ភ្នំពេញ៖ អតីតតារាចម្រៀងប្រចាំផលិតកម្ម Big Man លោក តុលា ហៅឡា បានសម្រេចចិត្តផ្លាស់ប្ដូរទៅកាន់ទ្រនំផលិតកម្ម Diamond Music វិញម្ដង ក្រោយបញ្ចប់កុងត្រា ៥ ឆ្នាំរួចមក។
ក្រោយចូលច្រៀងនៅផលិតកម្មថ្មីភ្លាម តារារូបនេះទើបនឹងចេញលក់បទថ្មីភ្លាមៗនៅលើទីផ្សារក្រោយពីស្ងប់ស្ងាត់មួយរយៈពេលដែលតារាចម្រៀងរូបនេះរំពឹងខ្ពស់ទៅលើទីផ្សារ។
យ៉ាងហោចណាស់មានបទចម្រៀងចំនួន៤បទបន្តបន្ទាប់គ្នាត្រូវបានតារាចម្រៀង ឡា ចេញលក់នៅទៅផ្សារហើយតារារូបនេះក៏ត្រៀមខ្លួនក្នុងការចេញថតជាMV នៅពេលដ៏ខ្លីខាងមុខផងដែរ។ បទចម្រៀងទាំងអស់សុទ្ធតែទទួលបានការគាំទ្រច្រើនបង្គួរពីក្រុមយុវវ័យពិសេសគឺបទ«បេះដូងអូននៅនឹកគេមែនទេ»ក្នុងCDវ៉ុល៣៥ របស់ផលិតកម្ម Daimond។
អតីតតារាឯក ហុងដា ខាងលើបន្តថា រូបគេបានសម្រេចចិត្តចុះកុងត្រាជាមួយផលិតកម្មជាមួយ Diamond Music រយៈពេល ៣ ឆ្នាំបន្តទៀត ហើយជាការចាប់ផ្ដើម រូបគេក៏ត្រៀមចេញបទចម្រៀងថ្មីមួយចំនួនផងដែរ។ ក្នុងនោះបទដែលលោករំពឹងទទួលបានការគាំទ្រខ្ពស់ផងដែរគឺបទ “អាយុមិនអស់ បងនៅតែស្រលាញ់អូន” ។តារាវ័យ ២៨ ខាងលើបន្ថែមទៀតថា ទ្រនំថ្មីមានតារាចម្រៀងល្បីឈ្មោះជាច្រើនរូបដូចជា ជុំ លីណូ ជាដើម ជាហេតុនាំឱ្យរូបគេសង្ឃឹមថា នឹងអាចអភិវឌ្ឍន៍សមត្ថភាពបន្ថែមទៀតក្នុងអាជីពចម្រៀង។ ម្យ៉ាងទៀត ផលិតកម្មខាងលើក៏កំពុងមានការទទួលស្គាល់ពីមហាជនទូទៅ ហើយរូបគេក៏កំពុងសម្រាំងបទចម្រៀងបន្ថែមទៀត ដើម្បីបង្កើនប្រជាប្រិយភាព។តារាចម្រៀងរូបនេះបញ្ជាក់ដែរថាការចាកចេញផលិតកម្មចាស់មិនមានបញ្ហាអ្វីនោះទេគឺដោយសារការចង់ផ្លាស់ប្តូរផលិតកម្ម បទពិសោធន៍ ជាដើម។
តារាចម្រៀងមានប្រភពមកពីខេត្តបាត់ដំបងខាងលើ ស្នើឱ្យប្រិយមិត្តបន្តគាំទ្ររូបគេ ទោះបីជាផ្លាស់ប្ដូរផលិតកម្មក៏ដោយ។ រូបគេអះអាងថា នឹងសហការជាមួយផលិតកម្ម ដើម្បីបង្កើតបទចម្រៀងស្នាដៃថ្មីៗ បំពេញតាមការចង់បានរបស់អ្នកស្ដាប់ដោយយល់ឃើញថា ពួកគេចូលចិត្តស្ដាប់បទចម្រៀងជាស្នាដៃបង្កើតថ្មីជាងស្នាដៃថតចម្លង៕
ដោយ៖ វឌ្ឍនា
