ខេត្តកំពង់ស្ពឺ ៖ បុរស៣នាក់សង្ស័យស្រវឹងស្រា ជិះម៉ូតូដឹកគ្នាដោយល្បឿនលឿន បានបើកជែងយានយន្តផ្សេងៗ ជ្រុលចូលគន្លងផ្លូវម្ខាងទៀត រួចក៏រេចង្កូតប៉ះរថយន្តធុនធំ១គ្រឿង កំពុងបើកបញ្ច្រាសមកពីមុខបណ្តាលឲ្យដួលម៉ូតូ ខ្ទាតមនុស្សចូលក្រោមរថយន្ត ត្រូវរថយន្តកិនស្លាប់ទាំង៣នាក់ភ្លាមៗនៅកន្លែងកើតហេតុ។

គ្រោះថ្នាក់ចរាចរណ៍គួររន្ឋត់ខាងលើនេះ បានកើតឡើងកាលពីម៉ោង៥ និង៤០នាទីល្ងាចថ្ងៃទី៥ ខែធ្នូ ឆ្នាំ២០១៧ ស្ថិតនៅលើផ្លូវលេខ៤៤ ចន្លោះគីឡូម៉ែត្រលេខ១០៣-១០៤ ក្នុងភូមិត្បែងប្រជាប់ ឃុំប្រាំបីមុម ស្រុកថ្ពង។

រថយន្តបង្កម៉ាកហុីណូភ្លៅ៥ព៌ណលឿង ពាក់ស្លាកលេខព្រះសីហនុ៣A-០៨៩៨ អ្នកបើកបរមិនស្គាល់ឈ្មោះ។ ចំណែកម៉ូតូរងគ្រោះម៉ាកហុងដាឌ្រីមc១២៥ ព៌ណខ្មៅ ពាក់ស្លាកលេខភ្នំពេញ១GH-០៣៤៧ ព៌ណ លឿង បើកបរដោយឈ្មោះ

1-ឈ្មោះ ហ៊ុន សៅរិទ្ធ  ភេទប្រុស អាយុ 24ឆ្នាំ នៅភូមិត្រពាំងខ្នា ឃុំពោធិ៍ម្រៀល ស្រុកបសេដ្ឋ  ខេត្តកំពង់ស្ពឺ  មានប្រពន្ធនៅភូមិស្មិត ឃុំមានជ័យ ស្រុកឧដុង្គ ខេត្តកំពង់ស្ពឺ មានមួកសុវត្ថិភាព ។

2-ឈ្មោះ ច័ន្ទ  រស្មី  ភេទប្រុស  អាយុ 18ឆ្នាំ នៅភូមិស្មិត ឃុំមានជ័យ មានមួកសុវត្ថិភាព។

3-ឈ្មោះ ថា  រ៉េត ភេទប្រុស អាយុ 18 ឆ្នាំ  នៅភូមិស្មិត ឃុំមានជ័យ។

សាក្សីនៅកន្លែងកើតហេតុ បានរៀបរាប់ប្រាប់ប៉ូលីសចរាចរថា មុនពេលកើតហេតុ គេឃើញជនរងគ្រោះទាំង៣នាក់ ជិះម៉ូតូដឹកគ្នាយ៉ាងលឿន ដោយសង្ស័យស្រវឹងស្រា បើកជ្រែយានយន្តផ្សេងៗតាមដងផ្លូវ ទិសដៅពីកើតទៅលិច ដោយ​មានពាក់មួកសុវត្ថិភាពគ្រប់គ្នា។លុះដល់កន្លែងកើតហេតុ ម៉ូតូបានជ្រុលចូលគន្លងផ្លូវម្ខាងទៀតនៅខាងឆ្វេង ដៃ ស្របពេលនោះក៏មានរថយន្តបង្ក១គ្រឿងបើកបរពីលិចទៅកើត បញ្ច្រាសទិសមកដល់ដែរ ហើយម៉ូតូបានរេចង្កូត កៀររថយន្តនោះបណ្តាលឲ្យដួលខ្ទាតជនរងគ្រោះទាំង៣ នាក់ចូលក្រោមរថយន្ត បណ្តាលឲ្យកិនស្លាប់ភ្លាមៗ។ចំណែកម៉ូតូ ខ្ទាតចេញក្រៅ ខូចខាតតិចតួច។

ប្រភពដដែលបន្តទៀតថា ក្រោយកិនមនុស្សស្លាប់ ជនបង្កព្យាយាមបើករថយន្ត រត់គេចខ្លួនពីកន្លែងកើតហេតុ ទើបកំលាំងនគរបាលស្រុក សហការជាមួយ សមត្ថកិច្ចស្រុកឧដុង្គ ឃាត់បាននៅឃុំវាលពង់ ស្រុកឧដុង្គ ។ ចំពោះអត្តសញ្ញាណប័ណ្ណឈ្មោះ ម៉ី សៅរី  ភេទប្រុស អាយុ52ឆ្នាំ គឺជារបស់ឪពុកជនរងគ្រោះ​  មិនស្ថិតនៅក្នុងហេតុការនេះទេ។

សពជនរងគ្រោះទាំង៣នាក់ ត្រូវសមត្ថកិច្ចជំនាញ បានប្រគល់ជូនសាច់ញាតិយកទៅធ្វើបុណ្យតាមប្រពៃណី។

ចំណែកវត្ថុតាង រថយន្តនិង ម៉ូតូសមត្ថកិច្ចូ  យកមករក្សាទុកនៅអធិការដ្ឋាន ចាត់ការតាមនីតិវិធី   ៕ សេនាស័ក្តិ