ខេត្តកណ្តាល៖ ការប្រកួតជ្រើសរើសជើងឯកកីឡាអេឡិចត្រូនិកថ្នាក់ជាតិឬហៅថា CCC ប្រចាំឆ្នាំ២០១៥ បាន រកឃើញជើងឯក តំណាងឲ្យខេត្តក្រុងនៅតំបន់ទី១ទៅចូលរួមការប្រកួតវគ្គផ្ដាច់ព្រ័ត្រក្នុងកម្មវិធីបុណ្យសមុទ្រនាខេត្តកំពត ថ្ងៃទី១១-១២ខែធ្នូឆ្នាំ២០១៥។
ការប្រកួតកីឡា E-Sports នៅតំបន់ទី១បានប្រព្រឹត្តទៅចំនួន៤ខេត្ត គឺខេត្តស្វាយរៀង កំពង់ចាម ព្រៃវែង និងខេត្តកណ្តាល ចាប់ពីថ្ងៃទី១៩ដល់ ថ្ងៃទី២៤ ខែតុលា កន្លងទៅ។ ជាលទ្ធផលក្រុមដែលទទួលបានជ័យលាភីចំនួន២ក្រុមទី១-ក្រុម You Will Know មកពីខេត្តកណ្តាល និងក្រុម Over Come មកពីខេត្តស្វាយរៀងតំណែងឲ្យតំបន់ទី១ទៅប្រកួតវគ្គផ្តាច់ព្រ័ត្រ។
ក្រុម You Will Know មុនឈានទៅវគ្គផ្តាច់ព្រ័ត្រ ក្រុមនេះ ប្រកួតឈ្នះក្រុម The Fire Five មកពីខេត្តកំពង់ចាមដោយលទ្ធផល ៥-២ នៅវគ្គពាក់កណ្តាលផ្តាច់ព្រ័ត្រ ខណៈដែល ក្រុម Over Come បានយកឈ្នះក្រុម Secret Hurricane មកពីខេត្តកណ្តាលដោយលទ្ធផល ៥-៤ នៅវគ្គពាក់កណ្តាលផ្តាច់ព្រ័ត្រដូចគ្នា។
ក្រុមទាំងពីរនេះមិនទាន់ដឹងថា ក្រុមណាជាក្រុមលេខ១ ឬលេខ២នោះទេ ដោយពួកគេត្រូវប្រកួតគ្នានៅក្នុងកម្មវិធីបុណ្យសមុទ្រដើម្បីស្វែងរកក្រុមលេខ១ទទួលបានប្រាក់រង្វាន់១,៥០០ដុល្លារ និងក្រុមលេខ២ទទួលបាន១,០០០ដុល្លារ មុនឈានដល់វគ្គផ្តាច់ព្រ័ត្រទូទាំងប្រទេស។
សម្រាប់ការប្រកួតនៅតំបន់ទី១ដែលមានខេត្តចំនួន៤ខាងលើមានក្រុមចូលរួមប្រកួតសរុបចំនួន១០ក្រុម បានបែងចែកជា២ពូលគឺពូល A មានក្រុម៥ក្រុម និងពូល B មាន៥ក្រុមដើម្បីប្រកួតជម្រុះរហូតដល់វគ្គពាក់កណ្តាលផ្តាច់ព្រ័ត្រ។
សហព័ន្ធកីឡាអេឡិចត្រូនិកកម្ពុជា បានសហការជាមួយគណៈកម្មាធិការជាតិអូឡាំពិកកម្ពុជា និងទទួលបានគាំទ្រពីក្រសួងទេសចរណ៍ និង ICT Cambodia បានប្រកាសថា ការប្រកួតវគ្គផ្តាច់ព្រ័ត្រ មាន១៦ក្រុម មកពីតំបន់ទាំង៦នឹងធ្វើឡើងនៅថ្ងៃទី១១-១២ ខែធ្នូ ឆ្នាំ២០១៥នៅពិធីបុណ្យសមុទ្រក្នុងខេត្តកំពត។ ប្រាក់រង្វាន់ជយលាភីក្រុមលេខ១ទទួលបាន៣០០០ដុល្លារ លេខ២ទទួលបាន២០០០ដុល្លារ និងលេខ៣ទទួលបាន៥០០ដុល្លារ៕
ដោយ៖ សារីម
