ខេត្តស្វាយរៀង ៖ មនុស្ស៤នាក់រងរបួសធ្ងន់ស្រាលនៅក្នុងពិធីរាំធុងបាស ក្នុងបរិវេនវត្តក្រសាំងជ្រំ បង្កឲ្យមានការភ្ញាក់ផ្អើលរហូតរត់ជាន់ជើងគ្នាប្រសេចប្រសាច ហើយត្រូវបានអ្នកភូមិនិងសមត្ថកិច្ចមូលដ្ឋានដឹកមកកាន់មន្ទីរពេទ្យបង្អែកខេត្តទាំងយប់ ថ្ងៃទី១២ ខែតុលាឆ្នាំ២០១៧នៅចំណុចភូមិចំបក់ពាមសង្កាត់សង្ឈ័រ ក្រុងស្វាយរៀង ។
សមត្ថកិច្ចនគរបាលក្រុងស្វាយរៀងបានឲ្យដឹងថា ជនរងគ្រោះមាន១-ឈ្មោះ គឹម យូ ភេទប្រុស អាយុ៣៥ឆ្នាំ មុខរបរធ្វើស្រែ រស់នៅភូមិបាក់រនាស់ សង្កាត់សង្ឈ័រ ក្រុងស្វាយរៀង រងរបួសធ្ងន់ ២-ឈ្មោះ ប្រាក់សារ៉ុម ភេទប្រុស អាយុ៥៩ឆ្នាំ មុខរបរធ្វើស្រែរស់នៅភូមិចំបក់ពាមសង្កាត់សង្ឈ័រ ក្រុងស្វាយរៀង រងរបួសស្រាល និង៣-ឈ្មោះ ផាត់ប៊ុនថនភេទប្រុសអាយុ៣២ឆ្នាំ មុខរបរធ្វើស្រែ រស់នៅភូមិធ្លកសង្កាត់សង្ឈ័រ ក្រុងស្វាយរៀ រងរបួសស្រាល ។
សាក្សីបាននិយាយឲ្យដឹងថា ភាគីបង្កហេតុឈ្មោះពៅ រដ្ឋា ភេទប្រុស អាយុ២៥ឆ្នាំ មុខរបរគ្មាន រស់នៅភូមិស្រម៉ជ្រំ សង្កាត់សង្ឈ័រក្រុងស្វាយរៀង ។ សាក្សីបន្តថាក្រោយពិធីបុណ្យកឋិននៅ ក្នុងវត្តក្រសាំងជ្រំចប់ នៅពេលយប់ក៏មានកម្មវិធីរាំធុងបាសរាំលេងកំសាន្ត ដោយម្នាក់ៗមក មើលខ្លះរាំខ្លះឈរយ៉ាងច្រើន ខណៈកំពុងរាំ ស្រាប់តែជនបង្កឈ្មោះពៅ រដ្ឋា និងបក្ខពួកដើរ សំដៅមករកជនរងគ្រោះទាំង៣នាក់ រួចធ្វើសកម្មភាពចាក់ជនរងគ្រោះបណ្តាលឲ្យរងរបួស ។
តាមការសាកសួរ ជនសង្ស័យឆ្លើយថា រូបគេគឺចាក់ច្រឡំមនុស្ស ។ ប៉ុន្តែទោះយ៉ាងណា ជន សង្ស័យត្រូវបានសមត្ថកិច្ចកសាងសំណុំរឿង និងស្វែងរកចាប់បក្ខពួកដើម្បីចាត់ការតាមច្បាប់ ៕ យឹមសុថាន
