តាមអ្នកឯកទេសវិភាគបានឲ្យដឹងថា នឹងមានពលរដ្ឋយ៉ាងតិច ២លាននាក់ស្លាប់ ប្រសិនបើកូរ៉េខាងជើង បើកការវាយប្រហារដោយបរមាណូ ទៅលើទីក្រុងតូក្យូនិងនិងទីក្រុងសេអ៊ូល ។
សារព័ត៌មានយ៉ុនហាប់របស់កូរ៉េខាងត្បូងបាន ដងស្រង់លទ្ធផលវាយតម្លៃរបស់ អ្នកឯកទេស អាមេរិក បញ្ជាក់ថា ប្រសិនបើរងការវាយប្រហារដោយបរមាណូពីកូរ៉េខាងជើងនោះ និងមាន ពលរដ្ឋយ៉ាងតិច២លាននាក់ស្លាប់។ ការវាយតម្លៃខាងលើកើតឡើងក្រោយពេលដែល ភាពតានតឹងកើនឡើង រយៈពេលចុងក្រោយនេះ ហើយអាមេរិកគំរាមវាយប្រហារដោយយោធា ។
ប្រធានាធិបតីត្រាំ និងមេដឹកនាំកូរ៉េខាងជើងគីមជុងអ៊ុនបានប្រើប្រាស់ពាក្យសម្តី ឌឺដងដាក់គ្នាដោយ ភាគីនិមួយៗប្រកាសពីការត្រៀមលក្ខណះក្នុងការធ្វើសង្គ្រាម កម្ទេចគ្នាទៅវិញទៅមក ។ លោក Michael J. Zagurek Jr អ្នកឯកទេសវិភាគបានបញ្ជាក់ថា បើកូរ៉េខាងជើង បាញ់ប្រហារនោះ កម្លាំងបំផ្លាញនៃបរមាណូ នឹងសម្លាប់មនុស្សយ៉ាងតិច២,១លាននាក់ និង ៧,៧លាននាក់រងរបួស។
បើទោះបីមានភាពតានតឹងតែកូរ៉េខាងជើង មិនចង់ពិភាក្សាជាមួយអាមេរិកបញ្ចប់វិបត្តិនោះឡើយ បើទោះបីភាគីអាមេរិក មានបំណងចង់ពិភាក្សាដោយផ្ទាល់ជាមួយកូរ៉េខាងខជើងក្តី។ អ្នកនាំពាក្យក្រសួងការបរទេសអាមេរិក បានថ្លែងបញ្ជាក់ថា រហូតមកទល់ពេលនេះ ភាគីកូរ៉េខាងជើង មិនទាន់បានបង្ហាញសញ្ញា វិជ្ជមាន ថាខ្លួនចង់ចរចាឡើយ។
លោក រិច ធីឡឺសុន បាននិយាយ ឲ្យដឹងថា អាមេរិកមានបណ្តាញទាក់ទងជាមួយកូរ៉េខាងជើង ដោយផ្ទាល់ ប្រមាណជា២ ទៅ ៣បណ្តាញ បើទោះបីជាគ្មានទូតជាមួយគ្នាក៏ដោយ។ តាមប្រសាសន៍លោក ធីឡឺសុន បណ្តាញសំងាត់អាមេរិក នេះកំពុងតែស្ទាបស្ទង់ទឹកចិត្តរបស់ភាគីកូរ៉េខាងជើង ចង់ដឹងថា កូរ៉េខាងជើង ចង់ចរចាឬមិនចរចា។
ប៉ុន្តែស្រាប់តែប៉ុន្មានម៉ោងក្រោយមក លោក Heather Nauert អ្នកនាំពាក្យក្រសួងការបរទេសអាមេរិក បានបញ្ជាក់ថា រហូតមកទល់ពេលនេះ ការស្ទាបស្ទង់ទឹកចិត្តកូរ៉េខាងជើងនោះ មិនទាន់បានជាលទ្ធផលអ្វីទាំងអស់ ព្រោះថា ភាគីកូរ៉េខាងជើង មិនបានផ្តល់សញ្ញាវិជ្ជាមានណាមួយ ថាខ្លួនចង់បើកច្រកចរចាទេ។
អ្នកនាំពាក្យរូបនេះ បន្ថែមថា បណ្តាញអាមេរិក បានទាក់ទងជាមួយមន្ត្រីយោធាកូរ៉េខាងជើង ដើម្បីចង់ដឹងពីចេតនា ក្នុងការចរចា គ្រប់គ្រងកម្មវិធីនុយក្លេអ៊ែរ ក៏ប៉ុន្តែមន្ត្រីយោធាកូរ៉េខាងជើង មិនបានឆ្លើយតបអ្វីទាំងអស់។ ក្រៅពីបណ្តាញទាក់ទងជាមួយយោធា អ្នកនាំពាក្យក្រសួងការបរទេសអាមេរិក ក៏បានបញ្ជាក់ថា អាមេរិកនៅមានបណ្តាញទាក់ទង ដោយផ្ទាល់ ។
នៅក្នុងព្រិត្តិការមួយផ្សេងទៀត រដ្ឋមន្ត្រីបង្រួបបង្រួមជាតិកូរ៉េខាងត្បូង បានស្នើរដល់កូរ៉េខាងជើង អនុញ្ញាត្តិឲ្យឲ្យមានការជួបជុំគ្រួរសារដែលបែកបាក់
រដ្ឋមន្ត្រីបង្រួបបង្រួមរបស់កូរ៉េខាងត្បូង កាលពីថ្ងៃពុធ តាមសេចក្តីរាយការណ៍ បានជម្រុញឲ្យកូរ៉េខាងជើង អនុញ្ញាតគ្រួសារ បែកបាក់គ្នា បានជួបសាច់ញាតិ ដែលបាត់ជាយូររបស់ពួកគេ ដោយលោក បានមានប្រសាសន៍ថា ការដោះស្រាយបញ្ហា គួរតែជា ជំហានដំបូង ឆ្ពោះទៅរកសន្តិភាព និងការសម្រុះសម្រួលគ្នា រវាងភាគី កូរ៉េទាំងពីរ។
នៅក្នុងពិធីរំលឹកដូនតារួមគ្នាមួយ ដែលគ្រួសារបែកបាក់គ្នា បានធ្វើឡើង នៅឧទ្យាន Imjingak ជិតព្រំដែនជាមួយប្រទេស កូរ៉េខាងជើង ដើម្បីប្រារព្ធថ្ងៃបុណ្យ លោក Chuseok បានថ្លែងដូច្នេះថា រយៈពេលពីរឆ្នាំបានកន្លងផុតទៅ ចាប់តាំងពីពិធីជួបជុំគ្រួសារ ដែលមានសាច់ញាតិបែកបាក់គ្នា ត្រូវបានផ្អាកឈប់ប្រារព្ធធ្វើ។
សូមជម្រាបផងដែរថា ចាប់តាំងពីកិច្ចប្រជុំ កំពូលលើកទី១ ក្នុងឆ្នាំ២០០០មក ប្រទេសកូរ៉េទាំងពីរ តាមសេចក្តីរាយការណ៍ បានប្រារព្ធ ពិធីជួបជុំគ្រួសារនេះ បានចំនួន២០លើកហើយ ដោយបានអនុញ្ញាតឲ្យ សាច់ញាតិបែកបាក់គ្នា ដែលនៅរស់រានមានជីវិត ឆ្លងព្រំដែន មកជួបជុំគ្នា បានរយៈពេលពីរបីថ្ងៃ៕
ដោយ៖ មែវ សាធី
