ភ្នំពេញ៖ ជនសង្ស័យម្នាក់ ក្នុងចំណោមបក្ខពួក៣នាក់ត្រូវបានប្រជាពលរដ្ឋចាប់វាយស្ទើរស្លាប់ស្ទើររស់ បន្ទាប់ពីក្រុមជនសង្ស័យទាំង៣នាក់ជិះម៉ូតូមួយគ្រឿងធ្វើសកម្មភាពឆក់ទូរស័ព្ទពីនារីវ័យម្នាក់កំពុងឈរនិយាយទូរស័ព្ទតាមដងផ្លូវបានសម្រេច ហើយនាំគ្នាព្យាយាមបើកម៉ូតូរត់គេចបានចំងាយជាង១០០ម៉ែត្រ ត្រូវអស់លក្ខណ៍ បែរជាធ្លាក់ជនសង្ស័យ01នាក់ ជិះខាងក្រោយគេ ត្រូវបានបងប្អូនប្រជាពលរដ្ឋចាប់បាន ស្វាគមន៍ យ៉ាងចាស់ដៃរួចទើបប្រគល់ឲ្យសមត្ថកិច្ច ។
កាលពីវេលាម៉ោង១១និង៣០នាទីព្រឹកថ្ងៃទី១៨ ខែតុលា ឆ្នាំ២០១៥ ស្ថិតនៅតាមផ្លូវបេតុង ភូមិតាងួន សង្កាត់កាកាប ខណ្ឌពោធិ៍សែនជ័យ ។ ជនសង្ស័យម្នាក់ដែលឃាត់ខ្លួនបានមានឈ្មោះ ណាង សុភ័ណ្ឌ ភេទប្រុស អាយុ១៩ឆ្នាំ មុខរបរកម្មកររោងចក្រ រស់នៅផ្ទះលេខ១១១អា ផ្លូវបេតុង ភូមិក្បាលដំរី សង្កាត់កាកាប ក្បែរកន្លែងកើតហេតុ ។
ចំណែកបក្ខពួក២នាក់ទៀត ទី១-ឈ្មោះ ប៉ូឡូ ភេទប្រុស អាយុ១៨ឆ្នាំ មិត្តភ័ក្រធ្វើការងារជាមួយគ្នា ស្នាក់នៅក្នុងភូមិកើតហេតុ ជាអ្នកអង្គុយកណ្តាល ហើយជាអ្នកដៃដល់ឆក់ទូរស័ព្ទ ។
ទី២-ឈ្មោះ អាចិន ភេទប្រុស អាយុ១៨ឆ្នាំជា មិត្តភ័ក្រនឹងគ្នា ស្នាក់នៅភូមិទឹកថ្លា សង្កាត់ទឹកថ្លា ខណ្ឌសែនសុខ ជាអ្នកបើកបរម៉ូតូ ម៉ាក MSX ពណ៌សរ មិនស្គាល់ស្លាកលេខ ជិះធ្វើសកម្មភាព ។ ជនសង្ស័យទាំង២នាក់ ក្រោយធ្វើសកម្មភាព បានរត់គេចខ្លួនបាត់ យកទាំងទូរស័ព្ទជនរងគ្រោះទៅជាមួយផង ។ ដោយឡែក នារីរងគ្រោះ មិនបានប្រាប់ឈ្មោះឡើយ គ្រាន់ដឹងថា ស្នាក់នៅផ្ទះ កន្លែងកើតហេតុខាងលើដែលត្រូវជនសង្ស័យទាំង៣នាក់ឆក់ទូរស័ព្ទរបស់ខ្លួនម៉ាក I phone 5 យកទៅបាត់។
តាមប្រភពនៅកន្លែងកើតហេតុ បានឲ្យដឹងថាមុនកើតហេតុ នារីរងគ្រោះឈរនិយាយទូរស័ព្ទចិញ្ចើមផ្លូវមុខផ្ទះ ក្នុងភូមិក្បាលដំរី ស្រាប់តែជនសង្ស័យគ្នា៣នាក់ជិះម៉ូតូតាមផ្លូវបេតុងក្នុងភូមិ ពីលិចទៅកើត ឃើញមានឱកាសល្អ ក៏ជិះទៅក្បែរ ហើយជនសង្ស័យ ជិះកណ្តាលគេ មានឈ្មោះ ប៉ូឡូជាអ្នក ឆក់យកទូរស័ព្ទ បានហើយ ជិះរត់គេច មកត្បូង ចំងាយជាង១០០ម៉ែត្រ ដល់ចំណុចក្បែររោងម៉ាសុីនកិនស្រូវ ភូមិតាងួន សង្កាត់កាកាប ស្រាប់តែធ្លាក់ជនសង្ស័យជិះក្រោយគេម្នាក់ ត្រូវបានបងប្អូនប្រជាពលរដ្ឋ ចាប់ទាន់ស្វាគមន៍មួយដៃមួយជើងស្ទើរក្ស័យជីវិតរួចប្រគល់ឲ្យសមត្ថកិច្ច ចំណែកបក្ខពួក២នាក់ទៀតបានបោលម៉ូតូ រត់ទាំងព្រលឹងចុងសក់ទៅបាត់ ។
ជនសង្ស័យម្នាក់ក្នុងចំណោមគ្នា៣នាក់ បន្ទាប់ពីឃាត់ខ្លួនបាន ដោយសារធ្លាក់ពីលើម៉ូតូ កំពុងរត់គេចក្រោយធ្វើសកម្មភាពឆក់ទូរស័ព្ទ ត្រូវបាននាំខ្លួនទៅសាកសួរនៅ ប៉ុស្តិ៍កាកាប ខណ្ឌពោធិ៍សែនជ័យដើម្បីចាត់ការបន្តទៅតាមនិតិវិធីពីព្រោះនេះជាមុខសញ្ញាឆក់និងប្លន់ យ៉ាងកក្រើកនាពេលកន្លងមកដោយប្រើប្រាស់ម៉ូតូ MSXពណ៌ សរ និងបន្តធ្វើការស្រាវជ្រាវរកបក្ខពួក២នាក់ទៀតដែលកំពុងតែរត់គេចខ្លួន ៕
ដោយ៖ សុខា សែនជ័យ
