ខេត្តពោធិ៍សាត់៖ តាមប្រភពនានាពីប្រជានេសាទរស់នៅផ្ទះផែបណ្ដែតលើផ្ទៃទឹកសាប តំបន់បឹងទន្លេសាប ក្នុងភូមិសាស្ដ្រស្រុកចំនួន៣នៃខេត្តពោធិ៍សាត់រាយការណ៍មកថា គេនៅចាំបានថា កាលពីចុងខែកញ្ញា ឆ្នាំ២០១៥ មន្ដ្រីជំនាញរដ្ឋបាលជលផលខេត្តពោធិ៍សាត់បានចុះស្រង់ទូរលេខបែបលាក់លៀមទៅលើការចិញ្ចឹមត្រីខុសច្បាប់ (រ៉ស់ ឆ្ដោ) ដែលត្រីនេះនាំឱ្យកើតមានបទល្មើសផ្សេងៗជាច្រើនសន្ធឹកសន្ធាប់ ប៉ុន្ដែមិនទាន់មានវិធានការបង្ក្រាបនៅឡើយ ។
ប្រភពបន្ដថា ការមន្ដ្រីចុះស្រង់ទូរលេខការចិញ្ចឹមត្រីរ៉ស់ ត្រីឆ្ដោ គឺជាបញ្ហាអង្គភាពរបស់ខ្លួន ប៉ុន្ដែការចុះស្រង់មិនត្រឹមត្រូវនោះទេ ព្រោះគេដឹងថា ការស្រង់បានត្រឹមតែជាង៥០០បែរត្រី ស្មើនឹង ជាង៥០០គ្រួសារដែរប៉ុណ្ណោះ ការពិតប្រជាពលរដ្ឋរស់នៅផ្ទះផែបណ្ដែតទឹកលើផ្ទៃបឹងទន្លេសាប បើយើងគិតចាប់ពីព្រំប្រទល់ខេត្តកំពង់ឆ្នាំងរហូតដល់ព្រំប្រទល់ខេត្តបាត់ដំបង មានចំនួនច្រើនភូមិគ្រប់គ្រង៣ស្រុក គឺស្រុកក្រគរ, ស្រុកកណ្ដៀង និងស្រុកបាកាន នៃខេត្តពោធិ៍សាត់ ដូច្នេះប្រជាពលរដ្ឋមានចំនួនច្រើនភូមិ ឃុំ រាប់ពាន់គ្រួសារឯណោះ ។
ប្រភពបន្ដទៀតថា ការចិញ្ចឹមប្រភេទត្រីរ៉ស់ ឆ្ដោ ជាត្រីស៊ីត្រីជាចំណី នាំឱ្យវិនាសហិនហោចមច្ឆជាតិ ហើយបង្កើនបទល្មើសច្រើនរួមមានបទល្មើសប្រភេទឧបករណ៍ថ្មីទំនើប (បរ.ឈ្នក់.អួនហ៊ុំ) សុទ្ធតែឧបករណ៍ល្មើសច្បាប់ស្ដីពីជលផល ហើយមិនទាន់ឃើញជំនាញមានវិធានការនៅឡើយទេ ហើយមន្ដ្រីរដ្ឋបាលជលផលចុះស្រង់ការចិញ្ចឹមត្រីខុសច្បាប់ខាងលើ មិនត្រឹមត្រូវនោះឡើយ ព្រោះចំនួនការចិញ្ចឹមត្រីរ៉ស់ ឆ្ដោ ជាប្រភេទត្រីស៊ីត្រីជាចំណីមានចំនួនស្ទើរតែ ១០០ភាគរយ នៃប្រជាពលរដ្ឋតាមភូមិនីមួយៗ ឬមួយមន្ដ្រីខាងលើ មានចេតនាធ្វើរបាយការណ៍ភូតកុហកថ្នាក់លើរបស់ខ្លួន? ៕
ដោយ៖ ប៉ឹម ពិន
