ខេត្តបន្ទាយមានជ័យ៖ រថយន្តកូរ៉េដឹកមាន់មួយគ្រឿងបានឡើងជែងរថយន្តវីហ្គោ មិនផុតបណ្ដាលឲ្យកៀរគ្នាក្រឡាប់ផ្ងារជើងទាំង២ តែមិនបណ្ដាលឲ្យអ្នកនរណាម្នាក់រងរបួសឡើយ គ្រាន់តែខូចខាតរថយន្តប៉ុណ្ណោះ។
ហេតុការណ៍នេះបានកើតឡើងនៅវេលាម៉ោងប្រមាណ១២ និង១០នាទីរសៀលថ្ងៃទី៣១ ខែតុលា ឆ្នាំ២០១៥ នៅលើកំណាត់ផ្លូវជាតិលេខ៦ ស្ថិតក្នុងឃុំស្នួលមានជ័យ ស្រុកព្រះនេត្រព្រះ ខេត្តបន្ទាយមានជ័យ។
ប្រភពព័ត៌មានបានឲ្យដឹងថា មុនពេលកើតហេតុគេឃើញរថយន្តកូរ៉េដឹកមាន់មួយគ្រឿងបើកតាមបណ្ដោយផ្លូវជាតិលេខ៦ក្នុងទិសដៅពីលិចទៅកើត។ លុះដល់ចំណុចកើតហេតុ រថយន្ដនេះបានឡើងជែងរថយន្តវីហ្គោ ពណ៌ទឹកប្រាក់ ពាក់ស្លាកលេខភ្នំពេញ 2AC-1521តែដោយសារមានរថយន្ដធុនធំមួយគ្រឿងទៀតមកក្នុងទិសដៅផ្ទុយគ្នា ទើបអ្នកបើកបរថយន្ដកូរ៉េបានងាកចង្កូតចូលមកផ្លូវអាទិភាព វិញ ក៏កៀរគ្នាជាមួយរថយន្ដវិហ្គោ បណ្ដាលឲ្យរថយន្ដទាំង២ក្រឡាប់តែម្ដង។
ក្រោយពេលកើតហេតុ សមត្ថកិច្ចបានចុះវាស់វែង និងស្ទូចយករថយន្តយកទៅរក្សាទុកដើម្បីដោះស្រាយតាមផ្លូវច្បាប់៕
ដោយ៖ វិបុល
