ទីក្រុងប៉េកាំង៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានទទួលជួបពិភាក្សាការងារជាមួយលោក Wang Jianui រដ្ឋមន្ត្រីគណៈទាក់ទងអន្តរជាតិ នៃ បក្សកុម្មុយនីស្តចិន ។
ក្នុងជំនួបពិភាក្សាដែលធ្វើឡើងមុនពិធីទទួលទានអាហារ ពេលរាត្រី លោក Wang Jianui មានប្រសាសន៍សម្តែងនូវការស្វាគមន៍យ៉ាងកក់ក្តៅបំផុតចំពោះវត្ត មានរបស់សម្តេចតេជោ នាយករដ្ឋមន្ត្រី និងគណៈប្រតិភូជាន់ខ្ពស់រាជរដ្ឋាភិបាលកម្ពុជា ដែលបានអញ្ជើញមកកាន់ក្រុងប៉េកាំង ប្រទេសចិន សាជាថ្មីម្តងទៀត ដើម្បីចូលរួមសន្និសីទពិសេសរបស់គណបក្សនយោបាយនៅអាស៊ីស្តីពីផ្លូវសូត្រ។
លោករដ្ឋមន្ត្រីគណៈទាក់ទងអន្តរជាតិនៃបក្សកុម្មុយនីស្តចិនមានប្រសាសន៍បន្តថា នេះគឺជាលើកទី៣ហើយដែលលោកបានជួបពិភាក្សាបន្ទាប់ពីជំនួបលើក ទី២នៅទីក្រុងសៀងហៃកាលពីខែវិច្ឆិកាឆ្នាំ២០១៤កន្លងទៅ ។ លោកបន្តទៀតថា ការជួបពិភាក្សាជាមួយសម្តេចនៅ ពេលនេះ គឺដើម្បីបង្កើននូវភាពស្និទ្ធស្នាល និងដើម្បីកិច្ចការលើគ្រប់វិស័យសម្រាប់ប្រទេសទាំងពីរ ដោយសារតែកម្ពុជា ចិន គឺជាប្រទេសយុទ្ធសាស្ត្រ គ្រប់ជ្រុងជ្រោយ ហើយការជួបគ្នានៅពេលនេះ គឺដើម្បីធ្វើឡើងមុនជំនួបរវាងសម្តេចតេជោនាយករដ្ឋមន្ត្រី ជាមួយនឹងឯកឧត្តមប្រធានាធិបតីចិន ស៊ី ជិនពីង នៅថ្ងៃទី១៥តុលា ខាងមុខ ។
ក្នុងជំនួបពិភាក្សាគ្នានោះដែរ សម្តេចតេជោនាយករដ្ឋមន្ត្រី និងលោក Wang Jianui បានធ្វើការពិភាក្សាគ្នាយ៉ាងយកចិត្តទុកដាក់ពិសេស ការផ្លាស់ប្តូរនូវបទពិសោធន៍ពីគ្នាទៅវិញទៅមក អំពីសភាពការណ៍តំបន់ សន្តិសុខ ពោលគឺពាក់ព័ន្ធទៅនឹងសភាពការណ៍នៃការវិវត្តថ្មីរបស់ពិភពលោក។
ជាការឆ្លើយតបសម្តេចតេជោនាយករដ្ឋមន្ត្រី មានប្រសាសន៍ថ្លែងនូវអំណរគុណយ៉ាងជ្រាលជ្រៅបំផុត ជូនចំពោះរដ្ឋាភិបាលនិងប្រជាជនចិន ដែលជានិច្ចកាលតែងតែជួយដល់ការអភិវឌ្ឍរបស់ប្រទេសកម្ពុជាឡើងវិញ។ សម្តេចតេជោបន្តថា ការរីកចម្រើនរបស់កម្ពុជានៅពេលបច្ចុប្បន្នគឺមិនអាចកាត់ផ្តាច់ចេញ ពីការផ្តល់ ជំនួយឥតសំណង និងកម្ចីសម្បទានរបស់ប្រទេសចិននោះទេ ដូច្នេះបានបង្ហាញឱ្យឃើញថា ប្រទេសចិន បានរួមចំណែកយ៉ាសកម្មដល់ការជំរុញកំណើនសេដ្ឋកិច្ច និងការអភិវឌ្ឍរបស់ប្រទេសកម្ពុជាឡើងវិញ ។
ក្នុងជំនួបពិភាក្សាគ្នានោះដែរ សម្តេចតេជោនាយករដ្ឋមន្ត្រីនិងលោក Wang Jianui បានពិភាក្សាគ្នាយ៉ាងយកចិត្តទុកដាក់ក្នុងខិតខំប្រឹងប្រែងធ្វើយ៉ាងណា ជំរុញកំណើននៃទំហំពាណិជ្ជកម្មនៃប្រទេសទាំងពីរកម្ពុជា- ចិនឱ្យកើនឡើងរហូតដល់៥ពាន់លានដុល្លារអាម៉េរិក នៅឆ្នាំ២០១៧ ដែលប្រមុខថ្នាក់ដឹកនាំនៃប្រទេសទាំងពីរបានសន្យារួមគ្នានាពេលកន្លងមក ។
បន្ទាប់ពីបញ្ចប់កិច្ចសន្ទនាគ្នារួចមក សម្តេចអគ្គមហាសេនាបតីតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា និងលោក Wang Jianui រដ្ឋមន្ត្រីគណៈទាក់ទងអន្តរជាតិនៃបក្សកុម្មុយនីស្តចិន និងថ្នាក់ដឹកនាំនៃប្រទេសទាំង២ អញ្ជើញចូលរួមក្នុងពិធីទទួលទានអាហារពេលរាត្រី ក្នុងបរិយាកាសស្និទ្ធស្នាលរាក់ទាក់បំផុត ៕
