ខេត្តមណ្ឌលគិរី៖ ជនជាតិបរទេសម្នាក់ រួមនិងស្ត្រីជនជាតិខ្មែរ៣នាក់ ជាមួយ និងគ្រឿងញឿនមួយចំនួន ត្រូវសមត្ថកិច្ចបង្ក្រាប និងចាប់ខ្លួនជាបន្តបន្តាប់ ក្នុងប្រតិបត្តិការរយៈពេល២ថ្ងៃ ដែលធ្វើឡើង ដោយការិយាល័យប្រឆាំង បទល្មើស គ្រឿងញៀន នៃស្នងការដ្ឋាននគរបាលខេត្តមណ្ឌលគិរី។ ក្នុងនោះជនបរទេសពាក់ព័ន្ធករណីលួចដាំដើមកញ្ឆា ឯស្ត្រីជនជាតិខ្មែរ៣នាក់ពាក់ព័ន្ធករណីរក្សាទុកខុសច្បាប់នូវសារធាតុញៀន។
នាយរងការិយាល័យគ្រឿងញៀន នៃស្នងការដ្ឋានខេត្តមណ្ឌលគិរី លោក ឡេវ ប៉ុន បានអោយដឹងថា នគរបាលប្រឆាំង គ្រឿងញៀន បានធ្វើប្រតិបត្តការបង្ក្រាប និងចាប់ខ្លួនជនសង្ស័យបានចំនួន ៤នាក់ជាបន្តបន្តាប់ ក្រោយមាន សេចក្តី រាយការណ៍ពីកម្លាំងឃ្លាំមើល ហើយសមត្ថកិច្ចបានបំពេញភារកិច្ចនេះ ប្រកបដោយភាព ជោគជ័យ ដោយក្នុងនោះ បានឃាត់ខ្លួនជនសង្ស័យរួមនិងវត្ថុតាងមួយចំនួនមានដូចខាងក្រោម
នៅថ្ងៃទី២៨តុលា វេលាម៉ោង១៩និង៤៥នាទីកម្លាំងការិយាល័យ សហការជាមួយកម្លាំង សន្តិសុខផ្ទៃក្នុង បានធ្វើការបង្ក្រាបករណី ជួញដូរគ្រឿងញៀននៅផ្ទះ សំណាក់ភ្នំមាស (បន្ទប់លេខ០៨) ស្ថិតនៅចំនុចភូមិចម្ការតែ សង្កាត់ស្ពានមានជ័យ ក្រុងសែនមនោរម្យ ឃាត់ខ្លួនជនសង្ស័យ២នាក់រួមនិងវត្ថុតាង ក្នុងនោះទី០១ឈ្មោះជុំ កុម្ភះ ហៅឡែន ភេទស្រី អាយុ៣១ឆ្នាំ ជនជាតិខ្មែរ មានទីលំនៅ ក្រុងភ្នំពេញ។ និងទី២ឈ្មោះ ថាច ស្រីម៉ៅ ភេទស្រី អាយុ២២ឆ្នាំ ជាបុគ្គលិកផ្ទះសំណាក់ផ្ទាល់ មានទីលំនៅខេត្តកណ្តាល។ វត្ថុតាង រួមមាន សារធាតុញៀនមេតំហ្វេតាមីន(ICE)១៣កញ្ចប់ ទម្ងន់៨.០៥ក្រាម រួមទាំងទូរស័ព្ទ និងប្រាក់មួយចំនួន។
នៅថ្ងៃទី២៩តុលា វេលាម៉ោង០៩និង៥០នាទី សមត្ថកិច្ចបានបន្តឆែកឆេរផ្ទះ ជួលមួយកន្លែង កម្មសិទ្ធ របស់ឈ្មោះប៉ូច ណារិន ស្ថិតនៅសង្កាត់ស្ពានមានជ័យដដែល ឃាត់ខ្លួនជនសង្ស័យម្នាក់ឈ្មោះយឹម ស្រីមុំ ភេទ ស្រីអាយុ៥៦ឆ្នាំ ជនជាតិខ្មែរ រកឃើញគ្រឿងញៀន(ICE)១៥កញ្ចប់ទម្ងន់២.០៤ក្រាម។ លោកនាយរងបន្តថា នៅថ្ងៃដដែលនគរបាល បានបន្តឆេកឆេរផ្ទះជួលមួយកន្លែងទៀត ស្ថិតនៅសង្កាត់ស្ពានមានជ័យដដែល ក្រោមការសម្របសម្រួលនិតិវិធីពី ព្រះរាជអាជ្ញារងអមសាលាដំបូងខេត្ត លោកសាន សុភះ សមត្ថកិច្ចបានរកឃើញ នូវដើម កញ្ជារចំនួន២៤ ដើមនិងគ្រាប់កញ្ជារក្រៀមចំនួន២០គ្រាប់ ដែលជន បរទេសឈ្មោះទ្រីប ម៉ាឈ័ររៀហាត អាយុ៤០ឆ្នាំ ជាជនជាតិអាឡឺម៉ង់ មុខរបរជាជាងជួសជុលម៉ូតូធំ ដាំ និងលាក់ ទុក គ្រាប់កញ្ជារក្រៀមទាំងនោះ។
បច្ចុប្បន្នជនសង្ស័យទាំង៤នាក់ សមត្ថកិច្ចកំពុងកសាងសំណុំរឿង ដើម្បីបញ្ជួនទៅសាលាដំបូងចាត់ការ តាមនិតិវិធី ៕
ដោយ៖ ឦសាន
