ខេត្តកណ្តាល៖ សត្វព្រៃជាច្រើនប្រភេទដូចជា ពស់ថ្លាន់ ពស់សាំងសឿ និងអណ្តើកសរុបប្រមាណ១៥៦គីឡូក្រាម ត្រូវបានមន្ត្រីការិយាល័យគយ និងរដ្ឋាករច្រកទ្វារជ្រៃធំ បង្ក្រាបបានពីឈ្មួញដឹកបន្លំតាមម៉ូតូ បំរុងឆ្លងដែនយកទៅលក់នៅប្រទេសវៀតណាម កាលពីព្រឹកថ្ងៃទី១៩ ខែតុលា ឆ្នាំ២០១៥ ត្រង់ចំណុចប៉ុស្តិ៍ត្រួតពិនិត្យ តាមផ្លូវជាតិលេខ២១B ស្ថិតក្នុងឃុំសំពៅពូន ស្រុកកោះធំ ខេត្តកណ្តាល។
លោក មួង ដារ៉ា ប្រធានការិយាល័យគយ និងរដ្ឋាករជ្រៃធំបានឲ្យដឹងថា សត្វព្រៃដែលកម្លាំងរបស់លោកបង្ក្រាបបាននោះ មានចំនួនសរុប១៥៦គីឡូក្រាម ក្នុងនោះប្រភេទសត្វពស់ថ្លាន់ ចំនួន១១១គីឡូក្រាម ពស់សាំងសឿចំនួន១៥គីឡូក្រាម និងសត្វអណ្តើកចំនួន ៣០គីឡូក្រាមដែលបង្ក្រាបបានពីឈ្មួញដឹកបង្កប់តាមម៉ូតូ មួយគ្រឿងម៉ាកគុបមូលពណ៌ សំបកឪឡឹកគ្មានស្លាកលេខ អ្នកបើកបរម៉ូតូពុំត្រូវបាន ស្គាល់ឈ្មោះនោះទេ។
លោកប្រធានករិយាល័យបានបន្តទៀតថា បន្ទាប់ពីត្រួតពិនិត្យនិងចាប់ដកហូតបានពីជនល្មើសទាំងនោះរួចហើយ សត្វព្រៃទាំងអស់ រូមនឹងវត្ថុតាងមួយចំនួនទៀតផងនោះ ត្រូវបានលោកបញ្ជាឲ្យកម្លាំងក្រោមឱវាទយកទៅរក្សាទុកជាបណ្តោះអាសន្ន ដើម្បីរង់ចាំប្រគល់ឲ្យទៅអង្គការថែរក្សាសត្វព្រៃ (WILDLIFE ALLIANCE)យកទៅថែរក្សា ។
លោកបានបញ្ជាក់ទៀតថា ទោះបីជាកម្លាំងសមត្ថកិច្ចរបស់លោកខិតខំទប់ស្កាត់ យ៉ាងណាក៏ដោយក៏ក្រុមឈ្មួញខិលខូច មួយចំនួននៅតែបន្តលួចឆ្មក់ធ្វើសកម្មភាព ដោយប្រើរូបភាពផ្សេងៗគ្នាបង្វែពីភ្នែកសមត្ថកិច្ច។ ប៉ុន្តែទោះបីជាយ៉ាង ណាក៏ដោយនៅតែមិនអាចគេចផុតភ្នែកសមត្ថកិច្ច ព្រោះលោកតែងតែចាត់កម្លាំងជំនាញ ឲ្យយកចិត្តទុកដាក់ទប់ស្កាត់ និងបង្ក្រាបបានជាបន្តបន្ទាប់ និងបានប្រគល់ទៅឲ្យអង្គការថែរក្សាសត្វព្រៃ។ ជាមួយគ្នានោះដែរលោកបានអំពាវនាវដល់ប្រជាពលរដ្ឋ គ្រប់មូលដ្ឋានត្រូវចូលរួមជាមួយនិងសមត្ថកិច្ចឲ្យបានខ្ជាប់ខ្ជួន ដើម្បីថែរក្សាសត្វព្រៃឲ្យបានគង់វង្ស បើមិនដូច្នេះទេសត្វព្រៃប្រឈមនឹងការវិនាសជាក់ជាមិនខាន ៕
ដោយ៖ វិបុល
