ខេត្តស្វាយរៀង៖ យុវជនពីរនាក់បានស្លាប់គួរឲ្យសង្វេគបំផុត ខណៈមានករណីគ្រោះថ្នាក់ចរាចរណ៍កើតឡើងរវាងរថយន្តបុកនឹងម៉ូតូបន្តគ្នា កាលពីវេលាម៉ោង ១៩និង១០នាទី ថ្ងៃទី២៩ ខែតុលា ឆ្នាំ២០១៥ នៅលើផ្លូវជាតិលេខ១ ត្រង់ចំណុចចន្លោះគីឡូម៉ែត្រលេខ១៥៦ លេខ១៥៧ ស្ថិតនៅក្នុងភូមិព្រៃផ្ដៅ សង្កាត់ច្រកម្ទេស ក្រុងបាវិត ខេត្តស្វាយរៀង ។
សមត្ថកិច្ចនគបាលក្រុងបាវិតបានឲ្យដឹងថា រថយន្ត១គ្រឿង ម៉ាកCAMRY ពណ៍ទឹកប្រាក់ ពាក់ស្លាកលេខ ភ្នំពេញ ២X-៧០៧៤ បើកបរពីកើតទៅលិច លុះមកដល់កន្លែង កើតហេតុ ក៏មានម៉ូតូមួយគ្រឿងម៉ាក យ៉ាម៉ាហាស៊ីរ៉ូស បើកបរដោយឈ្មោះ ឈុន ខ្លី ភេទប្រុស អាយុ20ឆ្នាំ រស់នៅភូមិបាវិតលើ សង្កាត់បាវិត ក្រុងបាវិត ខេត្តស្វាយរៀង ទិសដៅរពីលិចទៅកើតទៅបុកចំពីមុខរថយន្ត បណ្ដាលឲ្យស្លាប់នៅពេលបញ្ជូនទៅដល់មន្ទីរពេទ្យ។
ប្រភពបន្តថាក្រោយមក ក៏មានម៉ូតូមួយគ្រឿងទៀតម៉ាកហុងដា វីសតុន ពណ៌ឈាមជ្រូក គ្មានស្លាកលេខ បើកបរដោយឈ្មោះអ៊ិន សាផាន់ ភេទប្រុស អាយុ១៨ឆ្នាំ រស់នៅភូមិក្បាលថ្នល់ ឃុំកណ្ដៀងរាយ ស្រុកស្វាយទាប ខេត្តស្វាយរៀង បើកបរពីកើតទៅលិច បានគេចនឹងម៉ូតូយ៉ាម៉ាហាស៊ីរ៉ូសដែលមានគ្រោះថ្នាក់ ហើយជ្រុលទៅបុកពីក្រោយនិងរថយន្តផ្សេង១គ្រឿងទៀតម៉ាកហ៊ីយ៉ាន់ដាយ ពាក់ស្លាកលេខ ភ្នំពេញ៣C៨២៤៩បើកបរពីកើតទៅលិចបណ្ដាលអោយស្លាប់នៅកន្លែងកើតហេតុ ។
ក្រោយពេលកើតហេតុភ្លាម អ្នកបើកបររថយន្តទាំង២គ្រឿងបានរត់គេចខ្លួនពីកន្លែងកើតហេតុបាត់ បន្សល់ទុករថយន្តទាំង២គ្រឿងនៅកន្លែងកើតហេតុ ។
បច្ចុប្បន្ន:សពត្រូវបានប្រគល់ជូនក្រុមគ្រួសារនៃសពយកទៅធ្វើបុណ្យតាមប្រពៃណី។
រីឯវត្ថុតាងម៉ូតូ និងរថយន្តត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលក្រុងបាវិតចាត់ការទៅតាមផ្លូវច្បាប់។
មូលហេតុ គ្រោះថ្នាក់ចរាចរណ៍នេះសមត្ថកិច្ចនគរបាលកំពុងស៊ើបអង្កេតស្រាវជ្រាវបន្តរកអ្នកបង្កហេតុ ៕
ដោយ៖ យឹម សុថាន
