ភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានប្រាប់ដល់ ឯកអគ្គរដ្ឋទូតអាមេរិកប្រចាំនៅកម្ពុជា ឯកឧត្តម William Heitd ថា ការដែលតុលាការសម្រេចរំលាយគណបក្សសង្គ្រោះជាតិ គឺធ្វើឡើងទៅតាមច្បាប់ប៉ុណ្ណោះ ហើយកម្ពុជានៅតែបន្តពង្រឹងកិច្ចសហប្រតិបត្តិការទ្វេភាគីជាមួយអាមេរិកដដែល។
ការថ្លែងរបស់ សម្តេចក្រឡាហោមយ៉ាងដូច្នេះ គឺបន្ទាប់ពី ឯកឧត្តម William Heitd ឯកអគ្គរដ្ឋទូតអាមេរិកប្រចាំនៅកម្ពុជា បានសម្តែងការព្រួយបារម្ភអំពីស្ថានភាពនយោបាយ និងអង្គការសង្គមស៊ីវិលមួយចំនួននៅកម្ពុជានាពេលបច្ចុប្បន្ននេះ។
យ៉ាងណាក៏ដោយ សម្តេចក្រឡាហោម បានថ្លែងថា ការដែលតុលាការសម្រេចរំលាយគណបក្សសង្គ្រោះជាតិ គឺគេធ្វើទៅតាមច្បាប់ប៉ុណ្ណោះ ខណៈគណបក្សនេះបានប្រព្រឹត្ត ខុសនឹងច្បាប់ថ្មីស្តីអំពីគណបក្សនយោបាយនៅកម្ពុជា។
ថ្លែងនៅក្នុងកិច្ចជំនួបទ្វេភាគីជាមួយ ឯកឧត្តម William Heitd ឯកអគ្គរដ្ឋទូតអាមេរិកប្រចាំនៅកម្ពុជា នាល្ងាចថ្ងៃទី២១ ខែវិច្ឆកា ឆ្នាំ២០១៧នេះ នៅស្តីការក្រសួងមហាផ្ទៃនោះ សម្តេចក្រឡាហោម ស ខេង បានបន្តទៀតថាប្រទេសកម្ពុជាគឺជាប្រទេសឯករាជ្យភាពអធិបតេយ្យភាព ដូច្នេះអ្វីដែលក្រសួងមហាផ្ទៃធ្វើនាពេលបច្ចុប្បន្នគឺធ្វើឡើងតាមនីតិវិធីច្បាប់ និងពង្រឹងនីតិវិធីច្បាប់ប៉ុណ្ណោះ។ មួយវិញទៀតក្រសួងមហាផ្ទៃបានចាត់ទុកអង្គការសង្គមស៊ីវិលជាដៃគួរដ៏ល្អដើម្បីលើកស្ទួយវិស័យនានានៅប្រទេសកម្ពុជា។ ប៉ុន្តែអង្គការសង្គមស៊ីវិលទាំងនោះត្រូវតែគោរព និងចាត់ទុកក្រសួងមហាផ្ទៃជាដៃគួរដ៏ល្អផងដែរ។
នៅក្នុងកិច្ចជំនួបនោះដែរ ឯកឧត្តម William Heitd បានថ្លែងចំពោះមុខ សម្តេចក្រឡាហោម ស ខេង ថាអាមេរិកនៅតែបន្តពង្រឹងកិច្ចសហប្រតិបត្តិការទ្វេភាគីជាមួយកម្ពុជាដដែល ជាពិសេសកិច្ចសហប្រតិបត្តិការទ្វេភាគីស្តីអំពីការទប់ស្កាត់ការជូញដូរមនុស្ស និងប្រឆាំងភេរវកម្មជាដើម។
ឯកឧត្តម William Heitd បានលើកឡើងថា «អាមេរិកពិតជាអគុណដល់កម្ពុជាដែលបានទប់ស្កាត់នូវជនជាតិអាមេរិកចំនួន១៣នាក់ មិនឲ្យចូលក្នុងប្រទេសរបស់ខ្លួនដោយសារតែជនទាំង១៣នាក់នោះ បានប្រព្រឹត្តអំពើអនាចារចំពោះកុមារ»។ តែយ៉ាងណាក្តីកិច្ចសហប្រតិបត្តិការទ្វេភាគីរវាងអាមេរិក និងកម្ពុជាគឺនៅតែជាមិត្តដ៏ល្អ និងបន្តពង្រឹងកិច្ចសហប្រតិបត្តិការលើគ្រប់វិស័យបន្ថែមទៀតផងដែរ។
នៅក្នុងកិច្ចជំនួបជាងមួយម៉ោងនោះ ភាគីទាំងពីរក៏បានពិភាក្សាអំពីបញ្ហាជនជាតិ ខ្មែរដែលរស់នៅអាមេរិកហើយគ្រោងនឹងបញ្ចូនមកកម្ពុជាវិញ ខណៈកម្ពុជាស្នើសុំឲ្យអាមេរិកពន្យារពេលដល់ជនជាតិខ្មែរទាំងនោះជាបណ្តោះអាសន្ន ដោយសារតែពួកគេទាំងនោះពុំទាន់ជាសះស្បើយពីជំងឺ ។
សម្តេចក្រឡាហោម ស ខេង បានបញ្ជាក់ប្រាប់ដល់ ឯកឧត្តម William Heitd ថា កម្ពុជានឹងទទួលយកជនជាតិខ្មែរទាំងនោះមកវិញជាបន្តបន្ទាប់ ក្រោយពីពួកគេមានការស្ម័គ្រចិត្ត ៕
