ខេត្តកណ្តាល៖ យុវជនម្នាក់ស្លៀកពាក់ឯកសណ្ឋានជាសិស្សសាលាបានរងរបួសធ្ងន់ក្នុងករណីរថយន្តកុងតឺន័រមួយគ្រឿងបើកកៀរម៉ូតូបណ្តាលឲ្យដួលនៅចិញ្ចើមផ្លូវ ចំណែករថយន្តកុងតឺន័របើកគេចបាត់ ។
ករណីគ្រោះថ្នាក់ចរាចរ នេះបានកើតឡើងនៅវេលាម៉ោង៨និង១០នាទីយប់ ថ្ងៃទី៥ ខែតុលា ឆ្នាំ២០១៥ នៅលើផ្លូវជាតិលេខ១ ចន្លោះគីឡូម៉ែត្រលេខ២០-២១ ក្នុងភូមិស្លាបតាអោន ឃុំគគីរ ស្រុកកៀនស្វាយ ខេត្តកណ្តាល ។
ជនរងគ្រោះ ជិះម៉ូតូម៉ាក គុប ជ្រុងពណ៍ទឹកប៊ិច តែម្នាក់ឯង មានវ័យជាង ២០ ឆ្នាំ ស្លៀកពាក់ឯកសណ្ឋាន ជា សិស្សសាលា ទំនងទើបនិង ចេញពីរៀនត្រឡប់ទៅផ្ទះវិញ ក៏ជួបគ្រោះថ្នាក់ចរាចរតែម្តង ។
សាក្សីនៅកន្លែងកើតហេតុ បានអោយដឹងថា មុនពេល គ្រោះថ្នាក់ជនរងគ្រោះជិះម៉ូតូតែម្នាក់ឯងក្នុងទិសដៅពីភ្នំពេញទៅកៀនស្វាយ មកដល់ចំនុចគ្រោះថ្នាក់ស្រាប់តែមានរថយន្តកុងតឺន័រមួយគ្រភងបើកមកពីក្រោយហើយកៀរម៉ូតូជនរងគ្រោះបណ្តាលអោយដួលនៅលើចិញ្ចើមផ្លូវរងរបួសធ្ងន់ ។ បន្ទាប់ពីបង្ក ហេតុរថយន្តកុងតឺន័របានបើកគេចបាត់ ចំណែកជនរងគ្រោះត្រូវបានប្រជាពលរដ្ឋនាំគ្នាជួយសង្គ្រោះ ហៅរថយន្តរបស់មន្ទីរ ពេទ្យបង្អែកកៀនស្វាយដឹកយកមកសង្គ្រោះនៅមន្ទីរពេទ្យកាល់ម៉ែត ៕
ដោយ៖ សណ្តោស
