ខេត្តកំពង់ស្ពឺ៖ នគរបាលស្រុកភ្នំស្រួចបានប្រកាសរកសាច់ញាតិបុរសម្នាក់ដែលត្រូវរថយន្តបុកស្លាប់កាលពីវេលារំលងអធ្រាត្រឈានចូលថ្ងៃទី១៧ ខែតុលា ឆ្នាំ២០១៥ នៅលើផ្លូវជាតិ៤ ចន្លោះគីឡូម៉ែត្រលេខ៩៥ និងលេខ៩៦ ត្រង់ចំណុចភូមិទី៣ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ។
នគរបាលស្រុកភ្នំស្រួចបានឲ្យដឹងថា ក្រោយពីប្រទះឃើញសាកសពបុរសខាងលើ សមត្ថកិច្ចបានចុះពិនិត្យ ក្រែងពាក់ព័ន្ធករណីឃាតកម្ម តែនៅពេលពិនិត្យរួចទើបដឹងថា មិនមែនជាករណីឃាតកម្មនោះទេ គឺជាករណីគ្រោះថ្នាក់ចរាចរណ៍ ។ មូលហេតុដែលសមត្ថកិច្ចហ៊ានអះអាងបែបនេះ ដោយសារឃើញមានស្នាមកង់រថយន្តនៅក្បែរកន្លែងកើតហេតុ ហើយជនរងគ្រោះមានស្នាមកកិតរលាត់ និងបុក ។
មិនមានសាក្សីណាម្នាក់ហ៊ានអះអាងថា រថយន្តដែលបុកបុរសរងគ្រោះជាប្រភេទអ្វីនោះដែរ ហើយមិនដឹងថា ជនរងគ្រោះធ្វើដំណើរពីណាទៅណាដែរ តែបើតាមជំនាញបច្ចេកទេសនគរបាលចរាចរណ៍អះអាងថា រថយន្តបង្កបើកបរពីលិចទៅកើត ហើយទំនងជាជនរងគ្រោះដើរឆ្លងផ្លូវទើបត្រូវរថយន្តបុកស្លាប់បែបនេះ ។
ប្រជាពលរដ្ឋនៅក្បែរកន្លែងកើតហេតុ គ្មាននរណាម្នាក់ស្គាល់ជនរងគ្រោះនោះឡើយ ។ ក្រោយវាស់វែងរួច សមត្ថកិច្ចរុំសពយកទៅតម្កល់ទុកនៅវត្តត្រែងត្រយឹងដើម្បីស្រាវជ្រាវរកគ្រួសារទទួលយកទៅធ្វើបុណ្យតាមប្រពៃណី ។
សមត្ថកិច្ចបានអំពាវនាវផងដែរ ដល់បងប្អូនប្រជាពលរដ្ឋណាដែលបាត់សមាជិកគ្រួសារដូចភិនភាគក្នុងរូបថតនេះ សូមមកទំនាក់ទំនងជាមួយនគរបាលស្រុកភ្នំស្រួចដើម្បីបំពេញបែបបទទទួលយកទៅធ្វើបុណ្យតាមប្រពៃណី ។
សពមានសម្បុរសជ្រះ កម្ពស់ប្រហែល១.៦៥ម៉ែត្រ អាយុប្រហែល៤០ឆ្នាំជាង មាឌស្គម ស្លៀកខោខ្មៅជើងខ្លី អាវប្រផេះដៃវែង និងមានសក់រុញអង្គាដី ៕
ដោយ៖ សេនាស័ក្តិ
