ភ្នំពេញ៖ មេខ្យល់៥នាក់ និងនារី ជាជនរងគ្រោះចំនួន៤នាក់ ត្រូវបានកម្លាំងនគរបាលការិយាល័យ ប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាល រាជធានីភ្នំពេញឃាត់ខ្លួន និងជួយរំដោះក្នុងករណីជួញដូរនារីក្រមុំវ័យក្មេង ទៅរៀបការដោយខុសច្បាប់ នៅប្រទេសចិន ។
ប្រតិបត្តិការនេះធ្វើឡើងនៅព្រឹក និងរសៀលថ្ងៃទី២៩ ខែតុលា ឆ្នាំ២០១៥ នៅទល់វិទ្យាល័យព្រះយុគន្ធរ សង្កាត់បឹងកេងកង២ ខណ្ឌចំការមនដោយបានឃាត់ខ្លួនមនុស្ស៥នាក់ ក្នុងនោះមានមេខ្យល់ម្នាក់ជាស្ត្រី ។
លោក ស្រេង ហុង ប្រធានផ្នែកនគរបាលការិយាល័យ ប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាល រាជធានីភ្នំពេញបានឲ្យដឹងថា កិច្ចប្រតិបត្តិកាននេះដែរក្រោមការសម្របសម្រួលតាមផ្លូវច្បាប់ ពីសំណាក់លោក មាស ច័ន្ទពិសិដ្ឋ ព្រះរាជអាជ្ញារង អមសាលាដំបូងរាជធានីភ្នំពេញហើយនៅរសៀលថ្ងៃដដែល បានឈានទៅឆែកឆេរ នៅផ្ទះលេខ១៧៩ ភូមិ១៧ ផ្លូវ២៥១ សង្កាត់បឹងសាឡាង ខណ្ឌទួលគោកឃាត់ខ្លួន មេខ្យល់ជាស្ត្រី៤នាក់ និងជួយសង្គ្រោះនារីរងគ្រោះ ចំនួន៤នាក់។
ក្រោយចាប់ខ្លួនជនសង្ស័យ និងជនរងគ្រោះ ត្រូវបាននាំយកទៅសួរនាំបន្ត នៅការិយាល័យ ដើម្បីកសាងសំណុំរឿង បញ្ជូនទៅកាន់សាលាដំបូងរាជធានីចាត់ការតាមនីតិវិធី ហើយក្នុងនោះនារីរងគ្រោះ ទាំង៤នាក់ត្រូវបានសមត្ថកិច្ចអប់រំណែនាំ ហើយហៅអាណាព្យាបាល មកទទួលយកត្រឡប់ទៅផ្ទះវិញនិងឈប់ឲ្យចាញ់បោកគេទៀត ៕
ដោយ៖ ប្រាថ្នា
