ខេត្តកណ្តាល៖ រថយន្តធុនធំបែនដឹកដីបើកបោះពួយបុកម៉ូតូបើកបរបញ្ច្រាស់ទិសគ្នា បណ្តាលឲ្យ​មនុ​ស្ស២នាក់រងរបួសធ្ងន់ស្រាល កាលពីវេលាម៉ោង០៦ និង៤៥នាទី ថ្ងៃទី០៩ ខែតុលា ឆ្នាំ២០១៥ នៅលើកំណាត់ផ្លូវជាតិលេខ២ ត្រង់ចំណុចចន្លោះគីឡូម៉ែត្រលេខ២៧-២៨ ស្ថិតក្នុងភូមិព្រែកស្លែង ឃុំព្រែកស្លែង ស្រុកកណ្តាលស្ទឹង ។

រថយន្តបង្កម៉ាកហ៊ីយ៉ាន់ដាយ ពណ៌លឿង ពាក់ស្លាកលេខភ្នំពេញ3-B2797 ជាប្រភេទរថយន្តបែនដឹកដី បើកបរដោយជនមិនស្គាល់អត្តសញ្ញាណ ក្រោយពីកើតហេតុបានរត់គេចខ្លួនបាត់ស្រមោល ។ ជនរងគ្រោះឈ្មោះ នូ ចាន់រ៉ា ភេទប្រុស អាយុ១៩ឆ្នាំ ជាអ្នកបើកបរម៉ូតូរងរបួសធ្ងន់ ម្នាក់ទៀតឈ្មោះ នូ ចាន់រិទ្ធ អាយុ១៧ឆ្នាំ ជាបងប្អូនបង្កើតនឹងគ្នាមានទីលំនៅក្នុងភូមិកំពង់តាឡុង ឃុំបឹងខ្យាង ស្រុកកណ្តាលស្ទឹង ជិះម៉ូតូម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខភ្នំពេញ1Y-4452 ។

សាក្សីនិយាយថា នៅមុនពេលកើតហេតុគេបានឃើញរថយន្តបង្កបើកបរតាមបណ្តោយ​ផ្លូវជាតិលេខ២ក្នុងទិសដៅពីត្បូងទៅជើងដោយល្បឿនលឿន ខណៈបើកដល់ចំណុចកើតហេតុបានជ្រុលទៅបុកម៉ូតូដែលបើកបរក្នុងទិសដៅបញ្ច្រាស់ទិសគ្នា បណ្តាលឲ្យមនុស្ស២នាក់ជិះលើម៉ូតូរងរបួសយ៉ាងធ្ងន់ធ្ងរ ។

ក្រោយពីមានហេតុការណ៍កើតឡើងជនរងគ្រោះ ត្រូវបានបញ្ជូនទៅសង្រ្គោះនៅមន្ទីរពេទ្យប្រតិ​បត្តិស្រុកកណ្តាលស្ទឹង ។ ដោយឡែករថយន្ត និងម៉ូតូត្រូវបានបញ្ជូនយកទៅរក្សាទុកនៅអធិការដ្ឋាននគរបាលស្រុក ដើម្បីចាត់ការតាមច្បាប់ ៕

ដោយ៖ ស្អាងជ័យ