ខេត្ដកណ្ដាល៖ នារីម្នាក់បើកម៉ូតូក្នុង ល្បឿនលឿនព្យាយាមបើកជែងរថយន្ដ នៅខាងមុខ ខណៈនោះបានប៉ះដៃចង្កូត បណ្ដាលឱ្យដួលខ្ទាត់ចូលក្រោមកង់រថយន្ដ កិនបែកក្បាលស្លាប់ក្នុងថ្លុកឈាម ។
កាលពីវេលាម៉ោង៦និង៣០នាទី ថ្ងៃទី១៦ ខែ តុលា ឆ្នាំ២០១៥ លើកំណាត់ផ្លូវជាតិ លេខ២១ ត្រង់ចំណុចខាងមុខផ្ទះលោក សុខ ចំរើន ស្ថិតក្នុងភូមិព្រែកសំរោង៣ សង្កាត់-ក្រុងតាខ្មៅ ។
មន្ដ្រីនគរបាលចរាចរណ៍ក្រុងតាខ្មៅ បានឱ្យដឹងថា នារីរងគ្រោះឈ្មោះ ពៅ ស្រីរីន អាយុ១៩ឆ្នាំ មានទីលំនៅក្នុងភូមិ ព្រែកហូរលិច សង្កាត់ព្រែកហូរ ក្រុង តាខ្មៅ ជិះម៉ូតូម៉ាកស៊ុយហ្ស៊ូគី លេត ពណ៌ស គ្មានស្លាកលេខ ។ ចំណែកឯ រថយន្ដដែលកិននារីរងគ្រោះបណ្ដាលឱ្យស្លាប់នោះពុំត្រូវបានស្គាល់ម៉ាក និង ស្លាកលេខឡើយ ព្រោះក្រោយពីកើត ហេតុបានបើកគេចទៅទិសខាងត្បូងបាត់ស្រមោល ។
ប្រភពដដែលបានបន្ដថា នៅមុន ពេលកើតហេតុគេបានឃើញនារីរងគ្រោះ ជិះម៉ូតូតាមបណ្ដោយផ្លូវជាតិលេខ២១ ក្នុងទិសដៅពីជើងទៅត្បូងដោយល្បឿន លឿនបើកជែងរថយន្ដនៅខាងមុខ ខណៈ បើកជែងមិនទាន់ផុតផងនោះអ្នកបើកបរ រថយន្ដបានបើកបួងចង្កូតគេចជង្ហុក បណ្ដាលឱ្យរថយន្ដប៉ះជាមួយដៃចង្កូត ម៉ូតូនារីរងគ្រោះដួលខ្ទាត់ចូលក្រោមកង់រថយន្ដកិនបែកក្បាលស្លាប់យ៉ាងអាណោច អាធ័មនៅកន្លែងកើតហេតុ ។
ក្រោយពី មានហេតុការណ៍កើតឡើងអ្នកបើកបរ រថយន្ដបានបើកគេចទៅទិសខាងត្បូង បាត់ស្រមោល ។ ម៉ូតូនារីរងគ្រោះត្រូវ បាននគរបាលចរាចរធ្វើការ វាស់វែងដកហូតយកទៅរក្សាទុកនៅអធិការដ្ឋាននគរបាលក្រុងតាខ្មៅនិងតាមចាប់រថយន្ដបង្កមកចាត់ការតាមច្បាប់ ។ បច្ចុប្បន្នសាកសពនារីរងគ្រោះត្រូវបានសមត្ថកិច្ចប្រគល់ឱ្យក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕
ដោយ៖ ស្អាងជ័យ
