ខេត្តក្រចេះ៖ ក្រុមប្រជានេសាទដែលបានប្រើប្រាស់ឧបករណ៍នេសាទ ចាប់ត្រីជាលក្ខណៈគ្រួសារ នៅតាមដងទន្លេមេគង្គក្នុងខេត្តក្រចេះ បានត្អូញត្អែរថា ការប្រកបរបរចាប់ត្រីជាលក្ខណៈគ្រួសារ របស់ពួកគាត់ឆ្នាំនេះគឺរកចាប់ត្រីមិនបាន ដូចរាល់ឆ្នាំកន្លងទៅនោះទេ ប្រការនេះបានធ្វើឱ្យជីវភាពគ្រួសាររបស់ពួកគាត់ធ្លាក់ចុះមួយកម្រិត។ ចំណែកមន្ត្រីជលផល បានអះអាងថា ការខ្សត់ត្រីនៅឆ្នាំនេះ វាជារឿងធម្មជាតិ ណាមួយឆ្នាំនេះ គឺកម្ពស់ទឹកទន្លេមេគង្គឆ្នាំនេះតូច ធ្វើឱ្យពពួកត្រី មិនអាចតោងពងកូនបាន។
ក្រុមប្រជានេសាទបានលើកឡើងទៀតថា ជាធម្មតារាល់ឆ្នាំកន្លងទៅក្នុងមួយថ្ងៃ ពួកគាត់អាចបណ្តែតមងចាប់ត្រី បាន៥ទៅ១០គីឡូក្នុងមួយថ្ងៃ តែចម្លែកឆ្នាំនេះពួកគាត់បណ្តែតមងចាប់ត្រីមិនបានដោយក្នុងមួយថ្ងៃសឹងរកតែ៥គីឡូមិនបានផង ហើយពួកគាត់បានលើកឡើងថា អាចមកពីឆ្នាំនេះទឹកទន្លេមេគង្គតូច ធ្វើឱ្យត្រីមិនចុះមកខាងក្រោមដូចទឹកធំនោះទេ។
ជាមួយនិងត្រីក្សត់ បានធ្វើឱ្យតម្លៃត្រីទឹកទន្លេមេគង្គនៅលើទីផ្សារខេត្តក្រចេះ មានការឡើងផ្លៃខ្ពស់ ក្នុងនោះមានប្រភេទត្រី២ប្រភេទ គឺត្រីក្របីនិងត្រីឆ្កោក គឺមានតម្លៃ ៣ម៉ឺនទៅ៣ម៉ឺន៥ពាន់រៀលក្នុង១គីឡូក្រាម ហើយប្រភេទត្រីទាំង២នេះ គឺកំពុងត្រូវប៉ាន់សម្រាប់ជាអាហារប្រចាំថ្ងៃ ជាពិសេសនៅតាមអាហារដ្ឋាន តែងតែមកកាម្មង់ទិញត្រីនេះ សម្រាប់ធ្វើម្ហូបលក់ឱ្យភ្ញៀវបន្ត។
អ្នកស្រី ញ៉ែម សុខលាភ មានទីលំនៅសង្កាត់ក្រករ ក្រុងក្រចេះ ដែលតែងតែទៅទិញត្រី ធ្វើជាអាហារសម្រាប់គ្រួសាររបស់គាត់ បាននិយាយថា សព្វថ្ងៃនេះត្រីមិនសូវសម្បូរទេ មិនតែប៉ុណ្ណោះថែមទាំងមានតម្លៃថ្លៃទៀតផង តែបើចង់ទិញត្រីទាំងនេះបានទាល់តែគាត់ចូលផ្សារពីព្រឹក។
ដោយឡែកនាយរងខណ្ឌជលផលក្រចេះ លោក ម៉ុក ពន្លក បានលើកឡើងឱ្យដឹងដែរថា រឿងនេះវាជាកត្តាធម្មជាតិដោយសារឆ្នាំនេះ សភាពទឹកទន្លេមេគង្គឡើងតូចខុសពីរាល់ឆ្នាំ ហើយសន្ទុះទឹកភ្លៀងក៏មានការថយចុះដែរ ។លោកថាផ្ទៃទឹកទន្លេមេគង្គឆ្នាំនេះមានកម្ពស់ទាប បើធៀបជាមួយឆ្នាំទៅទឹកមានកម្ពស់២២ម៉ែត្រ តែឆ្នាំនេះទឹកមានកម្ពស់ត្រឹមតែជាង១៨ម៉ែត្រប៉ុណ្ណោះ។
លោកបន្តថា ទឹកតូចនេះហើយដែលធ្វើឱ្យមានត្រីតិច ដោយសារទឹកមិនហូរចូលព្រែក,បឹង ហើយត្រីមួយចំនួន ត្រូវការពងតោងនៅតាមព្រៃលិចទឹក តែបើប្រភេទត្រីទាំងនេះ ពងតោងនៅតាមព្រៃមាត់ទន្លេវិញ លោកថា វានឹងខូចទាំងអស់ ហើយកត្តានេះហើយដែលធ្វើឱ្យត្រីមួយចំនួនធំត្រូវបាត់បង់ទៅវិញ ដោយសារកម្ពស់ទឹកទន្លេមេគង្គមានកម្ពស់ទាប ៕
ដោយ៖ កោះទ្រុង
