កាលពីថ្ងៃទី២៦ ខែតុលា យន្ដហោះ ប៊ូអ៊ីង៧៣៧របស់ក្រុមហ៊ុនអាកាសចរណ៍ British Airway ត្រូវចុះចតជាបន្ទាន់ ដោយពោះទទេក្នុងអាកាសយានដ្ឋាននៅអាហ្វ្រិកខាងត្បូងក្រោយពីជ្រុះបាត់កង់ ធ្វើឱ្យអ្នកដំណើរស្រែកទ្រហោយំពេញ យន្ដហោះដោយសារតែការចុះចតបែបនេះអាចសង្ឃឹមរួចផុតពីក្ដីស្លាប់តែ៥០ភាគរយប៉ុណ្ណោះ ។
សាក្សីនៅកន្លែងកើតហេតុបានឱ្យដឹងថា យន្ដហោះប៊ូអីង៧៣៧ ដែលជ្រុះបាត់ កង់ហើយចុះចតដោយពោះទទេបានធ្វើឱ្យស្លាបមួយចំហៀងបាក់ផងដែរដោយសារតែពេលចុះចតយន្ដហោះផ្អៀងមួយចំហៀងទៅប៉ះនឹងផ្លូវ ។
នៅពេលដែលអាកាសយានិកសម្រេច ចុះចតដោយយន្ដហោះជ្រុះកង់បាត់នោះ ធ្វើឱ្យមនុស្សនៅជុំវិញអាកាសយានដ្ឋានតក់ស្លុតយ៉ាងខ្លាំងពេលបាតយន្ដហោះប៉ះនឹងផ្លូវបង្កឱ្យមានសំឡេងយ៉ាងខ្លាំងអូសបន្លាយរហូតដល់យន្ដហោះឈប់ ។
ភ្លាមៗនោះក្រុមអ្នកជួយសង្គ្រោះក៏ បានជម្លៀសអ្នកដំណើរទាំង៩៤នាក់ជា បន្ទាន់ទៅកាន់តំបន់មានសុវត្ថិភាព ។ ប៉ុន្ដែអ្នកដំណើរខ្លះនៅមានភាពស្លេកស្លាំង នៅឡើយ ហើយខ្លះទៀតត្រូវបានបញ្ជូន ទៅកាន់មន្ទីរពេទ្យដោយភ័យខ្លាំងពេក។ នៅមុនពេលចុះចតអាកាសយានិកបាន ប្រកាសឱ្យអ្នកដំណើរបានដឹងដើម្បីត្រៀម ស្មារតីទុកជាមុន ៕
ប្រែសម្រួល៖ ម៉ែវ សាធី
