ភ្នំពេញ៖ បុរសមានសតិមិនប្រក្រតីម្នាក់ត្រូវបានបាត់ខ្លួន កាលពីវេលាម៉ោង៥ល្ងាច ថ្ងៃទី២៣ ខែតុលា ឆ្នាំ២០១៥ នៅចំណុចភូមិស្រែអំពិល សង្កាត់ស្នោ ខណ្ឌពោធិ៍សែនជ័យ រាជធានីភ្នំពេញ លុះដល់វេលាម៉ោង៨និង៣០នាទីព្រឹកថ្ងៃទី២៤ ខែឆ្នាំដដែលទើបប្រទះឃើញសពនៅមាត់បឹងបង្កអោយ មានការណ៍ភ្ញាក់ផ្អើលដល់ប្រជាពលរដ្ឋដែលនៅក្បែរ ។
ស្ត្រីឈ្មោះ ចាន់ អេង អាយុ៥០ឆ្នាំ ជាស្ត្រីមេម៉ាយ មានមុខរបរដកព្រលិតលក់ ត្រូវជាម្តាយរបស់ជនរងគ្រោះបានឱ្យដឹងថា កូនរបស់គាត់ឈ្មោះ សំណាង ហៅប៉ូឡូ អាយុ១៨ឆ្នាំ ជាមនុស្សមានសតិមិនប្រក្រតី (មិនគ្រប់ទឹក) ។
លោក ខុន វ៉ាន់នី អាយុ៥២ឆ្នាំ ប្រជាពលរដ្ឋរស់នៅម្តុំកន្លែងកើតហេតុបានឱ្យដឹងថា មុនពេលកើតហេតុ គាត់បានឃើញជនរងគ្រោះកាន់ស្រាថ្នាំ១ដប បាយ១កញ្ចប់ សម្លរ១ថង់ មកអង្គុយស៊ីផឹកម្នាក់ឯង ខណៈផឹកបានបន្តិចក៏ងើបដើរសំដៅទៅមាត់ទឹក ក៏ស្រែកសួរថា ឯងទៅណា ជនរងគ្រោះក៏ឆ្លើយថាទៅនោម តែដោយបាត់យូរពេកគាត់ក៏ស្រែកហៅ តែមិនឮតបក៏ដើរទៅរកមើលស្រាប់តែប្រទះឃើញខោអាវ និងស្បែកជើងជនរងគ្រោះនៅមាត់ទឹក ពេលនោះគាត់ភ័យណាស់ក៏រត់មកយកម៉ូតូជិះទៅប្រាប់អ្នកភូមិឱ្យដឹង និងមកជួយរាវរកជនរងគ្រោះទាំងអស់គ្នា តែរហូតមកដល់ពេលនេះម៉ោងជិត៨ទៅហើយនៅមិនទាន់រកឃើញនៅឡើយទេ ។
លុះមកដល់វេលាម៉ោង៨និង៣០នាទីព្រឹកទើបប្រជាពលរដ្ឋនាំគ្នាមករាវម្តងទៀតទើបប្រទះឃើញជនរងគ្រោះស្លាប់បាត់ទៅហើយ និងរាយការណ៍ទៅសមត្តកិច្ចចុះពិនិត្យជាក់ស្តែកថាពិតជាស្លាប់ដោយសារលង់ទឹកពិតប្រាកដមែន ទើបប្រគល់អោយក្រុមគ្រួសារយកទៅធ្វើបុណ្យតាមប្រពៃណី ៕
ដោយ៖ សុខា សែនជ័យ
