ខេត្តបន្ទាយមានជ័យ ៖ កម្លាំងនគរបាលការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្ត បន្ទាយមានជ័យអនុវត្តតាមបទបញ្ជាផ្ទាល់របស់លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានចេញបង្រ្កាបរថយន្ត២តោនកន្លះ១គ្រឿងដឹកផ្ទុកក្របតង់ពណ៌ខៀវនូវផលិតផលបក្សីសាច់មាន់និងឆ្អឹងមាន់ខូចគុណភាពខុសច្បាប់នាំពីប្រទេសថៃចូលប្រទេសកម្ពុជា ជិត១តោន និងឃាត់ខ្លួនអ្នកបើករថយន្ត២នាក់ ខណៈដែលរថយន្តធ្វើដំណើរពីច្រករបៀងព្រំដែននៅក្នុងភូមិសាស្រ្តឃុំអូរបីជាន់ ស្រុកអូរជ្រៅ បម្រុងនាំយកទៅលក់ចែកចាយនៅខេត្តបាត់ដំបង។
ការបង្រ្កាបរបស់កម្លាំងនគរបាលធ្វើឡើងកាលពីវេលាម៉ោង១២និង៣០នាទីរសៀលថ្ងៃទី២០ ខែវិច្ឆិកា ឆ្នាំ២០១៧ នៅលើកំណាត់ផ្លូវជាតិលេខ៥ ស្ថិតនៅក្នុងភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ក្រោមការសម្របសម្រួលនីតិវីធីដោយលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្ត ក្នុងវិធានការចូលរួមការពារសុខមាលភាពសារធារណៈនៃការបង្ការទប់ស្កាត់នាំចូលផលិតផលបក្សីខូចគុណភាពដែលជាមុខសញ្ញាបង្កឱ្យប៉ះពាល់គ្រោះថ្នាក់សុខភាពប្រជាពលរដ្ឋនោះ។
បើតាមប្រភពព័ត៌មានពីនគរបាលប្រឆាំងបទល្មើសេដ្ឋកិច្ចខេត្តប្រាប់ឱ្យដឹងថា កម្លាំងនគរបាលបង្រ្កាបរថយន្តខាងលើក្រោយពីទទួលព័ត៌មានពីប្រជាពលរដ្ឋមកថា មានការនាំចូល ផលិតផលបក្សីសាច់មានឆ្អឹងមាន់ខូចគុណភាពខុសច្បាប់ នៅក្នុងភូមិសាស្រ្តច្រករបៀងភូមិស ស្រុកអូរជ្រៅ កម្លាំងនគរបាលក៏បានចេញបង្រ្កាបបានសម្រេចនៅចំណុខាងលើ។ផលិតផលបក្សីខូចគុណភាព សមត្ថកិច្ចបាននាំយកមកត្រួតពិនិត្យនៅស្នងការដ្ឋាននគរបាលខេត្តមានទម្ងន់សរុប៨៥០គីឡូក្រាម មានសភាពក្លិនស្អុយទៅហើយ។
ផលិតផលបក្សីខូចគុណភាព នៅថ្ងៃដដែលត្រូវបានមន្រ្តីជំនាញសហការនិងកម្លាំងនគរបាលប្រឆាំងបទល្មើសសេដ្ឋកិច្ចខេត្ត ដើម្បីយកទៅដុតកម្ទេចចោល។ចំណែកអ្នកបើករថយន្តទាំង២នាក់កម្លាំងនគរបាលការិយាល័យជំនាញកសាងសំណុំរឿងចាប់បញ្ជូនទៅកាន់តុលាការដើម្បីចាត់ការតាម ច្បាប់ ៕ សំ វិច្ឆិកា
