ភ្នំពេញ៖ នៅរសៀលថ្ងៃទី៧ ខែតុលា ឆ្នាំ២០១៥ នៅវិមានសន្តិភាព សម្តេចតេជោ ហ៊ុន សែន បានជួបពិភាក្សាការងារជាមួយ លោក Somsavat Lengsavad ឧបនាយករដ្ឋមន្ត្រីទទួលបន្ទុកសេដ្ឋកិច្ច នៃសាធារណរដ្ឋប្រជាធិបតេយ្យប្រជាមានិតឡាវ ដើម្បីពង្រឹងនិងពង្រីកទំនាក់ទំនងរវាងប្រទេសទាំងពីរ ជាពិសេស លោកបានរាយការណ៏ជូន សម្តេចតេជោ អំពីការអភិវឌ្ឍទំនប់វារីអគ្គីសនី Donsahong ។
លោក បានជម្រាបជូន សម្តេចតេជោ ថា ទំនប់នេះនឹងមិនមានការសាងសង់ឡើយ ប្រសិនបើការសាងសង់នោះមានផលប៉ះពាល់ដល់កម្ពុជា និងវៀតណាម។
ជាការឆ្លើយតប សម្តេចតេជោ ហ៊ុន សែន បានគាំទ្រចំពោះគោល នយោបាយអភិវឌ្ឍន៏របស់ប្រទេសឡាវ។ ប៉ុន្តែចំពោះទំនប់វារីអគ្គីសនីDonsahong សម្តេចតេជោ បានស្នើសុំឲ្យប្រទេសទាំងពីរបង្កើតគណៈកម្មការដែលមានការចូលរួមពីសមាសភាពក្រសួងធនធានទឹក
ក្រសួងបរិស្ថាន និង គណៈកម្មការទន្លេមេគង្គ ដើម្បីធើ្វការសិក្សាលម្អិតមួយអោយបានច្បាស់លាស់ អំពីផលប៉ះពាល់ទាំងឡាយ រួមទាំងបញ្ហាប្រព័ន្ធអេកូឡូស៊ី (Ecology) ជាដើម។
លោក Somsavat Lengsavad បានយល់ស្រប និងបានថ្លែងអំណរគុណចំពោះ សម្តេចតេជោ ហ៊ុន សែន ដែលបានជំរុញអោយបង្កើតក្រុមការងារនៃប្រទេសទាំងពីរដើម្បីសិក្សាលម្អិតលើបញ្ហានិងផលប៉ះពាល់នានាក្នុងការសាងទំនប់វារីអគ្គីសនី ដើម្បីចៀសវាងបញ្ហានៅពេលក្រោយ ៕
