ខេត្តកំពង់ស្ពឺ៖ យ៉ាងហោចណាស់មនុស្ស៣នាក់រងរបួសជាទម្ងន់ ដោយគ្រោះថ្នាក់ចរាចរណ៍រវាងម៉ូតូសេ១១០ នឹងស្មាសបើកបុកគ្នាពេញទំហឹងនៅលើផ្លូវចំណោតខ្វាត់ខ្វែងលើភ្នំគិរីរម្យ ។ ក្រោយកើតហេតុ អ្នករងរបយសទាំងសងខាងត្រូវបានបញ្ចូនទៅសង្គ្រោះភ្លាមៗផងដែរ ។
គ្រោះថ្នាក់ចរាចរណ៨នេះកើតឡើងនៅវេលាម៉ោង១៧និង២៥នាទីថ្ងៃ ទី៥ ខែតុលា ឆ្នាំ២០១៥ ស្ថិតនៅចំណុចផ្លូវកៅស៊ូគិរិរម្យអន្ទង់អាំង ស្ថិតក្នុងភូមិថ្មី ឃុំចំបក់ ស្រុកភ្នំស្រួច ខេត្តកំពង់ស្ពឺ ។ ជនរងគ្រោះទី១ឈ្មោះ រឿន រដ្ឋ ភេទប្រុស អាយុ២០ឆ្នាំ រស់នៅភូមិទី៥ ឃុំត្រែងត្រយឹង ស្រុកភ្នំស្រួច ជិះម៉ូតូសេ១១០ពណ៌ខ្មៅ ស៊េរី ឆ្នាំ២០០២ អត់ស្លាកលេខ រងរបួសធ្ងន់ ។ ចំណែកភាគីម្ខាងទៀត ជិះគ្នា២នាក់ មានឈ្មោះ ញ៉ ភេទប្រុស អាយុ៣៩ឆ្នាំ អ្នកបើកម៉ូតូ និងអ្នកជិះពីក្រោយឈ្មោះ វង់ ណេម ភេទប្រុសអាយុ៦៣ឆ្នាំ អ្នករងគ្រោះទាំងពីរនាក់ រស់នៅភូមិទី៤ ឃុំត្រែងត្រយឹង ស្រុកភ្នំស្រួច ជិះម៉ូតូស្មាស រីវ៉ូ ពណ៌ខ្មៅ គ្មានស្លាកលេខដូចគ្នា ។
ប្រភពពីសមត្ថកិច្ចស្រង់សំដីសាក្សីបានអោយដឹងថា មុនពេលកើតហេតុគេឃើញម៉ូតូទាំងពីរជិះបញ្ច្រាស់ទិសគ្នាដោយម៉ូតូស្មាសជិះទិសដៅពីលិចមកកើត ចំណែកភាគីម្ខាងទៀតជិះទិសដៅពីកើតមកលិច លុះមកដល់ចមណុចកើតហេតុ ក៏បុកគ្នាពេញទំហឹងបណ្តាលអោយរងរបួសធ្ងន់ទាំងសងខាង ។ ក្រោយកើតហេតុ សមត្ថកិច្ចបានបញ្ជូនជនរងគ្រោះទាំង៣នាក់ទៅកាន់មន្ទីរពេទ្យធ្វើការសង្គ្រោះភ្លាមៗផងដែរ។
សមត្ថកិច្ចនករបាលចរាចរណ៍បានអោយដឹងថា វត្ថុតាងទាំងសងខាងត្រូវបានយកមករក្សាទុកនៅអធិការដ្ឋាននគរបាលស្រុកភ្នំស្រួចរង់ចាំអោយភាគីទាំងពីរចូលខ្លួនមកដោះស្រាយគ្នាតាមសន្តិវិធីបន្ទាប់ពីចេញពីមន្ទីរពេទ្យ ៕
ដោយ៖ សេនាស័ក្តិ
