ការសម្រេចចិត្ដជ្រើសរើសអត្ដពលិកតាមបែបវិទ្យាសាស្ដ្រដើម្បីអភិវឌ្ឍឆ្ពោះទៅឆ្នាំ២០២៣

ចែករំលែក៖

ភ្នំពេញ៖ ការសម្រេចចិត្ដជ្រើស រើសកីឡាករកីឡាការិនីតាមបែបវិទ្យាសាស្ដ្រអាចជួយដល់សហព័ន្ធកីឡាជាតិទាំងអស់ដាក់ទុនវិនិយោគទៅលើផ្នែក បណ្ដុះបណ្ដាលធន់ធាន់អត្ដពលិកមិន ខុសសម្រាប់រយៈពេល៨ឆ្នាំឆ្ពោះទៅស៊ី ហ្គេមលើកទី៣២ឆ្នាំ២០២៣ ។ ប្រធាន បទដ៏មានសារសំខាន់មួយ គឺការអភិវឌ្ឍ អត្ដពលិកវ័យក្មេងឬក៏ហៅថា (Seminar on Development of Young Athletes) ត្រូវបានអ្នកជំនាញផ្នែកកីឡា លោក Joerg Teichman ជាអ្នកបង្ហាត់ បង្ហាញដល់សិក្ខាកាម២៥នាក់មកពី សហព័ន្ធកីឡាជាតិចំនួន២៥ ។

លោក វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា មានប្រសាសន៍ថា ដើម្បីឱ្យតំណាង សហព័ន្ធកីឡាជាតិទាំងអស់ធ្វើការ សម្រេចចិត្ដត្រូវមុននឹងជ្រើសរើស កីឡាករកីឡាការិនីយកមកធ្វើការបណ្ដុះបណ្ដាលក្នុងថ្នាលរបស់ខ្លួនជៀសវាងជ្រើស រើសខុសនោះ NOCC បានអញ្ជើញអ្នក ជំនាញផ្នែកកីឡា គឺលោក Joerg Teichman អនុបណ្ឌិតមកពីមជ្ឈមណ្ឌល វេជ្ជសាស្ដ្រកីឡានៃប្រទេសម៉ាឡេស៊ី មកជួយបង្ហាត់បង្ហាញដល់សិក្ខាកាម ២៥នាក់កាលពីព្រឹកថ្ងៃទី១៥ខែតុលា ឆ្នាំ២០១៥ នៅទីស្នាក់ការ NOCC ។

លោក វ៉ាត់ ចំរើន បានផ្ដាំផ្ញើដល់ សិក្ខាកាមទាំង២៥នាក់នោះថា វគ្គសិក្សា ដ៏មានសារសំខាន់មួយនេះនឹងបើកផ្លូវ ឱ្យសិក្ខាកាមដែលតំណាងឱ្យសហព័ន្ធ កីឡានីមួយៗបានមកចូលរួមសិក្សា ឈ្វេងយល់កាន់តែច្បាស់មុននឹងសម្រេច ចិត្ដជ្រើសរើសអត្ដពលិកយកទៅអភិវឌ្ឍ។ ដូច្នេះសិក្ខាកាមត្រូវត្រៀមប៊ិចនិងសៀវភៅកត់ចម្លងរាល់ការបង្ហាញរបស់ លោក Joerg Teichman ទុកចងក្រង ជាឯកសារប្រចាំសហព័ន្ធរៀងៗខ្លួន ហើយចប់ពីវគ្គសិក្សារយៈពេល៣ថ្ងៃនេះ ទៅលោក Joerg Teichman នៅតែបន្ដ តាមដានរាល់សកម្មភាពជ្រើសរើស អត្ដពលិករបស់សិក្ខាកាមទាំង២៥នាក់ រហូតដល់អាចអនុវត្ដដោយខ្លួនឯង បានល្អ ។

អគ្គលេខាធិការរូបនេះបានបញ្ជាក់ ថា ចាប់ពីឆ្នាំ២០១៦តទៅក្រសួងអប់រំ យុវជននិងកីឡាមានគម្រោងចំណាយ ថវិកាឧបត្ថម្ភដល់គ្រូបង្វឹក១គុណនឹង៣ ដងសម្រាប់ជំរុញដល់ការអភិវឌ្ឍវិស័យ កីឡាឆ្ពោះទៅស៊ីហ្គេមឆ្នាំ២០២៣ដែល ប្រទេសកម្ពុជាធ្វើម្ចាស់ផ្ទះ ។

ដោយឡែកលោក Joerg Teichman ក៏បានសម្ដែងការកោតសរសើរចំពោះសិក្ខាកាមទាំង២៥នាក់ដែលបានមក ចូលរួមសិក្សាឈ្វេងយល់ស្ដីពីការអភិ វឌ្ឍអត្ដពលិកវ័យក្មេងដែលរៀបចំដោយNOCC ត្រូវមានសេចក្ដីក្លាហានក្នុង ការសួរសំណួរណាដែលអ្នកទាំងអស់គ្នាមិនយល់មកកាន់ខ្ញុំសូមកុំខ្មាសអៀន ។

លោក Joerg Teichman បានសន្យា ថា លោកនឹងព្យាយាមបង្ហាត់បង្រៀន រាល់ចំណុចខ្វះចន្លោះក្នុងវិស័យកីឡា ជាពិសេសការជ្រើសរើសកីឡាករកីឡាការិនីយកទៅបណ្ដុះបណ្ដាលធ្វើយ៉ាងណា មុនសម្រេចចិត្ដរើសក្មេងដែលលោក អ្នកគិតថាជាក្មេងមានទេពកោសល្យពី ធម្មជាតិដាក់ចូលក្នុងកម្មវិធីហ្វឹកហាត់ របស់សហព័ន្ធខ្លួនហើយលោកនឹងចែក រំលែកបទពិសោធន៍ដែលលោកមាន ទុកជាទុនដើម្បីស្វែងរកអត្ដពលិកវ័យ ក្មេងល្អៗសម្រាប់ការអភិវឌ្ឍ ។

គួររំលឹកថា វគ្គសិក្សានេះមានរយៈ ពេល៣ថ្ងៃចាប់ពីថ្ងៃទី១៥ដល់ថ្ងៃទី១៧ ខែតុលាឆ្នាំ២០១៥ ។ ចំណែកលោក Joerg Teichman ធ្លាប់មកបង្ហាត់ បង្រៀនដល់សិក្ខាកាមតំណាងសហព័ន្ធកីឡាជាតិកម្ពុជាចំនួន៤លើកក្នុងនោះ នៅឆ្នាំ២០១៣ម្ដងឆ្នាំ២០១៤ពីរដង និងឆ្នាំ២០១៥នេះម្ដង ៕