ភ្នំពេញ៖ ហេតុការណ៍ដ៏រន្ធត់មួយបង្កឡើងដោយសារតែរថយន្តក្រឡុកស៊ីម៉ងរបស់ក្រុមហ៊ុនCLTKបានបើក​បត់ឆ្លងផ្លូវមិនប្រយ័ត្នក៏ជ្រុលបុកនិងកិនម៉ូតូមួយគ្រឿងបណ្តាលឲ្យបុរសម្នាក់​ស្លាប់ភ្លាមៗយ៉ាងអានោចអាធម៍ ។

​ហេតុការណ៍នេះបានកើតឡើងកាលពីវេលាម៉ោង៩និង១០នាទីយប់ ថ្ងៃទី៧ ខែតុលា ឆ្នាំ២០១៥ នៅចំណុចមុខក្រុមហ៊ុនCLTK តាមបណ្តោយផ្លូវវេងស្រេង ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ ។ ជនរងគ្រោះឈ្មោះសុខ វិសាល ភេទប្រុស អាយុជាង២០ឆ្នាំ ស្នាក់នៅភូមិអូអណ្តូង ឃុំបាគូ​រ ស្រុកកណ្តាលស្ទឹង ខេត្តកណ្តាល ។

​តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញជនរងគ្រោះជិះ​ម៉ូតូម៉ាកហុងដាសេ១២៥ សេរីឆ្នាំ២០១៥ ពណ៌ខ្មៅពាក់ស្លាកលេខភ្នំពេញ1CM-7043 ធ្វើដំណើរតាមបណ្តោយផ្លូវជាតិលេខ៣ ក្នុងទិសដៅពីជើងទៅត្បូង ខណៈមកដល់ចំណុចកើតហេ​តុស្រាប់ តែមានរថយន្តក្រឡុកស៊ីម៉ងរបស់ក្រុមហ៊ុន CLTK ពណ៌សឆ្នូតក្រហម ពាក់ស្លាកលេខភ្នំពេញ​1B-9655 ធ្វើដំណើរបត់ឆ្លងផ្លូវដោយបញ្ជ្រាសទិសគ្នា ហើយបានជ្រុលបុកនិងកិនបណ្តាលឲ្យអ្នកជិះ​ម៉ូតូបែកក្បាលចេញខួស្លាប់ភ្លាមៗនៅកន្លែងកើតហេតុតែម្តង ចំណែកម្ចាស់រថយន្តបានចុះពីរថយន្តគេចខ្លួនបាត់ដោយបន្សល់ទុករថយន្តនៅកន្លែងកើតហេតុ ។

​ក្រោយពេលកើតហេតុសមត្ថកិច្ចមូលដ្ឋានបានចុះមកដល់ចំណុចកើតហេតុនិងសហកាជាមួយ​ជំនាញធ្វើការវាស់វែងយករថយន្តនិងម៉ូតូទៅរក្សាទុកនៅការិយាល័យចរាចរណ៍ជើងគោកដើម្បីដោះស្រាយតាមផ្លូវច្បាប់ ចំណែកសពត្រូវបានសមត្ថកិច្ចទំនាក់ទំនងហៅក្រុមគ្រួសារមកទទួលយកទៅធ្វើ​បុណ្យតាមប្រពៃណីនៅស្រុកកំណើត ៕

ដោយ៖ សុខា សែនជ័យ