ភ្នំពេញ៖ អស់ជាច្រើនខែកន្លងមកហើយដែលចំណងស្នេហារវាងតារាសម្តែងមេម៉ាយចាយរាង សុខ សោម៉ាវត្តី និងកីឡាករបាល់ទាស់ស្រស់សង្ហា លី វ៉ាហេទ បានបើកចំហរខ្លាំងបើទោះបីជាពួកគេមិនដែលទទួលស្គាល់នៅឡើយថាជាចំណងស្នេហា។ រូបភាពផ្អែមល្ហែមរបស់អ្នកទាំងពីរកាន់តែធ្វើឲ្យគេដឹងថាពួកគេកំពុងសាងនូវភាពរឹងមាំមួយពិបាកនឹងបែកគ្នាបាន។
ទំនាក់ទំនងស្នេហារវាងតារាសម្ដែងល្បីឈ្មោះអ្នកនាង សុខ សោម៉ាវត្តី និងខ្សែការពារជម្រើសជាតិលោក លី វ៉ាហេទ បន្ទាប់ពីអ្នកនាងទាំងពីមានឱកាសថតរឿង «ខូចចិត្តអាជីព» ជាមួយគ្នាកាលពីប៉ុន្មានខែមុននេះ។ លោក លី វ៉ាហេទ ដែលត្រូវគេស្គាល់ថាជាកីឡាករល្បីឈ្មោះម្នាក់នៅក្នុងពិភពបាល់ទាត់ធ្លាប់បានអះអាងថា លោក និងអ្នកនាងសុខ សោម៉ាវត្តី ពិតជាកាន់តែស្និទ្ធិស្នាលគ្នា ដែលអ្នកណាក៏មិនឃើញថាមិនខុសពីគូស្នេហ៍នឹងគ្នាមែន តែលោកប្រកាសថាអ្វីៗនៅមិនទាន់ប្រាកដនោះទេគឺលុះត្រាតែរង់ចាំពេលវេលាបន្តបន្ទាប់។ការឧស្សាហ៍ទៅណាមកណាជាមួយគ្នាទើបទំនាក់ទំនងជិតស្និទ្ធិបានកើតមានឡើង ហើយអាចចាត់ទុកថាគឺជាជំហាននៃការសិក្សាពីគ្នាទៅវិញទៅមក។ យ៉ាងណាមិញ លោកថាមិនទាន់គិតដល់ពីរឿងស្នេហានោះទេ គឺគ្រាន់តែលោកទទួលស្គាល់មានអារម្មណ៍ចូលចិត្តចំពោះអ្នកនាងលើសពីនារីដែលលោកបានស្គាល់ផ្សេងទៀតប៉ុណ្ណោះ។
លោកថាមិនមានហេតុផលប្រកាន់រឿងអ្នកនាងមានកូន និងធ្លាប់មានស្វាមីនោះទេ ដោយអ្វីដែលសំខាន់គឺលោករង់ចាំមើលពេលវេលាសិនថាវានឹងប្រែក្លាយទំនាក់ទំនងរបស់លោក និងអ្នកទៅដល់ចំណុចណា។ លោកសារភាពថាអ្នកនាង សុខ សោម៉ាវត្តី គឺជានារីតែម្នាក់ដែលលោកស្និទ្ធិស្នាលលើពីមិត្តភាពធម្មតា ហើយបើទោះជាអ្នកនាងអាយុបងក៏លោកយល់ថានោះមិនមានជាឧបសគ្គដែលលោកមិនអាចរាប់អានអ្នកនាងបានដែរ។ សុខ សោម៉ាវត្តី ធ្លាបបានសារភាពថា រវាងអ្នកនាង និង កីឡាករខ្សែប្រយុទ្ធក្នុងក្រុមជម្រើសជាតិ លោក លី វ៉ាហេទ ពិតជាមានទំនាក់ទំនងនឹងគ្នាច្រើនឡើង ប៉ុន្តែអ្នកនាងបានចាត់ទុកថាអ្វីៗដែលបានកើតឡើងគឺមិត្តភាពមិនខុសគ្នាពីអ្នកនាងមិត្តស្និទ្ធិស្នាលផ្សេងទៀតនោះទេ។
ការរួមដំណើរជាមួយគ្នាចេញទៅកម្សាន្តទីកន្លែងផ្សេងៗ រូបភាពសំលៀកបំពាក់គូស្នេហ៍សារផ្អែមល្ហែមចំពោះគ្នាទៅវិញទៅមកពិបាកនឹងប្រកែកបានទេថា ពួកគេកាន់តែផ្អែមល្ហែម ហើយវាជាស្នេហាពិតមិនមែនជាស្នេហាលេងសើច។ ដំណឹងចុងក្រោយដែលលេចចេញគឺក្រុមគ្រួសារទាំងសងខាងសុទ្ធតែបានដឹងលឺនិងទទួលស្គាល់ថាពួកគេពិតជាស្រលាញ់គ្នាដោយចិត្តនិងចិត្ត គឺនៅតែថ្ងៃសម្រេចចិត្តទទួលគ្នាជាប្តីប្រពន្ធប៉ុណ្ណោះ។
ប្រសិនបើពួកគេសម្រេចចិត្តចូលរោងការមែនគឺ ពួកគេនឹងក្លាយជាគូស្នេហាខុសវ័យភាគីខាងស្រីវ័យច្រើនជាងបន្ទាប់ពីអ្នកនាងខាត់ សុឃីម អ្នកនាងកាតុ អ្នកនាងគង់ សុជាតិ និង អ្នកនាងឆៃ លីដាឡែនជាដើម៕
ដោយ៖ វឌ្ឍនា
