Abu Dhabi ៖ តាមសេចក្តីរាយការណ៍ ពីមហាសន្និបាត គណៈកម្មាធិការប៉ារ៉ាឡាំពិកអន្តរជាតិIPC ដែលប្រព្រឹត្តិទៅកាលពីថ្ងៃទី៥ដល់ទី៨ ខែកញ្ញា ឆ្នាំ២០១៧ នៅទីក្រុង Abu Dhabi UAE លោក Andrew Parsons ត្រូវបានសមាជិកគណៈកម្មាធិការប៉ារ៉ាឡាំពិកអន្តរជាតិ(IPC) បានផ្តល់សេចក្តីទុកចិត្ត តាមរយៈការបោះឆ្នោត បន្ទាប់ពីលោកសឺ ហ្វីលីពក្រេវិន (Sir Philip Craven) បានកាន់តំណែងជាប្រធានIPCអស់រយៈពេល១៦ឆ្នាំកន្លងទៅ ហើយលោកក៏សុំលាឈប់ ។
លោក យី វាសនា អគ្គលេខាធិការ គណៈកម្មាធិការប៉ារ៉ាឡាំពិកកម្ពុជា បានប្រាប់តាម រយៈសារអេឡិចត្រូនិកថា មហាសន្និបាត គណៈកម្មាធិការប៉ារ៉ាឡាំពិកអន្តរជាតិ នៅទីក្រុង Abu Dhabi UAE ឲ្យដឹងថា មហាសន្និបាត និងកិច្ចប្រជុំពាក់ព័ន្ធមួយចំនួនទៀត បានបញ្ចប់ ប្រកដដោយភាពជោគជ័យ និងមានការពីសមាជិក NPC ចំនួន១៧៧ប្រទេស សហពន្ធ័កីឡាជនពិការអន្តរជាតិចំនួន ៧០ សមាជិកតំណាងតំបន់ចំនួន៤ និង អង្គការកីឡាខ្នាតអន្តរជាតិចំនួន៣០ផ្សេងទៀត ។
លោកអគ្គលេខាធិការ បានបន្តថាបន្ទាប់ពីការកាន់តំណែងតាមរយៈជាប់ឆ្នោត ចំនួន១៦ឆ្នាំកន្លងមក លោក សឺ ហ្វីលីពក្រេវិន (Sir Philip Craven) បានសម្រេចសុំផ្អាកពីការងារជាប្រធាន IPC ។ សន្និបាតនេះ បានបោះឆ្នោត តាមច្បាប់ IPC គឺ៤ឆ្នាំម្តង ដើម្បី ជ្រើសរើស ប្រធាន អនុប្រធាន និង សមាជិក១០នាក់ ជាសមាជិកក្រុមប្រឹក្សាភិបាលរបស់IPC ។
លោក យី វាសនា បានបញ្ជាក់ថា តាមរយៈការបោះឆ្នោយ ម៉ាស៊ីស្វ័យប្រវត្តិកម្ម លោក Andrew Parsons ជនជាតិប្រេស៊ីលជាប់ជាប្រធានIPCក្នុងអាណត្តិថ្មីនេះ ។ លោក Duane Kale ជនជាតិញូស៊ីឡែន អនុប្រធានIPC និងសមាជិក១០នាក់ទៀត គឺអ្នកស្រី Debra Alexander ជនជាតិអាហ្វ្រិកខាងត្បូង អ្នកស្រី Marianna​Muffy​​ Davis ជនជាតិអាមេរិក អ្នកស្រី Rita van Adriel ជនជាតិហូឡង់ លោក Sung II Kim ជនជាតិកូរ៉េខាងត្បូង លោក Luca Pancaklli ជនជាតិអ៊ីតាលី លោក Mohammed Alhanmell ជនជាតិ អារ៉ាប់អាម៉ារ៉ាត លោក Leonel da Richard Pinto ជនជាតិអាហ្វ្រិក លោក Tim Redish ជនជាតិអង់គ្លេស លោក Juan Pablo Salazar ជនជាតិកូឡុំប៊ែ និងលោក Yasushi Yamavaki ជនជាតិជប៉ុន ។
លោកបន្ថែមថា ក្រោយបញ្ចប់ការបោះឆ្នោត ជ្រើសរើសមេដឹកនាំ និងសមាជិកក្រុមប្រឹក្សាភិបាល គណៈកម្មាធិការប៉ារ៉ាឡាំពិកអន្តរជាតិ (IPC) អង្គមហាសន្និបាតបានរាយការណ៍ ពីបច្ចុប្បន្នភាព ស្តីពីលទ្ធផលការងារ របស់ IPC ដូចជា ការសម្តែងការកោតសរសើរនិងវាយតម្លៃខ្ពស់ ក្នុងការរៀបចំព្រឹត្តិការណ៍ ប្រកួតកីឡាប៉ារ៉ាឡាំពិកពិភពលោក នៅទីក្រុងរីយ៉ូប្រទេសប្រេស៊ីលបានលក់សំបុត្របានចំនួន ២.១៥លានសន្លឹក ។ ការប្រកួតកីឡាប៉ារ៉ាឡាំពិកពិភពលោករដូវរងារ នឹងរៀបចំ នៅសាធារណៈរដ្ឋកូរ៉េ នាខែមិនាឆ្នាំ២០១៨ និងប្រទេសចិន នាខែកញ្ញាឆ្នាំ២០២២ ។ ការប្រកួតកីឡាប៉ារ៉ាឡាំពិកពិភពលោករដូវក្តៅ នឹងរៀចំ នៅទីក្រុងតូក្យូ ប្រទេសជប៉ុន ឆ្នាំ២០២០ និងបេក្ខភាពម្ចាស់ផ្ទះ ប្រទេសបារាំង ឆ្នាំ២០២៤ និងសហរដ្ឋអាមេរិកឆ្នាំ២០២៨ ។ ក្នុងនោះសមាជិកពេញសិទ្ធិ របស់IPC បានសម្រេចដាក់ប្រទេសចំនួន៥ ស្ថិតក្នុងការតាមដាន ដោយមានបញ្ហាគ្រឿងញៀន និងមិនបានបង់ប្រាក់សមាជិកភាព និងលុបចោលសមាជិកភាពប្រទេសចំនួន១ និងបានទទួលយកសមាជិកថ្មីបន្ថែមផងដែរ ៕

ដោយ៖ សារីម