ភ្នំពេញ៖ ក្រោយពីជោគជ័យខ្លាំងនៃភាពយន្តខ្នាតធំរឿង”ទឹកចិត្តម្តាយសម័យថ្មី” ផលិតកម្មTown បានប្រកាសចេញចាក់បញ្ចាំងភាពយន្តបែបកំប្លែងថ្មីមួយគឺរឿង”អ្នកបម្រើ០០៧” ដែលដឹកនាំ និងសម្តែងដោយនាយពាក់មី។ នាយពាក់មី និងតួឯកស្រីកញ្ញា រ៉ាប៊ី បានដាក់ក្តីរំពឹងខ្ពស់ថាភាពយន្តនេះនឹងទទួលបានការគាំទ្រច្រើនពីទស្សនិកជន។
ភាពយន្តថ្មីនេះបានដាក់សម្ពោធជាផ្លូវការនាល្ងាចថ្ងៃទី២២ វិច្ឆិកា ឆ្នាំ២០១៧នារោងភាពយន្តPrim Cineplexស្ថិតនៅក្នុងបរិវេនផ្សារទំនើបសុវណ្ណា។ នាយពាកមីបានថ្លែងប្រាប់ថារឿង”អ្នកបម្រើ០០៧”នេះមិនផ្តោតលើការអប់រំសង្គមអ្វីច្រើនប៉ុន្មាននោះទេគឺចំនុចជាគោលគ្រាន់តែចង់បង្ហាញការសើចសប្បាយកំប្លែងនិងវណ្ណៈមានអ្នកក្រ ។លោកអះអាងទៀតថាលោកនិពន្ឋរឿងថ្មីនេះឡើងយូរមកហើយព្រមទាំងថតចប់ក៏យូរដែរដោយរោងភាពយន្តមិនមានចម្លោះម៉ោងសម្រាប់ចាក់បញ្ចាំងទើបត្រូវពន្យាពេល។ ម្យ៉ាងទៀតខាងផលិតកម្មTown ទើបតែសម្រេចចាក់បញ្ចាំងរឿង”ទឹកចិត្តម្តាយសម័យថ្មី”លើកទី១ផ្ទុះផងនោះទើបវណ្ណកម្មទី២ ត្រូវពន្យាពេលចាក់។នាយពាក់មីថាលោកនៅមានស្នាដៃផលិតថ្មីៗជាច្រើនទៀតសម្រាប់បម្រើការកម្សាន្តរបស់ទស្សនិកជនហើយស្នាដៃថ្មីនេះលោករំពឹងថានឹងធ្វើឲ្យ ទស្សនិកជនបានសើចសប្បាយបំបាត់ភាពហត់នឿយពីការងារ។
តារាចម្រៀងកញ្ញារ៉ាប៊ីបានអោយដឹងដែរថានេះជាស្នាដៃដំបូងដែលនាងនឹងលោកពាក់ មីសម្តែងជាតួសំខាន់ជារួមគ្នា។កញ្ញាថាការសម្តែងជាមួយនាយពាក់ មីគឺសប្បាយហើយចូលចិត្តធ្វើអោយសើចទើបរំពឹងថាបងប្អូននឹងជួយគាំទ្រក្រោយពេលបញ្ចាំងជាផ្លូវការ។ វណ្ណកម្មទី២រឿង”អ្នកបម្រើ០០៧”របស់ផលិតកម្មថោនបានចំណាយពេលផលិតជាច្រើនខែនិងចំណាយទឹកប្រាក់ជិត៥ម៉ឺនដុល្លារអាមេរិកហើយចាប់ផ្តើមចាក់បញ្ចាំងចាប់ពីថ្ងៃ២៣ វិច្ឆិកា ឆ្នាំ២០១៧តទៅគ្រប់រោងភាពយន្តនៅភ្នំពេញ។រឿង”អ្នកបម្រើ០០៧”ដឹកនាំរឿងដោយពាក់ មីនិងលោកអ៊ិន រិទ្ឋីវិចិត្រ ជំនួយការដឹកនាំសម្តែងដោយលោករាជ ម៉ានុត លោកសឿ សំអាត ចាត់ការទូទៅដោយលោក ជួប សម្បត្តិ និងលោកជា សុភក្រ័។ ក្រៅពីតារាសម្តែងនាយពាក់ មី និកញ្ញារ៉ាប៊ី ក៏មានសិល្បករជាច្រើនចូលរួមសម្តែងផងដែរដូចជានាយគ្រឿន នាងខ្ញុង លោកសុវណ្ណរិទ្ធីហៅលោកតាវិចទ័រ នាយកៃដ លោកហាក់ សុខហេងនិងតារាកិត្តិយសជាច្រើនទៀត៕
ដោយ៖ វឌ្ឍនា