ភ្នំពេញ៖ លោក អ៊ាម វន្នី អ្នកចំរៀងវ័យក្មេង ប្រកបដោយទេពកោសល្យ និងមានសមត្ថភាពក្នុងការនិពន្ធបទចំរៀង ទំនុកច្រៀង ជំនាញដេញហ្គីតា គួបផ្សំនឹងទឹកដមសំណៀងដ៏ពិរោះរណ្តំទៀតនោះ បានក្លាយទៅជាការចាប់អារម្មណ៍យ៉ាងខ្លាំងពីប្រជាពលរដ្ឋ ទស្សនិកជនរាប់ពាន់ រាប់ម៉ឺននាក់ ខណៈឃើញលោកអ៊ាម វន្នី បានបង្ហើសំណៀងជាមួយការអំពាវនាវឲ្យប្រជាពលរដ្ឋគ្រប់ស្រទាប់វណ្ណៈចូលរួមបរិច្ចាគវិភាគទានជួយទ្រទ្រង់ដល់មន្ទីរពេទ្យគន្ធបុប្ផាសម្រាប់ជា ការជួយក្នុងសង្គមនោះ ។
នាថ្ងៃទី២៦ ទី២៧ ខែតុលា ឆ្នាំ២០១៥ ក្នុងពិធីបុណ្យអុំទូក អកសំបុកសំពះព្រះខែ និងលយប្រទីបនៅក្រុងបាត់ដំបង លោក អ៊ាម វន្នី រួមជាមួយសិល្បករ សិល្បការិនី តារាចម្រៀង ក៏ដូចជាក្រុមយុវជន បានចូលរួមវេទិកាប្រគំតន្ត្រីយ៍ជាមួយសំឡេងគាំទ្រដ៏កងរំពង គាំទ្រយ៉ាងខ្លាំងពីសណ្តានចិត្តរបស់អ្នកចំរៀងវ័យក្មេងបានចូលរួមយ៉ាងសំខាន់ក្នុងការជួយសង្គម តាមរយៈវិស័យសិល្បៈ ។
លោក អ៊ាម វន្នី បាននិយាយថា ខ្ញុំសែនសប្បាយ និងរន្ធត់ចិត្តបំផុត ខ្ញុំតែងតែញញឹមមិនដាច់ពីមាត់ចំពោះការគាំទ្រពីបងប្អូន ពុកម៉ែ ប្រជាពលរដ្ឋបានគាំទ្រនូវការច្រៀង ក៏ដូចជាបទចំរៀងដែលខ្ញុំនិពន្ធ ក្នុងនោះនាថ្ងៃទី២៧ ខែតុលា ឆ្នាំ២០១៥ បញ្ចប់កម្មវិធីបុណ្យអុំទូកនាក្រុងបាត់ដំបង ទស្សនិកជនគាំទ្ររាប់ពាន់នាក់បានសំណូមពរឲ្យខ្ញុំច្រៀងយ៉ាងតិច៧បទ ខ្ញុំក៏បានច្រៀងបទពីសម័យដើមទាំងអស់ ។
លោកអ៊ាម វន្នី បានបន្តថា នៅក្នុងកម្មវិធីនេះផងដែរ មិនត្រឹមតែខ្ញុំបានចូលរួមជាមួយនឹងក្រុមយុវជនដើម្បីប្រមូលថវិកាសម្រាប់ឧបត្ថម្ភ ទ្រទ្រង់ដល់មន្ទីរពេទ្យគន្ធបុប្ផាប៉ុណ្ណោះទេ រូបខ្ញុំផ្ទាល់ក៏បានចំណាយថវិកាមួយចំនួនសម្រាប់ឧបត្ថម្ភចូលរួមចំណែកផងដែរ ។
លោក អ៊ាម វន្នី បាននិយាយដោយក្តីរំពឹងទុកជាមុនថា ជាគម្រោងខ្ញុំនឹងស្នើទៅមន្ទីរពាក់ព័ន្ធ ជាមួយនឹងអាជ្ញាធរខេត្តដើម្បីនិពន្ធបទចំរៀងនៅក្នុងទិដ្ឋភាពទឹកដីក្រុងបាត់ដំបង ដែលមានការអភិវឌ្ឍថ្មីៗជាច្រើនកន្លែងផងដែរ ។
គួររំលឹកផងដែរថា មួយរយៈកន្លងទៅ លោកអ៊ាម វន្នី តែងតែទទួលរងការរិះគន់យ៉ាងខ្លាំងពីក្រុមព្យាយាមបំផ្លើស និងបន្ទោសបង្អាប់ ដោយចោទប្រកាន់ថា លោកអ៊ាម វន្នី ជាអ្នកដំកើងឫក ជាអធិរាជអ្នកចំរៀង ប៉ុន្តែកត្តាជាក់ស្តែង ខ្លួនពុំបានដឹង ពីហេតុការណ៍ទាំងនេះសោះ ។ វន្នី បានប្រាប់នគរវត្តយ៉ាងខ្លីថា ខ្ញុំមិនដែលនិយាយអំពីព័ត៌មានអ្វីទាំងអស់ មុនពេលចាកចេញ និងក្រោយពេលចាកចេញដោយការធ្លាក់ក្នុងកម្មវិធី Cambodian Idol ប៉ុន្តែមានមនុស្សមួយចំនួនបានយករូបខ្ញុំទៅបង្ហោះ រួចហើយសរសេរ និងបញ្ចេញទស្សនៈថាខ្ញុំជាអ្នកដំកើងឫក ក្រអឺតក្រទម សុទ្ធតែមិនមែនជារឿងពិត ព្រោះខ្ញុំគោរពស្រឡាញ់ទស្សនិកជន ម៉ែឪទាំងអស់គ្នាណាស់ ៕
ដោយ៖ សុខ ខេមរា
