ភ្នំពេញ៖តារាកំប្លែងនាយគ្រឿន បានប្រកាសលើឆាកតន្ត្រីក្នុងថ្ងៃប្រកាសបើកសម្ពោធចាក់បញ្ចាំងស្នាដៃភាពយន្តរឿង”ថតកុន”ដែលលោកបានសម្តែង និពន្ធ និងដឹកនាំសម្តែង។ នៅពីមុខសិល្បករជាច្រើនរូបតារាកំប្លែងរូបនេះបាញ់ចំៗថា “តារាខ្លះស៊ីលុយថ្លៃ ប៉ុន្តែចរិកអន់”។
បន្ទាប់ពីប្រឡូកនឹងវិស័យសិល្បៈ និងបានវិវត្តខ្លួនពីតារាកំប្លែងមកជាតារាសម្តែង និងជាអ្នកនិពន្ធដឹកនាំរឿង នាយគ្រឿន ថាខ្លួនបានជួបនឹងរឿងរ៉ាវជាច្រើនជាមួយនឹងសិល្បករ។ អ្វីដែលធ្វើឲ្យលោកបាញ់បោះពាក្យមិនពិរោះត្រចៀកនោះគឺក្រោយពេលដែលតារាសម្តែងប្រុសស្រីល្បីឈ្មោះខ្លះទាមទារតម្លៃខ្លួនខ្ពស់តែមិនធ្វើចរិកឲ្យថ្លៃថ្នូរដូចតម្លៃខ្លួន។ លោកលើកឡើងដូចនេះព្រោះតែសិល្បករនោះមិនគោរពតម្លៃខ្លួន ពិសេសទាក់ទិននឹងការមិនគោរពពេលវេលា ដោយសំអាងតែខ្លួនល្បីហើយទុកឲ្យសិល្បករដទៃចាំជាច្រើននាក់។ ក្រៅពីបញ្ហាដែលលើកឡើងពីការមិនគោរពពេលវេលារបស់តារាល្បីមួយចំនួន លោកក៏ជួបនឹងរឿងហួសចិត្តជាច្រើនដែលរហូតធ្វើឲ្យលោកសម្រេចចិត្តចងក្រងជាភាពយន្តមួយឡើង។
ជុំវិញបញ្ហាមិនគោរពពេលវេលារបស់សិល្បករធ្លាប់បានក្លាយជាប្រធានបទនិងបញ្ហាឈឺក្បាលរបស់ផលិតករមួយចំនួន ដែលពេលខ្លះត្រូវឲ្យសិល្បករដទៃចាំ និងពេលខ្លះត្រូវរំសាយការថតព្រោះតែតារាសំខាន់អវត្តមាន។ ផលិតករមួយចំនួនក៏ចេញមុខរិះគន់ និងបញ្ចេញមុខដោយចំហរចំពោះសិល្បករដែលខកខានក្នុងការចេញថតទុកឲ្យតារាដទៃរងចាំចាប់តាំងពីព្រឹកដល់ថ្ងៃត្រង់ជាដើម ជាក់ស្តែងដូចជាតារាសម្តែងឌុច លីដា ដែលត្រូវបានលោកគាំ ចន្ធីចេញមុខរិះគន់ចំៗ៕
ដោយ៖ វឌ្ឍនា
