ភ្នំពេញ៖ ហេតុការណ៍គ្រោះថ្នាក់ចរាចរណ៍មួយបណ្តាលអោយស្រី្តម្នាក់ និងក្មេងតូចម្នាក់ត្រូវរងរបួសធ្ងន់ ចំណែកបុរសជាប្តីរងរបួសស្រាល ដោយករណីនេះបង្កឡើងដោយសាររថយន្តកូរ៉េមួយតោនកន្លះ១គ្រឿងបើកបរលឿនជ្រុលបុកជនរង់គ្រោះប្តីប្រពន្ធនឹងកូនដែលកំពុងជិះម៉ូតូឌុបគ្នា បំណងឆ្លងផ្លូវវេងស្រេង ស្ថិតចំណុចទប់មុខខ្លោងទ្វារវត្តគោកបញ្ចាន់ ភូមិត្រពាំងថ្លឹង សង្កាត់ចោមចៅ ខណ្ឌពោធិសែនជ័យ កើតឡើងកាលពីវេលាម៉ោង ១៥ នឹង ២០ នាទីរសៀលថ្ងៃទី ២៧ ខែតុលា ឆ្នាំ ២០១៥ ។
យោងតាមប្រភពព័ត៌មានពីសាក្សីដែលបាន ឃើញហេតុការណ៍បានអោយដឹងថា មុនពេលកើត មានករណីគ្រោះថ្នាក់ចរាចរណ៍ខាងលើនេះគឺ ដំបូងឡើយគេសង្កេតឃើញជនរងគ្រោះ ប្តីប្រពន្ធនឹងកូនប្រុស តូចម្នាក់បានជិះម៉ូតូ មួយគ្រឿងម៉ាក សេ ១២៥ សេរីឆ្នាំ ពណ៌ខ្មៅ ពាក់ស្លាកលេខ ភ្នំពេញ ១CB ៨៣២៩ បានឌុបគ្នាធ្វើដំណើរចេញពីផ្ទះ តាមបណ្តោយផ្លូវវេងស្រេងគោលបំណងយកកូនទៅមន្ទីរពេទ្យ ប៉ុន្តែកំពុងជិះបំណងឆ្លងផ្លូវស្រាប់មានរថយន្តកូរ៉េ មួយតោនកន្លះមួយគ្រឿង ពណ៌ខៀវ ពាក់ស្លាកលេខ ភ្នំពេញ ២ M 2445 ដែលកំពុងបើកបរធ្វើដំណើរតាមបណ្តោយផ្លូវវេងស្រេងទិសដៅពីកើតទៅលិច ស្របទិសគ្នា ក្នុងល្បឿនយ៉ាងលឿន ហើយជ្រុលល្បឿនជាន់ហ្វ្រាំងមិនទាន់ ក៏បុកចំម៉ូតូ ៣នាក់ ប្តីប្រពន្ធនឹងកូន កំពុងជិះបម្រុងឆ្លងផ្លូវពីមុខ ពេញទំហឹង បណ្តាលអោយជនរងគ្រោះទាំង៣នាក់ខ្ទាតចេញពីម៉ូតូ បោកក្បាលនឹងរងរបួសធ្ងន់ធ្ងរ ចំណែករថយន្តបង្កហេតុបាន ព្យាយាមបើករត់ប៉ន្តែជាប់ម៉ូតូនៅក្រោយរថយន្តទើបមិនអាចបើកទៅមុខរួច គឺគ្រាន់តែអូសម៉ូតូនៅក្រោមរថយន្តជាង២០ ម៉ែត្រ ពីចំណុចកើតហេតុក៏អ្នកបើកបរថយន្តកូរេចុះរត់គេច្លួនចោលរថយន្តភ្លាមៗតែម្តងទៅ ។
សមត្ថកិច្ចមូលដ្ឋានបានអោយដឹកថា ក្រោយកើតហេតុ ម្តាយ និងក្មេងប្រុសដែលរងរបួសធ្ងន់ត្រូវដឹកបញ្ជូនៅសង្គ្រោះនៅមន្ទីរពេទ្យឯកជនភ្លាម ៗ ហើយករណីនេះសមត្ថកិច្ចឃាត់បានតែព្រូរថយន្តតែប៉ុណ្តោះ ចំណែកអ្នកបើកបានគេចខ្លួនបាត់ ស្រមោល ប៉ុន្តែត្រូវបានគេស្គាល់ ឈ្មោះយឿន ភេទប្រុស អាយុជាង២០ឆ្នាំ។
ចំពោះអត្តសញ្ញាណជនរង់គ្រោះទាំង៣ នាក់ ប្រពន្ធឈ្មោះ ចែម ថាត អាយុ ២៧ ឆ្នាំ ប្តីឈ្មោះ សៅ សំបូ អាយុ ២៥ ឆ្នាំ ចំណែកក្មេងប្រុតូចអាយុជាង២ ឆ្នាំ មិនទាន់ស្គាល់អត្តសញ្ញាណទេ ពួកគាត់ស្នាក់នៅសង្កាត់ ចោមចៅ ខណ្ឌពោធិ៍ជ័យ និងមានស្រុកកំណើតភូមិថ្នល់កែង ឃុំពង្រ ស្រុកបារាយ ខេត្តកំពង់ធំ ។
សមត្ថកិច្ចបញ្ជាក់ថា ក្រោយកើតហេតុសមត្ថកិច្ចបានវាស់វែងអូសយករថយន្តបង្កហេតុ និងម៉ូតូជនរងគ្រោះ យកទៅកាន់អធិការដ្ឋាននគរបាលខណ្ឌពោធិ៍សែនជ័យ រងចាំដោះស្រាយតាមផ្លូវច្បាប់ ៕
ដោយ៖ សុខា សែនជ័យ
