ភ្នំពេញ ៖ ករណីប្លន់រថយន្តមិនបានសម្រេចមួយបានកើតឡើង បណ្ដាលឲ្យជនរងគ្រោះជាអ្នកបើករថយន្តតាក់ស៊ីក្រហមរងរបួសធ្ងន់ ហើយត្រូវបានគេដឹកយកទៅសង្គ្រោះនៅមន្ទីរពេទ្យកាលម៉ែត បន្ទាប់ពីជនសង្ស័យម្នាក់បានប្រើល្បិចហៅរថយន្តដឹកទៅរង់ចាំទទួលប្រពន្ធរបស់គេ លុះដល់កន្លែងស្ងាត់ក៏ធ្វើសកម្មភាពយកខ្សែហ្វ្រាំងម៉ូតូមករឹត.កកាប់ប្លន់យករថយន្តជនរងគ្រោះ រួចច្រានទន្លាក់ពីលើរថយន្តរួចព្យាយាមបើករត់គេចខ្លួន តែត្រូវរថយន្តជនរងគ្រោះភ្ជាប់ប្រព័ន្ធជីភីអេស ទើបជនសង្ស័យយករថយន្តនេះទៅប្លុងចោល ហើយរត់គេចខ្លួនបាត់ស្រមោល ។
ករណីប្លន់រថយន្តខាងលើនេះ បានកើតឡើងការពីវេលាម៉ោង១១និង៣០នាទីយប់ ថ្ងៃទី១៧ ខែកុម្ភៈ ឆ្នាំ ២០១៨ ស្ថិតនៅតាមបណ្តោយផ្លូវបេតុងកែងផ្លូវរថភ្លើងភូមិក្រោលគោសង្កាត់ គីឡូម៉ែត្រលេខ៦ ខណ្ឌឬស្សីកែវ រាជធានីភ្នំពេញ ។
ជនរងគ្រោះឈ្មោះ ញាញ់ សុខគា ភេទប្រុស អាយុ២១ឆ្នាំ មុខរបរបើកតាក់ស៊ីម៉ែត្រក្រហម ស្នាក់នៅផ្ទះជួលភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជយ័ មានស្រុកកំណើតនៅភូមិទួលទទឹង ឃុំទួលទទឹង ក្រុងព្រះសីហនុ ខេត្តព្រះសីហនុ បើករថយន្តមួយគ្រឿងម៉ាកកាមរីបាឡែន ជារថយន្តតាក់ស៊ីម៉ែត្រពណ៌ក្រហម ពាក់ស្លាកលេខ ភ្នំពេញ ២AF-៦២៣៧ (រងរបួសធ្ងន់កំពុងសម្រាកព្យាបាលនៅមន្ទីរពេទ្យកាលម៉ែត )។
តាមសម្តីរបស់ប្រជាពលរដ្ឋនៅកន្លែងកើតហេតុ បានឲ្យដឹងថា មុនពេលកើតហេតុគេឃើញរថយន្តតាក់ស៊ីមួយគ្រឿងឈប់នៅនឹងកន្លែងកើតហេតុជាងមួយម៉ោងមកហើយ គឺជនរងគ្រោះរង់ចាំប្រពន្ធជនសង្ស័យជាលេសចាញ់បោកល្បិចជនសង្ស័យដែលបានរៀបគំរោងទុកជាមុន ឃើញឱកាសល្អជនសង្ស័យបានយកខ្សែហ្វ្រាំងម៉ូតូរឹត.កជនរងគ្រោះផ្ទប់ជាប់ជាមួយកៅអីរថយន្តធ្វើឲ្យជនរងគ្រោះមានការរើបំរាស់រហូតចេញក្រៅរថយន្តមានការប្រតាយប្រតប់គ្នាតែត្រូវបានជនសង្ស័យដកកាំបិតបុ័ងតោដែលបានលាក់ទុកជាប់នឹងខ្លួនកាប់ជាច្រើនកាំបិតត្រូវចំក្បាល និងដៃជនរងគ្រោះបណ្តាលឲ្យប្រកាច់នៅក្នុងថ្លុកឈាមតែម្តង ។ រួចជនសង្ស័យបានបើករថយន្តគេចខ្លួនបាត់ស្រមោល ។ ភ្លាមៗនោះប្រជាពលរដ្ឋបានឃើញហេតុការណ៍នេះបានទំនាក់ទំនងទៅសមត្ថកិច្ចមូលដ្ឋានឲ្យចុះមកកន្លែងកើតហេតុ និងហៅរថយន្តសង្គ្រោះបន្ទាន់ដឹកយកទៅសង្គ្រោះភ្លាមៗ និងបោះដៃតាមវិទ្យុទាក់ទងឲ្យសមត្ថកិច្ចគ្រប់ខណ្ឌចុះជួយអន្តរាគមន៍ផង ភ្លាមៗនោះកម្លាំងសមត្ថកិច្ចខណ្ឌដូនពេញបានចេញអន្តរាគមន៍ និងល្បាតក៏បានប្រទះឃើញរថយន្តជនរងគ្រោះត្រូវបានជនសង្ស័យបើកយកទៅប្លុងចោលនៅនឹងម្តុំផ្លូវលេខ៦១ សង្កាត់ផ្សារទី១ ខណ្ឌដូនពេញ ។ ចំណែកជនសង្ស័យរត់គេចខ្លួនបាត់ដោយសារតែរថយន្តនោះមានភ្ជាប់ប្រព័ន្ធជីភីអេស និងមានប្រព័ន្ធវិទ្យុទាក់ទងរបស់ក្រុមតាក់ស៊ីបំពាក់នៅក្នុងរថយន្តផងដែរ ។
បើយោងតាមប្រភពព័ត៌មានពីបងប្រុសរបស់ជនរងគ្រោះ បានរៀបរាប់ប្រាប់សមត្ថកិច្ចនៅកន្លែងកើតហេតុថា មុនកើតហេតុនៅវេលាម៉ោង១០យប់ថ្ងៃកើតហេតុ គាត់បានទូរស័ព្ទមកទំនាក់ទំនងជាមួយប្អូនរបស់គាត់(ជនរងគ្រោះ) ដោយទូរស័ព្ទហៅប្អូនឲ្យមកដឹកម៉ូយម្នាក់នៅម្តុំផ្សាររាត្រី តែប្អូនប្រុសនិយាយថា ជាប់រវល់ដឹកម៉ូយយកទៅឬស្សីកែវ ។ ស្រាប់តែមួយសន្ទុះក្រោយមកជនរងគ្រោះបានទូរស័ព្ទមកគាត់វិញថា ភ្ញៀវឲ្យឈប់(ជនសង្ស័យ)ចាំយកប្រពន្ធរបស់គេសិន ។ រហូតដល់ម៉ោង១១យប់ថ្ងៃដដែរ បងប្រុសជនរងគ្រោះបានទូរស័ព្ទទៅប្អូនម្តងទៀតតែអត់មានអ្នកលើក ដោយមានការសង្ស័យថាជនរងគ្រោះមានគ្រោះថ្នាក់ក៏បានធ្វើការទំនាក់ទំនងជាមួយក្រុមការងារផ្សេងទៀត ទើបដឹងថាជនរងគ្រោះត្រូវចោរកាប់ប្លន់យករថយន្តទៅបាត់បណ្ដោលឲ្យរងរបួសធ្ងន់ផងដែរ ។ ភ្លាមនោះបងប្រុសជនរងគ្រោះក៏បានឲ្យក្រុមហ៊ុនឆែកតាមប្រព័ន្ធជីភីអេស ហើយជនសង្ស័យទំនងជាដឹងថារថយន្តនោះបានភ្ជាប់ប្រព័ន្ធជីភីអេសដែល ទើបយករថយន្តដែលប្លន់បាននោះទៅប្លុងចោលរួចរត់គេចខ្លួនបាត់ ។
ក្រោយពេលកើតហេតុសមត្ថកិច្ចខណ្ឌដូនពេញបានទាក់ទងទៅខណ្ឌឬស្សីកែវ មកទទួលយករថយន្តទៅរក្សាទុកនឹងធ្វើកំណត់ហេតុ តាមពាក្យបណ្តឹងជនរងគ្រោះ ដើម្បីកំណត់មុខសញ្ញាជនសង្ស័យឈានទៅដល់ការចាប់ខ្លួនមកដាក់ទោសតាមច្បាប់ ៕ ស តារា
