិង្សាដោយចេតនា ៕
ដោយ៖ សំ វិច្ឆិកា
