ខេត្តបន្ទាយមានជ័យ៖ ជនសង្ស័យគ្រឿងញៀនចំនួន៤នាក់ត្រូវបានកម្លាំងនគរបាលការិយាល័យប្រឆាំងគ្រឿងញៀនខេត្តបន្ទាយមានជ័យចេញប្រតិបត្តិការបង្ក្រាប និងចាប់ឃាត់ខ្លួនបានជាបន្តបន្ទាប់ គ្រាដែលកម្លាំងនគរបាលកំពុងតែរិតបន្តឹងការពារសន្តិសុខសណ្តាប់ធ្នាប់សុវត្ថិភាពជូនប្រជាពលរដ្ឋក្នុងរដូវបុណ្យភ្ជុំបិណ្ឌនេះ ។
កម្លាំងនគរបាលការិយាល័យប្រឆាំងគ្រឿងខេត្ត បង្ក្រាប ជនសង្ស័យគ្រឿងញៀនខាងលើដោយអនុវត្តតាមបទបញ្ជារបស់លោកឧត្តមសេនីយ៍ត្រី អាត់ ខែម ស្នងការនគរបាលខេត្តបន្ទាយមានជ័យ និងកិច្ចសម្របសម្រួលចុះបង្ក្រាបពីលោក ផាន់ វណ្ណរ័ត្ន ព្រះរាជអាជ្ញាអមសាលាដំបូងខេត្តបន្ទាយមានជ័យ ។ អនុវត្តកាលពីរសៀលថ្ងៃទី៥ ខែតុលា ឆ្នាំ២០១៥ នៅក្រុងសិរីសោភ័ណ និងស្រុកថ្មពួកខេត្តបន្ទាយមានជ័យ ។ ជាមួយនិងការចុះបង្ក្រាប សមត្ថកិច្ចឆែកឆេររកឃើញដកហូតបានថ្នាំញៀនមេតំហ្វេតាមីនទឹកកកសរុបចំនួន៧កូនថង់ ស្មើនិង១.៩ក្រាម និងដកហូតបានឧករណ៍សម្ភារៈប្រើប្រាស់ថ្នាំញៀនមួយចំនួនទៀតផង ។
លោកវរសេនីយ៍ទោ ធិន ស៊ិនដេតនាយការិយាល័យនគរបាលប្រឆាំងគ្រឿងញៀន ខេត្តប្រាប់ឱ្យដឹងថា ជនសង្ស័យទាំង៤នាក់មាន១,ឈ្មោះ អៀង ស៊ីវណ្ណា ហៅឆែប ភេទប្រុសអាយុ២៨ឆ្នាំ រស់នៅភូមិសែសិន សង្កាត់អូរអំបិល ក្រុងសិរីសោភ័ណ ២,ស៊ិនបារាំង ភេទប្រុសអាយុ២៣ឆ្នាំ រស់នៅភូមិអណ្តូងផ្លូវ ឃុំគំរូ ស្រុកថ្មពួក ៣,ឡាំ ពិសិដ្ឋ ភេទប្រុស អាយុ២៣ឆ្នាំ រស់នៅភូមិត្រពាំងប្រិយ៍ ឃុំភ្នំដី ស្រុកភ្នំស្រុក និង៤, វ៉ែន វិសាល ភេទប្រុស អាយុ២៨ឆ្នាំ រស់នៅភូមិកណ្តាលលិច ឃុំស្រះជីក ស្រុកភ្នំស្រុក ។
លោកនាយការិយាល័យបានប្រាប់ឱ្យដឹងទៀតថា កម្លាំងនគរបាលការិយាល័យជំនាញ ឈានដល់ការបង្ក្រាបបានជនសង្ស័យបានសម្រេចនៅពេលនេះក្រោយពីកំណត់មុខសញ្ញាជនសង្ស័យរយចហើយ។ មុនដំបូងសមត្ថកិច្ច បានដាក់កម្លាំងតាមដានស្រាវជ្រាវស៊ើបអង្កេត ប្រើប្រាស់កម្លាំងចំហរនិងសម្ងាត់ ។ បន្ទាប់មកសមត្ថកិច្ចបានឃើញជនសង្ស័យឈ្មោះ អៀង ស៊ីវណ្ណា ហៅឆែប កំពុងធ្វើសកម្មភាព លក់ចែកចាយថ្នាំញៀននៅចំណុចផ្លូវលេខ២ ក្នុងក្រុងសិរីសោភ័ណ សមត្ថកិច្ចបង្ក្រាបបានឈ្មោះ អៀង ស៊ីវណ្ណា ដកហូតបានថ្នាំញៀនមេតំហ្វេតាមីនទឹកកកចំនួន៣កូនថង់ ។
សមត្ថកិច្ចសាកសួរជនសង្ស័យរូបនេះ ហើយបានឆ្លើយសារភាពថា រូបគេទិញថ្នាំញៀនពីឈ្មោះ ស៊ិន បារាំង នៅស្រុកថ្មពួក ។ នៅពេលនោះសមត្ថកិច្ចក៏បានទៅបង្ក្រាបបានជនសង្ស័យជួញដូរថ្នាំញៀនយ៉ាងសកម្មឈ្មោះ ស៊ិន បារាំង នៅស្រុកថ្មពួក និងបក្ខពួក២នាក់បន្ថែមទៀត ដកហូតបានថ្នាំញៀនមេតំហ្វេតាមីនទឹកកក ៤កូនថង់ ។
លោកវរសេនីយ៍ទោ ធិន ស៊ិនដេតនាយការិយាល័យនគរបាលប្រឆាំងគ្រឿងញៀន ខេត្តបញ្ជាក់ឱ្យដឹងទៀតថា ជនសង្ស័យជួញដូរថ្នាំញៀនឈ្មោះ ស៊ិន បារាំង ជាមុខសញ្ញា លក់ចែកចាយថ្នាំញៀនយ៉ាងសកម្មនៅស្រុកថ្មពួក ហើយថែមទាំងមានកូនចៅយកបន្តមកលក់ចែកចាយដល់ ក្រុងសិរីសោភ័ណទៀតផង។បច្ចុប្បន្នជនសង្ស័យគ្រឿងញៀនទាំង៤នាក់រួមនិងវត្ថុតាងថ្នាំញៀនកម្លាំងការិយាល័យជំនាញកំពុងតែកសាងសំណុំរឿងចាប់បញ្ជូនទៅកាន់តុលាការ ដើម្បីយកទៅចាត់ការតាមផ្លូវច្បាប ។ ចំណែកបក្ខពួកមេខ្លោងធំនៅពីក្រោយខ្នងរបស់ជនសង្ស័យទាំងនោះនៃការជួញដូរថ្នាំញៀន សមត្ថកិច្ចកំពុងតែស្រាវជ្រាវស្វែងរកចាប់ខ្លួនយកមកផ្តន្ទាទោសតាមផ្លូវច្បាប់បន្ថែមទៀត ៕
ដោយ៖ សំ វិច្ឆិកា
