ភ្នំពេញ៖ ហេតុការណ៍គ្រោះថ្នាក់ចរាចរណ៍រវាងម៉ូតូ២គ្រឿងបានបើកបុកគ្នាត្រង់ចំណុចផ្លូវបំបែក​បណ្តាលឲ្យរងការខូចខាតយ៉ាងដំណំ តែសំណាងរងរបួសស្រាល ។

ហេតុការណ៍នេះបានកើត​ឡើងកាលពីវេលាម៉ោង៩និង០៥នាទីយប់ ថ្ងៃទី៧ ខែតុលាឆ្នាំ២០១៥ នៅចំណុចស្ថានីយ៍ប្រេង ឥន្ទនះតេលា តាមបណ្តោយផ្លូវវេងស្រេង ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ ។

​តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញយុវជន​ម្នាក់ជិះម៉ូតូFTR ពណ៌សលាយក្រហម ពាក់ស្លាកលេខភ្នំពេញ1FA-4485 ធ្វើដំណើរតាមបណ្តោយផ្លូវវេងស្រេង ក្នុងទិសដៅពីលិចទៅកើត ខណៈមកដល់ចំណុចកតើ​តហេតុបានទាញចង្កូតបត់ឆ្វេងទៅជើងតាមបណ្តោយផ្លូវបេតុង ភ្លាមនោះក៏មានយុវជនម្នាក់​ទៀតជិះម៉ូតូម៉ាកហុងដាសេ១២៥ ពណ៌ខ្មៅ ពាក់ស្លាកលេខភ្នំពេញ1AL-6639 ដោយធ្វើដំណើរ​តាមបណ្តោយផ្លូវវេងស្រេង ក្នុងទិសដៅពីកើតទៅលិចក្នុងល្បឿនលឿនដោយចាប់ហ្វ្រាំងមិន​ទាន់ក៏ជ្រុលបុកចំពីចំហៀងពេញទំហឹងបណ្តាលឲ្យរងការខូចខាតបាក់កង់ខាងមុខ​ចំណែក​អ្នកបើកបររងរបួសស្រាល ។

​ក្រោយពេលកើតហេតុភាគីទាំងសងខាងបានធ្វើការសម្របសម្រួលដោយភាគីខាងម្ចាស់ម៉ូតូFTRចេញថ្លៃខូចខាតទៅលើភាគីខាងម្ចាស់ម៉ូតូហុងដា ដើម្បីបញ្ចប់រឿងដោយមិនចង់​មានរឿងវែងឆ្ងាយ ៕

ដោយ៖ សុខា សែនជ័យ