ខេត្តក្រចេះ៖ ជនសង្ស័យពីរនាក់ប្តីប្រពន្ធ ត្រូវបាននគរបាលស្រុកឆ្លូង ដោយមានការសហការណ៍ជាមួយប្រជាពលរដ្ឋ ប្រដេញស្ទាក់ចាប់បានម្នាក់ ជាប្រពន្ធ ចំណែកបុរសជាប្តីជិះម៉ូតូគេចខ្លួនបាត់ ក្រោយពីជនសង្ស័យពីរនាក់ប្តីប្រពន្ឋ បានជិះម៉ូតូរបស់ខ្លួនឌុបគ្នា ដើរធ្វើសកម្មភាពលួចម៉ូតូរបស់ប្រជាពលរដ្ឋតាមចំការ។
ក្រោយពីចាប់ឃាត់ខ្លួនរួចមកស្ត្រីម្នាក់នេះ ត្រូវបានកម្លាំងនគរបាលធ្វើការសាកសួរ និងបញ្ជូនខ្លួនបន្ត មកកាន់ការិយាល័យព្រហ្មទណ្ឌកំរិតស្រាលខេត្ត នៅព្រឹកថ្ងៃទី៨ខែតុលានេះ ដើម្បីមានចំណាត់ការបន្ត។
ស្ត្រីជាជនសង្ស័យម្នាក់នេះឈ្មោះ ជុន លុច អាយុ២៤ឆ្នាំ រស់នៅភូមិត្រពាំងសោម ឃុំកណ្តុរជ្រុំ ស្រុកពញាក្រែក ខេត្តត្បូងឃ្មុំ ចំណែកបុរសជាប្តីដែលកំពុងរត់គេចខ្លួន ឈ្មោះ ផា អាយុ២៥ឆ្នាំ រស់នៅចំនុចគីឡូ៧៥ ផ្លូវសាមលិញ ក្នុងឃុំស្រែចារ ស្រុកស្នួល ខេត្តក្រចេះ។
លោកវរៈសេនីយ៍ឯក គុណ សុភ័ណ្ឌ នាយការិយាល័យព្រហ្មទណ្ឌកំរិតស្រាលខេត្តបានឱ្យដឹងថា នៅរសៀល ថ្ងៃទី៦ខែតុលា ជនសង្ស័យពីរនាក់ប្តីប្រពន្ឋមួយគូរនេះ បានជិះម៉ូតូស្កុបពីរបស់ខ្លួន ឌុបគ្នាដើរធ្វើសកម្មភាពលួចម៉ូតូរបស់ប្រជាពលរដ្ឋតាមវាលចម្ការ ។ លោកថា ពេលជននេះជិះមកដល់ចំនុច វាលចម្ការក្នុងឃុំដំរីផុង ស្រុកឆ្លូង ជនសង្ស័យបានធ្វើសកម្មភាពលួចម៉ូតូ មួយគ្រឿងម៉ាកវ៉េវអាល់ហ្វា ខណៈដែលម្ចាស់ទុកចោលនៅមុខចម្ការ ។
លោកនាយការិយាល័យបានបន្តថា ក្រោយពីលួចបានហើយនោះ ស្ត្រីជាប្រពន្ឋបានជិះម៉ូតូដែលពួកគេលួចបាននេះរត់គេចខ្លួន ចំណែកបុរសជាប្តីជិះម៉ូតូស្កុបពីរបស់ខ្លួនតាមពីក្រោយ លុះមកដល់ចំនុចកំពង់ចម្លង ដីកាប់មាត់ព្រែកឆ្លូង ស្ថិតក្នុងភូមិប្រម៉ា ឃុំដំរីផុង ស្រុកឆ្លូង ត្រូវបានសមត្ថកិច្ចស្ទាក់ចាប់បាន ចំណែកបុរសជាប្តីជិះម៉ូតូគេចខ្លួនបាត់។
តាមចម្លើយសារភាព របស់ជនសង្ស័យបាននិយាយប្រាប់សមត្ថកិច្ចថា កន្លងមករូបគេរួមនិងបុរសជាប្តី ឈ្មោះ ផា បានធ្វើសកម្មភាពលួចម៉ូតូរបស់ពលរដ្ឋជាច្រើនលើកមកហើយ។
លោកនាយការិយាល័យបានបញ្ជាក់ថា ស្ត្រីជាជនសង្ស័យម្នាក់នេះ និងត្រូវបញ្ជូនខ្លួនបន្តទៅកាន់សាលាដំបូងខេត្ត នៅរសៀលថ្ងៃទី៨ខែតុលានេះ ដើម្បីមានចំណាត់ការបន្ត ចំណែកជនសង្ស័យម្នាក់ទៀតដែលកំពុងរត់គេចខ្លួននោះ គឺសមត្ថកិច្ចនិងស្រាវជ្រាវ ស្វែងរកចាប់ខ្លួនផងដែរ ៕
ដោយ៖ កោះទ្រុង
