ភ្នំពេញ៖ ជនសង្ស័យ៤នាក់ ពីរករណីផ្សេងគ្នា គឺក្នុងនោះជនសង្ស័យ២នាក់ ករណីកាន់កាប់អាវុធខុសច្បាប់ (ស្នាប់ដៃ) និងជនសង្ស័យ២នាក់ផ្សេងទៀត ករណីរក្សាទុកដោយខុសច្បាប់នូវសារធាតុញៀន ត្រូវបាននគរបាលព្រហ្មទណ្ឌខណ្ឌដង្កោ កសាងសំណុំរឿងបញ្ជូនទៅកាន់តុលាការរាជធានីភ្នំពេញ នាព្រឹកថ្ងៃទី៣១ ខែតុលា ឆ្នាំ២០១៥ ដើម្បីចាត់ការតាមច្បាប់ ។
ជនសង្ស័យ២នាក់ករណីកាន់កាប់អាវុធខុសច្បាប់ (ស្នាប់ដៃ) ទី១ឈ្មោះ ផន មករា ភេទប្រុស អាយុ១៩ឆ្នាំ មុខរបរព្រូឡាន ស្នាក់នៅការាស់ឡាន សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ និងទី២ឈ្មោះ ពៅ រស្មី ភេទប្រុស អាយុ២១ឆ្នាំ មុខរបរព្រូឡាន ស្នាក់នៅជាមួយគ្នា។ វត្ថុតាងដកហូតបាន ម៉ូតូ ១គ្រឿង ម៉ាកស៊ុយសាគីនិច ពណ៌ក្រហម គ្មានស្លាកលេខ និងស្នាប់ដៃចំនួន ១ ។
សមត្ថកិច្ចប្រាប់ឲ្យដឹងថា កាលពីថ្ងៃទី២៨ ខែតុលា ឆ្នាំ២០១៥ វេលាម៉ោង១៩ និង០០នាទី គណៈបញ្ជាការឯកភាពខណ្ឌដង្កោ ដឹកនាំកម្លាំងចម្រុះចូលរួម ធ្វើការត្រួតពិនិត្យអាវុធជាតិផ្ទុះ ទៅលើយានជំនិះគ្រប់ប្រភេទ រកវុត្ថតាងពាក់ពន័្ធបទល្មើសផ្សេងៗ នៅលើផ្លូវ២១៧ ចំណុចខាងមុខបូរីសំបួរមាស ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ លុះដល់វេលាម៉ោង ១៩ និង៤៥នាទី មានម៉ូតូ ១គ្រឿង ម៉ាក ស៊ូយសាគី និច ក្រហម គ្មានស្លាកលេខ ជិះឌុបគ្នាពីរនាក់ ក្នុងទិសដៅពីជើងទៅត្បូង ឆ្លងកាត់ចំណុចត្រួតពិនិត្យ ភ្លាមនោះសមត្ថកិច្ចហៅអោយឈប់ត្រួតពិនិត្យឆែកឆេរស្រាប់តែរកឃើញស្នាប់ដៃនៅក្នុងប្រអប់ក្រោមកម៉ូតូខាងឆ្វេង ទើបសមត្ថកិច្ចធ្វើការឃាត់ខ្លួនជនសង្ស័យទាំង២នាក់ រួមទាំងវត្ថុតាងយកមកកាន់អធិការដ្ឋាននគរបាលខណ្ឌដង្កោ ដើម្បីចាត់ការតាមច្បាប់ ។
សមត្ថកិច្ចបន្តឲ្យដឹងថា នាយប់ថ្ងៃដដែលជនសង្ស័យ២នាក់ផ្សេងទៀត ក៏ត្រូវបានឃាត់ ខ្លួនករណីរក្សាទុកដោយខុសច្បាប់នូវសារធាតុញៀន ទី១ ឈ្មោះ ជួប វាសនា ហៅស្មាញ ភេទប្រុស អាយុ២៥ឆ្នាំ និងទី២ ឈ្មោះ ង៉ែត វិត ហៅ ពត ភេទប្រុស អាយុ២៥ឆ្នាំ ទាំង២នាក់ មានមុខរបរជាកម្មកររោងចក្រ ស្នាក់នៅផ្ទះជួលជាមួយគ្នាភូមិខ្វា សង្កាត់ដង្កោ ខណ្ឌដង្កោ ។
មុនពេលឃាត់ខ្លួន គឺជនសង្ស័យទាំង២នាក់ ជិះម៉ូតូ ១គ្រឿង ម៉ាកស្មាស់ ពណ៍ខៀវ ធ្វើដំណើរតាមបណ្តោយផ្លូវ២១៧ ក្នុងទិសដៅពីជើងទៅត្បូងឆ្លងកាត់ចំណុចត្រួតពិនិត្យ ខណៈនោះសមត្ថកិច្ចបានហៅធ្វើការឆែកឆេរ ស្រាប់តែរកឃើញក្រាមពណ៍សថ្លា ចំនួន ១ កញ្ចប់ នៅលើខ្លួន ឈ្មោះ ង៉ែត វិត ហៅ ពត ទើបធ្វើការឃាត់ខ្លួននាំមកកាន់អធិការដ្ឋាននគរបាលខណ្ឌដង្កោធ្វើការសាកសួរ ។
នៅចំពោះមុខសមត្ថកិច្ចជនសង្ស័យទាំង២នាក់ ឆ្លើយសារភាពថា ថ្នាំញៀន ១កញ្ចប់ នេះ គឺពួគគេទិញពីគេម្នាក់មិនស្គាល់ឈ្មោះ នៅមុខការាស់ឡាន ម៉ាស្តា តាមបណ្តោយផ្លូវ សហព័ន្ធរ៉ុស្ស៊ី សង្កាត់កាកាប ខណ្ឌពោធិសែនជ័យ ក្នុងតម្លៃ ៤ម៉ឺនរៀល ទុកសម្រាប់ប្រើប្រាស់ ប៉ុន្តែមិនទាន់ទាំងបានជក់ផង ក៏ត្រូវសមត្ថកិច្ចត្រួតពិនិត្យឆែកឆេរឃើញវត្ថុតាងថ្នាំញៀន ឃាត់ខ្លួនពួកគេតែម្តង ៕
...
ដោយ៖ ភារ៉ា ដង្កោ
