គណះកម្មាធិការរៀបចំការបោះឆ្នោតមីយ៉ាន់ម៉ាបានសម្រេចបោះឆ្នោតដូចការគ្រោងទុកប៉ុន្តែក៏បានសម្រេចលុបចោលតំបន់មួយចំនួនផងដែរដោយសារតែវិបត្តិនិងគ្រោះទឹកជំនន់។
ការប្រកាសលុបចោលការបោះឆ្នោតមួយផ្នែក នៅតាមតំបន់ភាគខាងជើងបានធ្វើឲ្យក្រុមអ្នកតាមដាននយោបាយ និងគណបក្សប្រឆាំងរឹតតែកើតក្តីសង្ស័យថា រដ្ឋាភិបាលនឹងមិនអាចរៀបចំការបោះឆ្នោត ប្រជាធិបតេយ្យទៅតាមការសន្យារបស់ខ្លួន។
គណៈ កម្មាធិការជាតិរៀបចំ ការបោះឆ្នោត បានកោះប្រជុំគណបក្សសំខាន់ៗ នៅទីក្រុងណៃពីដោរ។ តាមអ្នកតំណាងគណបក្សសម្ព័ន្ធជាតិដើម្បីប្រជាធិបតេយ្យ គណៈកម្មាធិការរៀបចំការបោះឆ្នោត បានស្ទង់ សួរយោបល់ ទៅគណបក្សនយោបាយពីការលើកថ្ងៃបោះឆ្នោត។អ្នកតំណាងរបស់បក្សប្រឆាំងបានជូនដំណឹងរួចហើយទៅលោកស្រីអ៊ុងសាន ស៊ូជី ពីការឆ្លើយបដិសេធ ក្នុងពេលដែលគណបក្សកាន់អំណាចឆ្លើយយល់ស្របយោបល់របស់គណៈកម្មការធិការ ជាតិរៀបចំការបោះឆ្នោត។
នៅថ្ងៃអង្គារ អ្នកនាំពាក្យរដ្ឋាភិបាលបានពន្លយឲ្យដឹងពីលទ្ធភាព លើកពេលបោះឆ្នោត ដោយសារតែហេតុផលគ្រោះទឹកជំនន់ដ៏ធ្ងន់ធ្ងរ ដែលបានសម្លាប់ប្រជាជនភូមា ជាង ១០០នាក់ នៅប៉ុន្មានខែចុងក្រោយនេះ។តាមអ្នកជំនាញ គ្រោះមហន្តរាយធម្មជាតិ ឬបញ្ហាសន្តិសុខ នៅតំបន់ភាគខាងជើង គឺគ្រាន់តែលេសដែលរដ្ឋាភិបាលក្រុងណៃពីដោរប្រើដើម្បី លើកពេល មិនចង់រៀបចំការបោះឆ្នោតតាមកាលកំណត់តែប៉ុណ្ណោះ។ គេនៅចាំបានថា នៅតែប៉ុន្មានថ្ងៃក្រោយ ភូមារងបំផ្លាញដោយខ្យល់ព្យុះសង្ឃរា ណាគី ដែលបានសម្លាប់មនុស្សជិត ១សែន ៤ម៉ឺុននាក់ នៅឆ្នាំ ២០០៨ របបសឹកភូមា បានប្រកាសរៀបចំការបោះឆ្នោតប្រជាមតិថ្នាក់ជាតិ ដើម្បី ធ្វើកំណែទម្រង់រដ្ឋធម្មនុញ្ញ ក្នុងន័យពង្រឹងអំណាច កងទ័ពភូមា។
