ភ្នំពេញ៖ កីឡាការិនី២នាក់ក្នុង ចំណោម១១នាក់របស់សាកលវិទ្យាល័យ អាស៊ី អឺរ៉ុបគឺកីឡាការិនីចាន់ សីហា និង កីឡាការិនី សម សូនីតា ដែលមាន អាជីពកីឡាចំនួន២គឺអត្ដពលកម្ម និង កីឡាវ៉ូវីណាមបានបង្ហាញខ្លួននៅលើ សង្វៀនប្រកួតកីឡាវ៉ូវីណាមជ្រើសរើស ជើងឯកថ្នាក់ជាតិប្រចាំឆ្នាំ២០១៥ ។
កីឡាការិនី ចាន់ សីហា បានប្រាប់ អ្នកយកព័ត៌មាននគរវត្ដថា សម្រាប់ នាងជាអ្នកកីឡាដែលមានអាជីពចំនួន២ នៅក្នុងខ្លួនគឺអត្ដពលកម្ម និងវ៉ូវីណាម តំណាងឱ្យសាកលវិទ្យាល័យអាស៊ីអឺរ៉ុប មិនមែនចេះតែមកប្រកួតនោះទេ តាម ការពិតនាងបានហ្វឹកហាត់កីឡាវ៉ូវីណាមអស់រយៈពេលយូរឆ្នាំមកហើយ ។
កីឡាការិនីរូបនេះបានបន្ដទៀតថា ថ្វីដ្បិតតែនាងធ្លាប់ជាកីឡាការិនីអត្ដ ពលកម្មឆ្នើមម្នាក់ ហើយមកចូលរួម ហ្វឹកហាត់កីឡាវ៉ូវីណាមខាងលើមិនមែន គ្រាន់តែហាត់ដើម្បីសុខភាពនោះទេ ហើយក៏មិនមានកីឡាការិនីអត្ដពលកម្មផ្សេងទៀតអាចមកប្រកួតកីឡាវ៉ូវីណាមបានដូចនាងទេ បើពុំបានឆ្លងកាត់ការ ហ្វឹកហាត់រយៈពេលវែង ពីព្រោះពួក គាត់មិនចេះសម្ដែង និងមិនចេះវាយ ។
ទន្ទឹមនឹងការលើកឡើងរបស់កីឡា ការិនីរូបនេះលោក ពៅ ហុក ប្រធាន ប្រតិភូដឹកនាំកីឡាករកីឡាការិនីAEU បានឱ្យដឹងថា ឆ្នាំនេះសាលាបានបញ្ជូន អត្ដពលិក១១នាក់ ក្នុងនោះមានកីឡាករ ៦នាក់កីឡាការិនី៥នាក់ ។ លោកបាន បន្ដថា ការប្រកួតរបស់ពួកគេមាន២ វិញ្ញាសាគឺប្រយុទ្ធបុរស-នារី និងសម្ដែង បុរស-នារី ។ ក្នុងនោះវិញ្ញាសាប្រយុទ្ធ បុរសចាប់ពីប្រភេទទម្ងន់៥០គីឡូក្រាម ដល់៦៥គីឡូក្រាម នារីចាប់ពីទម្ងន់៥៥ គីឡូក្រាមដល់៦០គីឡូក្រាម ។ កីឡាករ កីឡាការិនីទាំង១១នាក់រួមមានកីឡាករ ជា សុខម៉េង, កីឡាករ ហេង សារឿន, កីឡាករ ចាន់ សំរុង, កីឡាករ រស់ ពុទ្ធី, កីឡាករ សេង គឹមស៊ុន, កីឡាករ ម៉ៅ តុលា, កីឡាការិនី ចាន់ សីហា, កីឡា ការិនី សម សូនីតា, កីឡាការិនី ម៉ៅ ម៉ូនីតា, កីឡាការិនី វឿន វល័ក្ខ និងកីឡា ការិនី ពេជ្រ ជំនោរ ។
តាមរបាយការណ៍របស់គណៈកម្មការ រៀបចំការប្រកួតកីឡាវ៉ូវីណាមជ្រើស រើសឯកថ្នាក់ជាតិឆ្នាំ២០១៥បានឱ្យដឹង ថា ឆ្នាំនេះមានសមាគមនិង ក្លិបដាក់ ពាក្យសុំចូលរួមប្រកួតចំនួន៦មានកីឡាករកីឡាការិនីសរុប៩៩នាក់ ក្នុងនោះ មានកីឡាការិនី២៤នាក់គ្រោង នឹងបញ្ចប់ ការប្រកួតនៅរសៀលថ្ងៃទី៣១ ខែតុលា ឆ្នាំ២០១៥ ក្នុងវិមានពហុកីឡដ្ឋានជាតិ អូឡាំពិក ៕
ដោយ៖ សារីម
